1 KORINTUS 1 - Nanduk Ngget Tul Pidnak Wene

Wa yak indidnak wene 1:1-3

¹ Mbal Pem Nagawan Indi-nen pidnak pem wene mbo nebaga Kerisut Yesus-nen wirik inpidnak nap tak nibidnak an Paulus min nit nennggam Sotenes min-nen

² Mbal Pem Nagawan-nen idnak lambuk tak inpidnak nap kit Korintus worali nap, Kerisut Yesus ebem-nen marak kunpuruk wene mbo kenpaga mbek tak kinpidnak nap kenmanggim na irit, ap pidsa o nin me nin me worali nap-nen Nenagawan Indo Yesus Kerisut unu bem wene mbo bili nap enmanggim na irit, Nagawan Indo iri-ge nit Nenagawan Indo na irit, it Enagawan Indo na irit kenmanggim mbatli-o.

³ Nineid Mbal Pem Nagawan min Nagawan Indo Yesus Kerisut min-nen we wok ondoso elem min yamuksa woragwi elem min kenpem wolmag-o.

We wok nindidnak mende bem ”Wa” yidnak wene 1:4-9

⁴ Kerisut Yesus ebem Mbal Pem Nagawan-nen we wok ondoso elem na wok kindidnak pem, an-e pempa-nen Mbal Pem Nagawan ”Wiwa-o” yak toso-o.

⁵ Kerisut ebem-nen yi mende ndi mende winde rak konposolat, yi wene ndi wene yogolat, yi elem ndi elem kenaru yogolat yili-o.

⁶ Kerisut-nen yidnak wene kinggiridnag-e kit kinndi arem tugup lak worasu me-ge,

⁷ nit Nenagawan Indo Yesus Kerisut nam tak purak tarem yik karok woragolar-e, Konak Indi-nen we tembet nundusu mende marig-et nggal wanigit lag-o, mondok ndak irit wanigeb-o.

⁸ Yesus-nen tugup lak tak kinpidnak irit worakmu worok tak puwa tarem, nit Nenagawan Indo Yesus Kerisut-nen idnak Tarem-nen-e kenpem wene mbaruwa bug-o.

⁹ At Ambara Yesus Kerisut, nit Nenagawan Indo iri imin kundik worabokluk wene mbo kinpidnak Mbal Pem Nagawan iri-ge mot mot nak kwaroso-nen yusu-o.

Lambuk tak inpidnak nap ennggendumu kuri wat yidnak wene 1:10-17

¹⁰ Nanggamirak wa-e. Nit Nenagawan Indo Yesus Kerisut unu bem nggomo kundusu-o. Kir-e kinndi misiget nak worabokluk kuri wat wat woragup naru, lambuksa woragolar-e, kinndi misiget nak woragolat, wene misiget nak yebet kagolat wolmer-o.

¹¹ Nanggamirak wa-e. Kelowe ama woragwi nap erep-nen kit ngguno pogolat worali wene-ge nam-et nak yak niriga-o.

¹² Yu nggal yosolat-nen yigi-o: Kit kenarik tik kenarik tak-nen yogolar-e: ”An-e Paulus mende-o”, ”An-e Apolos mende-o”, ”An-e Peterus mende-o”, ”An-e Kerisut mende-o” luk yil mbitli-o.

¹³ Nde, Kerisut-e tembesa kunduwom tak pidnag-a? Paulus nde e lang pang tak pem kenmanggim wat yamu-a? Are, Paulus unu bem kir-e yi ma kinpiga-a?

¹⁴ An-e kit kennggendumu ap misiger-o luk tet yi ma inpigit lak me, Mbal Pem Nagawan na ”Wa” yak tusu-o. Kerispus min Nggayus min perak yi ma inpigi-o.

¹⁵ Iri bem-e kit misiger-o luk tet-nen yogolar-e: an neresa ”At unu bem yi ma nibij-o” luk yugup pug-o.

¹⁶ Alat nde, Sepanus ama woragwi nap perak nde yi ma inpigi-t nde, ap erep yi ma inpigi-ge kwara nindi yebet kasu bug-o.

¹⁷ Ap yi ma unpuwakluk Kerisut-nen wirik nibigit lag-o. Are, aid wene tumburuwakluk wirik nibij-o. Nde, iri-ge Kerisut e lang pang tak pem wiridnak iri na ebe lak mende ma naru, aid wene-ge ap inndi tenggerak-nen yugwi wene bem perak yak indigit lag-o.

Mbal Pem Nagawan indi tenggerak min nggweyak ma nap inndi tenggerak min wene 1:18-31

¹⁸ Kerisut e lang pang tak pem wiridnak wene na-ge it lak momtak tula mbitli nap-nen-e wid-nen yugwi wene nggal tak pili-t nde, nit ninmiri yurak tula mbitli nap-nen-e wene iri-ge Mbal Pem Nagawan amawi kwat yusu-o.

¹⁹ Mbal Pem Nagawan engga mbarak pem-nen yosolar-e: ”Inndi tenggerak nap-nen idnak inndi lid tak elem iri-ge an-nen lak tak pimin-o. Elem kwarat enaru nap-nen enaru yidnag-e mbereksa lak tak pimin-o” yij-o.

²⁰ Inndi tenggerak nab-e ngge me-o? Engga enaru nab-e ngge me-o? Nggweyak ma yu me-nen eyak wat wat kwarugwi nab-e ngge me-o? Nggweyak ma yu me-nen inndi lid tak elem iri-ge Mbal Pem Nagawan-nen wid tak pid na kali bug-a?

²¹ Mbal Pem Nagawan indi lid tak elem pem me, ap inndi lid tak elem iri na bem-nen at enaru momtag-e meya-o. Are, nit-nen yili wene, wid wene nggal tak pili yu bem inndi angin tubu yili nap iri perak nde Mbal Pem Nagawan-nen inmiri yurak peragaij-o.

²² Yawuri nap-nen perak nde ”Kwiye worak mende mul nender-o” yogolat, nde, Yunani nap-nen-e inndi lid tak elem kore yili-t nde,

²³ nit-nen-e Kerisut e lang pang tak pem wiridnak wene nak yili-o. Nde, nit-nen yili wene iri-ge Yawuri nap enambigir-e unuwok abis pijaksa mberak onposo kerep nggal yosolat, enlem nin nap enambigir-e wid-nen yugwi nggal yosolat yusu-t nde,

²⁴ Yawuri nap na irit, enlem nin nap na irit, Mbal Pem Nagawan yonggo inpidnak nap enmanggim-e wene yu-ge Kerisut Mbal Pem Nagawan amawi min Mbal Pem Nagawan indi lid tak elem min at-net yusu-o.

²⁵ Nggweyak ma nap inndi lid tak elem iri-ge teberag-o. Alat nde, Mbal Pem Nagawan wid nggal tak pili iri-ge at indi lid tak elem-e terak minik kek tak-nen yusu-o. Nggweyak ma nap enmawi-ge teberag-o. Alat nde, Mbal Pem Nagawan ndeyak woraso mende iri-ge terak minik amawi-nen yusu-o.

²⁶ Nanggamirak wa-e. Mbal Pem Nagawan-nen yonggo kinpid tarem kit nanduk woraigep na kinndi yebet ker-o. Nggweyak ma nap-nen yik kagwi mende bem-e kit kennggendumu-ge inndi nggat nggat worak nab-e kwarat woragit lag-o. It enne nak kulugwi na kwarat woragit lag-o. Ap unnu kek tak na kwarat woragit lak irir-o.

²⁷ Alat nde, inndi tenggerak nap na innggiri wuruwaklug-e, Mbal Pem Nagawan-nen nggweyak ma yu me wid woragwi irit len inpij-o. Nde, enarong worak nap innggiri wuruwaklug-e, Mbal Pem Nagawan-nen nggweyak ma yu me ndeyak woragwi irit len inpij-o.

²⁸ Nggweyak ma yu-ner ebe worak yik kagwi mende na lak takpuwaklug-e, Mbal Pem Nagawan-nen unnu teberak mende min ap-nen no mende nggal yik kagwi min ebe lak mende min irit len inpij-o.

²⁹ Iri bem-e, ap misiger-o luk tet Mbal Pem Nagawan imbiri bem at ondomok indi kek tak purag-e meya-o.

³⁰ Alat nde, Mbal Pem Nagawan ebem-e Kerisut Yesus imin kundik kinpidnak worali-o. Kerisut iri-ge Mbal Pem Nagawan-nen-e nit ninndi tenggerak elem tak obosolat, at ebem-et mot mot tak nonposolat, mbek tak nonposolat, nonnggo paga weserak nonposolat yij-o.

³¹ Iri ala-ge, Mbal Pem Nagawan engga mbarak pem-nen yosolar-e: ”Ta-nen nde indi kek tak posolat ala-ge, Nagawan Indo ebem-net indi kek tak puwag-o” luk yij-o.