1 NAGAWAN NAGAWAN-NEN KWARIDNAK WENE 9 - Nanduk Ngget Tul Pidnak Wene

Salomo imbiri bem Nagawan Indo tuguruk nam yidnak wene 9:1-9

¹ Salomo iri na-ge at-nen ”O iri nggal-et wirimin-o” luk arem ngarak puruk woraso ereba na Nagawan Indo uwi min nagawan wolmomtak sa min o erep min-et worak puruk ombol nggwe-ge

² nanduk Nggibeon-nen imbiri bem nam yid iri na nggal-et Nagawan Indo-ge tuguruk Salomo imbiri bem nam yij-o.

³ Nagawan Indo-nen at yak tosolar-e: ”Kat-nen tepan yigen-e kuligi-o. Iri bem-e o kat-nen wirigen yu-ge pempa an nerembel wanogolat wolmomtak uwi irit lenak pigi-o. Nde, o yu-ge an-nen kwara yik karok woralat, ndogorosolat woramin-o.

⁴ Kat nde an ndegel nobosolat, keid Ndaut-nen kwarosolat woragid nggal-et ndemeret kindi min-et mot mor-et kwarosolat, an-nen idnak imiri mbarak pidnak wene-nen yidnak yidnak kwarosolat, kwarurak kebem pidnak ndak ndak kwarosola-ge,

⁵ an-nen keid Ndaut urul yak tosolar-e: ’Kat-nen wigarak lolo nak-nen Isarael nap tena unpuruk wolma-o’ luk yak tigi iri na-ge kwarag-et kinpimin-o.

⁶ Alat nde, kat min kat-nen wigarak min-nen nde kenmberam nggwe rak nobogolat, an-nen idnak imiri mbarak pidnak wene min an-nen kwarurak kenpem pidnak ereba na min kwarigit lak, kugwiwak erembel wanogola-ge,

⁷ an-nen-e nilirak Isarael nab-e an-nen wok indigi o yu me-nen sera wirik inpimin-o. Kat-nen an nerembel wanurak lenak pigen o yu na keya-t pimin-o. Iri yumu, nin me nan me ereba oboksa-nen Isarael nab-e sit mbit tak woragola, ap-nen pesel konpogolat, nda kondogolat wolma-o.

⁸ Nde, an nerembel wanugwi o yu-ge tud yosolat kerep nak nggilara labuk yuwama, ap tu yu nggwe mbitlik lobok lik yogolar-e, wendet luk, unmunggum pil kagolat-nen yogolar-e: ’Noluk-nen Nagawan Indo-ge o yu oboksa min at uwi yu min-et yu nggal kwarak pij-o?’ luk yuwa-o.

⁹ Iri yogola, ap-nen onggo yogolar-e: ’Nagawan Indo it Enmbal Pem Nagawan nanduk onmborak Mesira-nen lit unpuruk lobok yid iri na keya buruk, kugwiwak erembel wanogola karuk-nen Nagawan Indo-nen lak tak onposo mende yu-ge it enpem pil lobok yamu-o’ yuwa-o” luk yak tij-o. 9:10-28 Ayat yeba arem-e Salomo-nen Tirus nagawan Iram imin kundik woragid wene min at-nen-e at-nen wirid o kwarat ereba na wuruwakluk at ene amawi bem-nen watsa yabu ereba ap enpem pidnak wene min mbarak worasu-o.