1 KORINTUS 11 - Nanduk Ngget Tul Pidnak Wene

¹ An-e Kerisut-nen kwaroso nggal kwarusu iri nggal kit-nen na an-nen kwaroso nggal kwarurag-o.

Kwami enanggul umuruk pugwi wene 11:2-16

² Kir-e pempa kinndi-nen yebet yebet tak woragolat, an-nen nggomo kindidnak wene wanogolat yili bem-e an-e kit kentembel wanusu-o.

³ Alat nde, wene yu-ge kit-nen kenaru yurak iri-ge nindingen-o: Ap pidsa enanggul-e Kerisut-nen yusu-o. Nde, kwe anggul-e un-nen yusu-o. Nde, Kerisut anggul-e Mbal Pem Nagawan-nen yusu-o.

⁴ Iri bem-e ap-nen anggulmbid pago-nen tepan yosolat, aid wene yosolat kwarosolar-e, at ambikpebe anggul Kerisut iri na mbilaro ngin tak pusu-o.

⁵ Nde, kwe-nen at anggul-e sum-nen tambirigit lak, we woralat-nen tepan yosolat, aid wene yosolat kwarosolar-e, at un na mbilaro ngin tak pusu-o. Nde, kwe iri-ge anggulsu labana kora wirik pidnak kwe nggal-nen yusu-o.

⁶ Nde, kwami-nen at anggul-e sum-nen tambirigit lak ala-ge, anggulsu mbaruwag-o. Nde, at anggulsu mbarak posolat, anggulsu labana wirik posolat momtag-e inggiri ala-ge, at anggul-e sum-nen lemerak puwag-o.

⁷ Ab-e Mbal Pem Nagawan ut mimirik nde, Mbal Pem Nagawan unu kek tak pugwi mende-nen yusu me, enanggulmbij-e purak pug-o. Alat nde, kwami-ge ap unu kek tak pugwi mende-nen yusu-o.

⁸ Ab-e kwe ebem-nen ndak worak pigit lag-et nde, kwe perak ap ebem-nen ndak worak pij-o.

⁹ Ab-e kwe amanggim ndak worak pidnag-e lag-et nde, kwe perak ap amanggim ndak worak pij-o.

¹⁰ Aid nap-nen kujwaklug-e, at un ene koloso yenggerak kujwakluk, kwe anggul-e sum-nen limirik wolmag-o.

¹¹ Irit nde, Nagawan Indo bem-e kwe-ge ap lak arig-et woraso bug-o. Nde, ap na kwe lak arik woraso bug-o.

¹² Nde, kwe-ge ap ebem-nen ndak worak pid iri na nggal-et ab-e kwami enarem-nen ndet inpili-o. Alat nde, yi mende ndi mende pidsa elem-e Mbal Pem Nagawan-net yusu-o.

¹³ Kondomok-net yebet ker-o: kwami-ge at anggul-e sum-nen limirik pigit lak-nen Mbal Pem Nagawan emengen mbarurag-e op, lak?

¹⁴ Ndak wiridnak tengge iri-nen mul kondosolar-e, ap anggulsu mot pare ala-ge, at ondomok mbilaro ngin tak pusu-t nde,

¹⁵ kwami anggulsu mot ala-ge, at kek tak uburak mende-nen yusu-o. Kwe anggulsu iri-ge anggulmbid pidnak nggal wolmakluk wok tidnak-nen yusu-o.

¹⁶ Alat nde, ta-nen nde wene yu eyak wururak indingen ala-ge, nit na irit, Mbal Pem Nagawan-nen idnak lambuk tak inpidnak nap na irit, nit-nen kwarugwi mende nin mbi worasu-ge lag-o.

Konak mende nonggolat meya kwarugwi wene 11:17-34

¹⁷ Yawo yak kindimin wene bem-e kit kentembel wanimin pug-o. Kit ndok witli-ge konak kwaruwokluk-nen ndok witli-ge lag-o. Meya kwaruwokluk-nen ndok witli-o.

¹⁸ Nanduk tak posolar-e, kir-e lambuk tak kinpidnak nap nggal ndok witli-t nde, kuri worak nggal-et worali-o yogola konpok kuligirik me, iri yidnak wene ereb-e ndemerer-o luk an-e perasu-o.

¹⁹ Nde, mot mot nak kwarugwi nap iri yenggerak iniyujwaklug-e, kit kennggenggerag-e kuri-t wat yusu-o.

²⁰ Kit-nen ndok witli-ge, Nagawan Indo-nen idnak konak mende nokluk ndok witli-ge lag-o.

²¹ Nunggwi mende nonggolar-e, it ondomok tak-nen unmburu-ge nili-o. Iri nggal kwarogolar-e, ap ereb-e nere woragolat, ereb-e amburu ndonggosa nuruk enanggul nden kasolat kwatli-o.

²² Kunmburu min kinid min norak kenambik kenma-ge lag-a? Are, Mbal Pem Nagawan-nen idnak lambuk tak inpidnak nab-e kinsili rak pogolat, enarengge lak nab-e innggiri rak purak yili-a? An-e no wene yak kindimin-o? Kit kentembel wanimin-a? Iri kwatli iri bem-nen-e an-e kentembel wanimin pug-o!

²³ Nde, an-nen yak kindigi wene na-ge, Nagawan Indo-nen yak niridnak wene iri-ge yu-o: Kubu nggwe at wesel uburak tarem Nagawan Indo Yesus-nen-e mburu wanuruk,

²⁴ Mbal Pem Nagawan wa yak turuk, ndeksa posolat-nen yosolar-e: ”Mburu yu-ge an nebe kit kenmanggim pidnak-nen yusu-o. Kir-e an yebet yebet tak worabok-nen an-nen kwarusu yu nggal kwarogolat wolmer-o” luk yij-o.

²⁵ Mburu nuruk, iri nggal-et yimbe wanosolat-nen yosolar-e: ”Yimbe arem kenanggo yu-ge an neyabi bem Mbal Pem Nagawan-nen ngget urul pidnak wene-nen yusu-o. Kir-e an yebet yebet tak worabok-nen nonggolat wolmer-o” luk yij-o.

²⁶ Nde, kir-e mburu yu min yimbe arem kenanggo yu min pempa-n nonggolar-e, Nagawan Indo wat yidnak wene-ge ap yak enderenak worakmu, at lobok yuwa-o.

²⁷ Iri bem-e, ta-nen nde mburu min Nagawan Indo-nen idnak yimbe kenanggo min yun munsa-t nasolar-e, Nagawan Indo ebe min eyab min meya rak pusu-o.

²⁸ Iri ala-ge, ap pidsa enambiktak-nen inndi mbenatluk-net mburu min yimbe arem kenanggo min-e nujwag-o.

²⁹ Nde, yu-ge ndemeret Nagawan Indo ebe-net yusu-o luk yebet kagit lak-nen mburu min yimbe arem kenanggo min nujwa nab-e, at ondomok are pusu-o.

³⁰ Iri kwatli bem-nen kit kennggendumu-ge ap kwarar-e enmawi lak yogolat, ud kondogolat yogolar-e, ap erep kwarat wat yogolat yili-o.

³¹ Nit-nen nde nondomok ninndi mbenarigenggal-e, nenare pelep pug-o.

³² Alat nde, nggweyak ma nap enpem wene mbarosolar-e, it inmin lambuksa nenpem wene mbaruwa naru, Nagawan Indo-nen-e angin worak mende nenpem pusu iri-ge mul nondosolat-nen yusu-o.

³³ Iri bem-e, nanggamirak wa-e. Kir-e mburu nokluk ndok worogolar-e, kennggamirak yik eneyarok woraruk, ndak ndak-net norag-o.

³⁴ Kit ndok witli iri-ge meya rak kunpurak pem ndok wurugup naru, ta-nen nde nere ala-ge, ama-nen nujwag-o. Nde, wene ereb-e an lobok yimindik-nen konimin-o.