1 KORINTUS 14 - Nanduk Ngget Tul Pidnak Wene

Konak Indi-nen we tembet ondoso mende wene mberen pem tak posolat yidnak wene 14:1-25

¹ Iri bem-e, ap enabuwa kagwi iri-ge muk ker-o. Konak Indi-nen tembet ondoso mende irit wanurak pem kit na kit-net kenmawi kondogolar-et nde, nggok lombog-e Mbal Pem Nagawan-nen yidnak wene lomboksa yurak iri wanurak kenmawi konder-o.

² Ap mbi-nen nin wene nan wene bem yusu iri-ge ap yak undusu-ge lag-o. At-nen yidnak wene iri-ge ap-nen yebet kali buk me, Mbal Pem Nagawan-et yak tusu-o. Konak Indi bem-nen kura wene-t yusu-o.

³ Alat nde, ap mbi-nen Mbal Pem Nagawan-nen yidnak wene lomboksa yosolar-e, ab-et yak undusu me, mendak onposolat, nggomo ondosolat, inndi yangonosolat yusu-o.

⁴ Ta-nen nde nin wene nan wene bem yosolar-e, at ambik mendak ubusu-o. Alat nde, ta-nen nde Mbal Pem Nagawan-nen yidnak wene lomboksa yosolar-e, lambuk tak inpidnak nap oboksa mendak unpusu-o.

⁵ Kit pidsa-nen nin wene nan wene bem yurak iri-ge an-e nindingen-et nde, kit pidsa-nen Mbal Pem Nagawan-nen yidnak wene lomboksa yurak iri perak terak minik konak lombog-o. Nin wene nan wene bem yusu-t nde, lambuk tak inpidnak nap men makluk wene na nden yaga yigit lak ala-ge, iri yusu-ge te nggal-et nde, Mbal Pem Nagawan-nen yidnak wene lomboksa yoso nab-e ija lombog-o.

⁶ Nde, nanggamirak wa-e. An-e kit kendam lobok yimindik nde an-e Mbal Pem Nagawan-nen yidnak nam tak paga yak kondoso mende min enaru yugwi elem min aid wene yugwi min nggomo undugwi min yak kindigit lak, nin wene nan wene bem yak kindimin iri bem-nen konak tak kinpimin-e lag-o.

⁷ Uruk woraso buk tengge seruling poba min kecapi poba min-e ene kwara yigit lak ala-ge, ndawi yidnag-e nggesa-nen yenggerak puwa-o?

⁸ Nde, napiri poba ene parosa pigit lak ala-ge, ta-nen nde wim nggurak pem lid lud tak puwa-o?

⁹ Iri nggal-et, kit-nen na nin wene nan wene bem yogola-ge, ab-e kit-nen yidnak wene iri-ge nggerak puruk-nen yebet kujwa-o? Kit-nen yidnak wene-ge no nde yidnak nggal ma-o.

¹⁰ Nggweyak ma yu me-ge yi nap ndi nap enne lombok kwarat worasu-t nde, kasaba-t yugwi mbi worasu-ge lag-o.

¹¹ Alat nde, an-nen koloso buk wene bem yosola-ge, iri yusu nab-e an nimin-e ap sal nggal-et ma-o. Nde, an-e at imin na ap sal nggal-et yimin-o.

¹² Kit-nen na Konak Indi-nen we wok ondoso mende iri wanuwokluk kenmawi kondogolar-e, ija lombog-e lambuk tak inpidnak nap mendak unpurak mende iri nak nggok tak purag-o.

¹³ Iri bem-e, ta-nen nde nin wene nan wene bem yosolar-e, wene na nden yaga yoso kwat yekluk Mbal Pem Nagawan emengen mbaruwag-o.

¹⁴ Nde, an-nen nin wene nan wene bem tepan yosola-ge, an nindi-nen ndemeret tepan yusu-t nde, an-nen yebet kaso nindi-ge we worasu-o.

¹⁵ Iri bem-e ngge yimin-o? An nindi bem-net tepan yosolar-e, an-nen yebet kaso iri bem-nen na tepan yimin-o. An nindi bem-net ndawi yosolar-e, an-nen yebet kaso iri bem-net ndawi yimin-o.

¹⁶ Kat-nen nde nin wene nan wene bem nak Mbal Pem Nagawan erembel wanosola-ge, kat-nen wa yugun iri-ge we nab-e kabak me, kat-nen yugun wene iri-ge nggesa kuluruk-nen ”Amen-o” yuwa-o?

¹⁷ Nde, kat-nen Mbal Pem Nagawan erembel mondok konag-et wanugun-et nde, kat-nen erembel wanugun iri-nen nin nap iri na yongga wuruwa bug-o.

¹⁸ Kit pidsa-ge nin wene nan wene bem yugwi-t nde, an-e nin wene nan wene bem-e terak minik kwarat yoso me, an-e Mbal Pem Nagawan wa yak toso-o.

¹⁹ Alat nde, lambuk tak inpidnak nap ennggendumu-nen-e ap mul endeyekluk-nen nin wene nan wene bem-e wene ber-ribu ribu wonarurak puk wene yak undurak keya buruk, it-nen kulurak wene bem wene lima nggal nak yurag-e mondok nindingen-o.

²⁰ Nanggamirak wa-e. Kit-nen yebet kagwi-ge li marik-nen yebet kagwi nggal yebet kudtak pug-o. Meya kwarugwi bem-e li marik nggal kwat yer-o. Alat nde, kit-nen yebet kagwi bem-e kinndi amburu mbarak wolmer-o.

²¹ Mbal Pem Nagawan engga mbarak pem-nen yosolar-e: ”Nagawan Indo-nen yosolar-e: ’An-e ap elem yu yak ondosolar-e, nin nap-nen it enne bem-nen yak indilik, ap sal enemende nggwe-nen yak indilik yimin-et nde, it-nen-e an-nen yidnak wene-ge kuluwa bug-o’ ” yij-o.

²² Iri ala-ge, nin wene nan wene bem yugwi iri-ge it inndi angin tubu yidnak nap enmanggim yenggerak purak mende-ge lag-o. Are, inndi angin tubu yigit lak nap enmanggim-o. Nde, Mbal Pem Nagawan ene lomboksa yugwi iri-ge it inndi angin tubu yigit lak nap enmanggim yenggerak purak mende-ge lag-o. Are, inndi angin tubu yidnak nap enmanggim-o.

²³ Iri ala-ge, lambuk tak inpidnak nap obok ndok wuruwarik, enariktag-et nin wene nan wene bem yil mburukmu, we nap ala na, inndi angin tubu yigit lak nap ala na, kendam ngguwarig-e, ”Kir-e kinndi wawa-nen yili-o” luk yak kunduwa bug-a?

²⁴ Alat nde, kit pidsa-nen Mbal Pem Nagawan ene lomboksa yukmu-ge, inndi angin tubu yigit lak nap ala na, ap sal ala na, ngguwarig-e, wene kuluwa na-nen-e at meya yidnak yeberak obosolat, at arem mbenarak obosolat,

²⁵ at arem-nen kura woraso mende na para nam tak posola-ge, at iri-ge erare nggwe tud luk, Mbal Pem Nagawan erembel wanosolat-nen yosolar-e: ”Mbal Pem Nagawan-e ndemeret kit kennggendumu worasu-o” luk para yuwa-o.

Lambuk tak inpidnak nap ennggendumu-nen kwarurak wene 14:26-40

²⁶ Nanggamirak wa-e. Ngge yosolat-nen yigi kali? Kir-e ndok wutluk, kenariktag-et kwarogolar-e, misig-e ndawi yogolat, nin-e mul ondogolat, misig-e Mbal Pem Nagawan-nen kura bidnak wene nam tak pogolat, nin-e nin wene nan wene bem yogolat mer-o. Alat nde, iri kwarogolar-e, ap inndi mendak purak pem kwarogolat wolmer-o.

²⁷ Ap erep-nen nde nin wene nan wene bem yurak ala-ge, mberen nap-nen ala na, kenan nap-nen ala na yogolar-et nde, ap misik-nen yosola, ap misik-nen yuruk, enariktak yurag-e, nin nap misik-nen-e it-nen yidnak wene na nden yaga ndomoksa yuwag-o.

²⁸ Nde, nden yaga ndomoksa yurak nab-e lak ala-ge, lambuk tak inpidnak nap ennggendumu-nen wene iri na yigit lak, indi abu worasolat-nen at ondomok yik korasolat, Mbal Pem Nagawan yak tosolat mag-o.

²⁹ Mberen nap-nen ala na, kenan nap-ne ala na, Mbal Pem Nagawan-nen yidnak wene yogola-ge, it erep-nen-e it-nen yidnak wene iri-ge yebet kagolat wolmag-o.

³⁰ Alat nde, ereba koreyak woraidnak nap misik nde Mbal Pem Nagawan-nen kura wene mbi nam yaga wok tosola-ge, wene nanduk yosolat woraidnak nap iri-ge ene lak wolmag-o.

³¹ Kit pidsa kenaru yogolat, kenmawi wanogolat yobok-nen Mbal Pem Nagawan-nen yidnak wene lomboksa yogolar-e, kit pidsa-ge ap misik-nen yosola, ap misik-nen yuruk yogolar-e ob-o.

³² Mbal Pem Nagawan-nen yidnak wene lomboksa yugwi nap iri-ge it inndi-ge it-net tena woragwi-o.

³³ Mbal Pem Nagawan-e nari wari yurak iri perasu bug-o. Are, kona yamuksa wolmomtak nak peraso-o. Nde, lambuk tak inpidnak marak nap pidsa ennggendumu-nen kwatli nggal,

³⁴ lambuk tak inpidnak nap ennggendumu-nen kwami-nen-e enne lag-et wolmag-o. Imiri mbarak pidnak wene arem-nen yid iri nggal-et, kwami-nen wene yurag-e mondok lag-o. Inndi teberak irit wolmag-o.

³⁵ Nde, lambuk tak inpidnak nap ennggendumu-nen kwami-nen wene yurag-e meya me, kwami-nen nde enaru yurak mbi peragolar-e, o ma nggwe-nen unun tak kin wok unpuwag-o.

³⁶ Mbal Pem Nagawan-nen yidnak wene iri elem-e kit-nen yili-a? Are, at ene-ge kit kenmanggim nak wok yij-a?

³⁷ Ta-nen nde: ”An-e Mbal Pem Nagawan ene lomboksa yoso nap, Konak Indi-nen we tembet ondoso mende wanigi-o” luk perasu nab-e, an-nen mbal kundusu wene yu-ge ndemeret Nagawan Indo-nen yidnak wene-net yusu-o luk yebet kujwag-o.

³⁸ Alat nde, at-nen-e wene yu nde te rak posola-ge, iri yidnak nab-e te rak eber-o.

³⁹ Iri bem-e, nanggamirak wa-e. Kir-e Mbal Pem Nagawan ene lomboksa yurak pem kenmawi konder-o. Nde, nin wene nan wene bem yogola-ge, ”Meyog-o” yurak pug-o.

⁴⁰ Alat nde, yi kwatlik ndi kwatlik kwarogolar-e, mot mot nak kwarogolat, kwarugwi-t kwarogolat yurag-o.