1 KORINTUS 13 - Nanduk Ngget Tul Pidnak Wene

Ap enabuwa kagwi wene 13:1-13

¹ An-nen-e ki nap enne bem ala na irit, aid nap enne bem ala na irit, te irit yimin-et nde, ap enabuwa kagwi elem nde an narem lak-nen-e an-e posid owak lel kagola, ene nggwe yidnak nggal-nen yusu-o.

² An-nen-e aid wene kwiye worak yoso kwat yosolat, kura wene pidsa naru yosolat, enaru yugwi mende pidsa naru yosolat, an nindi angin tubu yidnak iminep mbarak pem-nen ndobo iri lembera nin me wirik posolat yimin-et nde, ap enabuwa kagwi elem nde ap narem-e lak-nen-e an-e ebe lak mende-nen yusu-o.

³ An narengge pik paksa ap tembet ondosolat, an nebe na kan nubuwakluk wesera wok ondosolat yimin-et nde, ap enabuwa kagwi elem nde an narem-e lak-nen-e iri kwarimin pidsa-ge an namanggim-e wewesa-nen yusu-o.

⁴ Ap enabuwa kagwi-ge indi mamak puruk woraso min ap inmin konak nak yoso min-nen yusu-o. Ap enabuwa kagwi-ge erengen ale yoso buk, indi kek tak puruk, ambik erembel wanoso buk-nen yusu-o.

⁵ Ap enabuwa kagwi-ge kwarugwi buk mende na kwaroso buk, ondomok amanggim arengge na kore yoso buk, ndaget isilepma yoso bug-o. Ap enabuwa kagwi-nen-e at lel ibidnak na nggotloso bug-o.

⁶ Ap enabuwa kagwi-ge lugud tak kwaridnak pem alen kaso bug-o. Alat nde, mot mot kwaridnak pem-e alin alen kaso-o.

⁷ Ap enabuwa kagwi-ge yi kwat ibidnak ndi kwat ibidnak pem indisem nak woraso-o. Yi mende ndi mende oboksa bem indi angin tubu yosolat, yi mende ndi mende oboksa ebem indi mbung mbung tak worasolat, yi mende ndi mende oboksa bem indi luruk puruk worasolat yoso-o.

⁸ Ap enabuwa kagwi-ge pem irit wolma-o. Aid wene yili iri-ge abog-e lak tak puwa-o. Ap enne bem yugwi na abog-e yugwi buk ma-o. Enaru yugwi elem abog-e lag-et ma-o.

⁹ Nit nenaru yugwi elem min aid wene yugwi min-e iminep mbal yigit lag-et nde,

¹⁰ iminep mbarak mende wok yosola-ge, iminep mbal yigit lak iri-ge lak ma-o.

¹¹ Nde, an li marik worasolar-e, nene yoso min nindi-n peraso min yebet kaso min-e li marik-nen kwarugwi irit kwarosolat woragi-o. Nde, yawo an nindi worak yosolar-e, li marik-nen kwarugwi iri-ge keya bigi-o.

¹² Yawo kali yu-ge papalo arem-e isisiyap nak kaidnak nggal-et kali-o. Alat nde, abok-nen-e nenpe lid pid mbul-o. Yawo-ge an-e kwara naru yusu bug-et nde, abok-nen-e Mbal Pem Nagawan-nen an aru yusu nggal, an-nen na mondok kwara naru yimin-o.

¹³ Nde, yawo-nen-e kenan yu worasu-o: Inndi angin tubu yugwi min inndi mbung mbung tak woragwi min ap enabuwa kagwi min worasu-t nde, ija lombog-e ap enabuwa kagwi irir-o.