1 KORINTUS 12 - Nanduk Ngget Tul Pidnak Wene

We tembet ondoso mende iri-ge nin tak nan tag-et nde, Konak Indi-ge misiget-nen yusu-o 12:1-11

¹ Nanggamirak wa-e. Konak Indi-nen we tembet ondoso wene iri-ge kir-e ndemeret kenaru yurag-e an nindingen-o.

² Kit nanduk Mbal Pem Nagawan kenaru buk woragolar-e, kir-e kinndi kwara yebet kagit lak urugup lak kugiwak ambigit nggwe lit kunpuruk mboroso iri-ge kir-e kenaru nar-o.

³ Iri bem-e, an-nen wene yu-ge kwara kenaru rak peyeg-o. Konak Indi arem woraso nap-nen-e ap misiger-o luk tet-nen yosolar-e: ”Yesus iri-ge imbiri lamut mag-o!” luk yoso bug-o. Nde, ap misiger-o luk tet-nen yosolar-e: ”Yesus iri-ge Nagawan Indo-nen yusu-o” luk yoso iri-ge Konak Indi arem worasu iri bem nak-nen yoso-o.

⁴ Konak Indi-ge we tembet ondoso mende-ge nin tak nan tak worasu-t nde, Konak Indi iri-ge misiget nag-o.

⁵ Ndegel uburak mende-ge nin tak nan tag-et nde, Nagawan Indo-ge misiget nag-o.

⁶ Yabu wanugwi mende-ge arik tik arik tak worasu-t nde, Mbal Pem Nagawan misiget iri na-net ap pidsa enpem nggwe-nen pidsa wanusu-o.

⁷ It pidsa konak unpuwaklug-e, Konak Indi-ge inmin worasu-o luk nam makluk-nen Konak Indi-ge ondomok tak wok ondoso-o.

⁸ Konak Indi-nen-e ap misik wok tosolar-e, indi nggat nggat pem wene yoso iri wok tosolat, nde, Konak Indi misiget iri na-net nin nap wok tosolar-e, indi tenggerak pem wene yoso wok tosolat yusu-o.

⁹ Konak Indi misiget iri na-net ap misik wok tosolar-e, indi angin tubu yoso indi wok tosolat, nde, nin nap wok tosolar-e, ap ki rak unpurak amawi wok tosolat yusu-o.

¹⁰ Konak Indi-nen wok ondosolar-e, ap misig-e kwiye worak mende kwarurak amawi wok tosolat, nin nab-e Mbal Pem Nagawan-nen yidnak wene lomboksa yurak amawi wok tosolat, nin nap mbi-ge Konak Indi-nen idnak we wok ondoso mende min Konak Indi-nen wok indigit lak mende min mbenatluk yenggerak purak amawi wok tosolat yusu-o. Ap misik wok tosolar-e, nin wene nan wene bem yurak amawi wok tosolat, ap mbi-ge nin wene nan wene bem yidnak iri na nden yaga ndomoksa-t yurak amawi wok tosolat yusu-o.

¹¹ Alat nde, Konak Indi misiget iri na nak-net yu mende pidsa kwarusu-o. At indi-n pidnak pem-et we wok ondoso mende-ge enarik tak tembet undusu-o.

Ebe-ge misiget nag-et nde, ininggi unuwog-e kwarar-o 12:12-31

¹² Nde, enpe misiger-et nde, ininggi unuwog-e kwarar-o. Nde, ininggi unuwok na kwarar-et nde, enpe-ge misiger-o. Iri nggal Kerisut na ebe misiget-nen yusu-o.

¹³ Iri nggal-et, nit pidsa-ge Yawuri nap na irit, Yunani nap na irit, ndegel unpuwakluk onnggo pidnak nap na irit, weserak woragwi nap na irit, Konak Indi misiget iri-nen nit pidsa ebe misiget tak nenpeyekluk yi ma nonposola, nit pidsa-nen yi ninggidnak nggal Konak Indi misiget nak mak nondosola, nili-o.

¹⁴ Nde, ap enpe-ge ininggi unuwok misiget nak woraso bug-o. Alat nde, ininggi unuwok kwarat woraso-o.

¹⁵ Ujok-nen yosolar-e: ”An-e inggi-ge lak me, an-e ebe imin kundig-e lag-o” yosola-ge, ujok na-ge ndemeret ebe imin kundig-e lak-nen yusu-a?

¹⁶ Nde, eyanggo-nen yosolar-e: ”An-e erengen-e lak me, an-e ebe imin kundig-e lag-o” yosola-ge, eyanggo na-ge ndemeret ebe imin kundig-e lak-nen yusu-a?

¹⁷ Ebe pidsa nde erengen nak woralepnggal-nen-e nggesa-nen kuleleb-o? Nde, ebe pidsa nde eyanggo nak woralepnggal-nen-e nggesa-nen emben kaleb-o?

¹⁸ Alat nde, Mbal Pem Nagawan-nen at indi-n pidnak pem ininggi unuwog-e enpe bem arik tak posolar-e, un lombog-et pamu-o.

¹⁹ Nde, inggi ujok na misiget nak nggal-nen-e ebe-ge ngge me nde woraleb-o?

²⁰ Alat nde, yawo-ge ininggi unuwog-e kwarar-et nde, ebe-ge misiget nak-nen yusu-o.

²¹ Iri bem-e, erengen-nen inggi yak tosolar-e: ”Kar-e ukwe keberasu-ge lag-o” luk yak turag-e meya-o. Nde, anggul-nen ijok yak tosolar-e: ”Kar-e ukwe keberasu-ge lag-o” luk yak turag-e meya-o.

²² Are, ebe bem kundik woraso ininggi unuwog-e mondok amawi lag-et nde, iri na mondok ija-net yusu-o.

²³ Nit-nen peragolar-e, ininggi unuwok mbi-ge ebe lak mende rak pili-t nde, iri na-t kek tak pili-o. Nde, ininggi unuwok meya nggal iri-ge konak tak pili-o.

²⁴ Ininggi unuwok op nak woraso iri-ge meya rak uburag-e meya-o. Mbal Pem Nagawan-nen nit nenpe ndak worosolar-e, ininggi unuwok meya nggal iri na mondok kek tak uburak mende iri wok tij-o.

²⁵ Iri bem-e enpe iri ebem-nen kuri wat ma naru, ininggi unuwok arik tak iri-nen yongga yongga wolmakluk, irit pij-o.

²⁶ Ininggi unuwok misik nde andi ala-ge, ininggi unuwok erep pidsa-t andi yoso-o. Nde, ininggi unuwok misik nde kek tak obogola-ge, ininggi unuwok erep pidsa-nen enalin enalen kagwi-o.

²⁷ Yawo-ge kit oboksa-ge Kerisut ebe-nen yili-o. Nde, kit kenarik tag-e at inggi ujok-nen yili-o.

²⁸ Nde, Mbal Pem Nagawan-nen ap lambuk tak inpidnak ennggendumu ap pidsa onposolar-e: Nandug-er-e wirik inpidnak nap onposolat, imbirig-e, Mbal Pem Nagawan ene lomboksa yugwi nap onposolat, imbirig-e, ap mul undugwi nap onposolat, iri rak puruk imbirig-e, kwiye worak mende kwarugwi nap min ap ki rak unpurak amawi wok indidnak nap min yongga undugwi nap min enne kulugwi nap min nin wene nan wene bem yugwi nap min irit inpij-o.

²⁹ Nde, it iri pidsa-ge wirik inpidnak nap nag-a? It pidsa-ge Mbal Pem Nagawan ene lomboksa yugwi nap nag-a? It pidsa-ge mul undugwi nap nag-a? Pidsa-ge kwiye worak mende kwarugwi nap nag-a?

³⁰ Pidsa-ge ap ki rak unpurak amawi wok indidnak nap nag-a? It pidsa-ge nin wene nan wene bem yugwi nap nag-a? Pidsa-ge nin wene nan wene bem yidnak iri-ge nden yaga yugwi nap nag-a?

³¹ Iri ala-ge, we tembet ondoso mende mondok ija lombok iri wanuwokluk kenmawi kwender-o. Nde, an-e mondok konak tu-ge mul kindimin-o.