1 NAGAWAN NAGAWAN-NEN KWARIDNAK WENE 8 - Nanduk Ngget Tul Pidnak Wene

Nagawan Indo-nen idnak urul pidnak wene labu mbarak iri na Nagawan Indo uwi iri na me pil mbiridnak wene 8:1-13

¹ Iri rak purug-e, Nagawan Salomo-nen-e Iserael nap enlem lombok-nen enne kulugwi nap ereba na oboksa-nen Ndaut woraso sa o siri Sion iri me-nen urul pidnak wene labu mbarak iri na-ge waga Nagawan Indo uwi iri na me pil mbururak at eram Yerusalem lobok yuwakluk yonggo inpij-o.

² Iri yamu-ge O Lije E Sit Kere Sit worogolat nggok Sakwi Tarem waneya unu-ge Etanim iri na bem-e Salomo eram lobok yiga-o.

³ Nde, Isarael nap enlem lombok-nen enne kulugwi nap ereba na ndok worogola karug-e, it tepan ombo-nen-e urul pidnak wene labu mbarak iri na-ge kud tiga-o.

⁴ Kud turuk mbirigarik, Nagawan Indo uwi iri na me waruk mbiriga-o. Iri yogolar-e, Nagawan Indo uwi sum-nen wiridnak o lije iri na min-et iri me-nen kwarugwi murugwi oboksa min-et tepan omborak min Lewi nap min-nen-e Nagawan Indo uwi iri na me pil mbiriga-o.

⁵ Waruk lobok yikma-ge, Nagawan Salomo min Isarael nap oboksa min-e urul pidnak wene labu mbarak iri na eralu ndok worogolar-e, sapi min lomba min mondok kwarat wonarurak puk irit Nagawan Indo amanggim piga-o.

⁶ Iri rak purug-e, tepan ombo-nen-e urul pidnak wene labu mbarak iri na-ge Nagawan Indo uwi iri na arem waruk nggwigarik, O Mondok Marak Sa iri na me aid nap kerup ndak worak indipma parosa piga-o.

⁷ Nde, aid nap kerup ndak worak isiyamu ereya na-nen-e urul pidnak wene labu mbarak iri na min tena buruk kud turuk mburugwi e iri na min anggul pem lumusa wosarak woragij-o.

⁸ Tena buruk kud turuk mburugwi e ereya-ge mondok mot pare me, O Mondok Marak Sa iri na nggogolat tumende bem-nen-e ereb-e nam yik kagwi-o. (Nde, yawo-nen na e ereya-ge iri me-t worasu-o.)

⁹ Nde, urul pidnak wene labu mbarak iri arem-e mondok nin nan-e yarak pigit lag-o. Are, imiri mbarak pidnak wene mbarak kerep mberen Isarael nap Mesira wi-nen Kanaan wi mborogola, Nagawan Indo-nen inmin kondosolat urul yak indidnak wene mbarak kerep mberen Musa-nen Sinai Ndobo bem-nen yarak pid ereya na nak yarag-o.

¹⁰ Nde, tepan ombo ereba na Nagawan Indo ama-nen wakmu-ge, mimo irit o iri na arem-e nggan nggan-nen yebet yij-o.

¹¹ Nde, Nagawan Indo worasolar-e, at eyaya-nen nggan nggan na-ge abinal worak yij-o. Iri yosola-ge, tepan ombo-ge tuguruk eneyabu erep wil nggurag-e meya agaij-o.

¹² Iri ala karuk, Salomo-nen tepan yosolat-nen yosolar-e: ”Nagawan Indo wa-e. Kat-net mo-ge mbal pem pigenma-o. Kar-e nggan nggan mom kirak arem nak wolmomtak peraso-t nde,

¹³ Yawo an-nen-e kat-nen pem irit wolmomtak o kwiye worak yu wirigi-o” yak tij-o.

Nagawan Salomo-nen Isarael nap yak indidnak wene 8:14-21

¹⁴ Tepan yosoluk yarig-e, Salomo na nden karuk Isarael nap oboksa iri me mendak worali ereba na yik eneyagaij-o. Yik eneyarug-e, imbiringgat tak unpuwakluk Mbal Pem Nagawan emengen mbarij-o.

^15-16 Iri yosolat-nen yosolar-e: ”Nagawan Indo-nen an neid Ndaut urul yak tosolat-nen yosolar-e: ’Nanduk an nilirak Mesira-nen wesera inmin lobok yosolar-e, Isarael woragwi sa oboksa-nen o siri misik me an nerembel wanurak o wururak mbi lenak pigit lak yigi-t nde, Ndaut kar-e an-nen nilirak tena unpuruk woranokluk lenak kubukmu-o’ luk yid iri na-ge at-nen urul pidnak ndak ndak tak pid iri bem-e Nagawan Indo Isarael nap Enmbal Pem Nagawan iri nak erembel wanurag-o!” luk yij-o.

¹⁷ Yosoluk erep min-et Salomo-nen yosolar-e: ”An neid Ndaut-nen-e Nagawan Indo Isarael nap Enmbal Pem Nagawan amanggim at erembel wanurak o wururak yij-et nde,

¹⁸ Nagawan Indo-nen at yak tosolar-e: ’An nuwi wururak yebet kasu iri-ge konag-et yebet kaigen-et nde,

¹⁹ iri-ge kat-nen wururag-e lag-o. Kat kambik kambara-net wuruwa-o’ yak tij-o.

²⁰ Nde, yawo-nen-e Nagawan Indo-nen yid iri na ndak ndag-et kwat yosolat an-e neid ondolma Isarael nap ennggendumu nagawan men yigi-o. Iri yosolat Nagawan Indo Isarael nap Enmbal Pem Nagawan erembel wanurak uwi wirigi-o.

²¹ Nde, nanduk Nagawan Indo-nen nonmborak Mesira-nen wesera wok unpuruk lobok yosolat, it inmin kondosolat-nen urul pidnak wene iri na mbarak kerep iri na yarak labu mbarak iri na ondoro lid lud tak pigi-o” luk yij-o.

Salomo-nen tepan yid wene 8:22-53

²² Iri yosoluk yarig-e, ap ndok wiriga ereba na inmbiri bem Salomo na-ge Mbal Pem Nagawan amanggim wosa kan pugwi iri na me menluk inggi mberen ligik puruk-nen

²³ tepan yosolar-e: ”Nagawan Indo Isarael nap Enmbal Pem Nagawan wa-e. Mbal pem-nen na irit, nggweyakma-nen na irit kat nggal mbi misik worasu bug-o! Kar-e kilirak inndi misiget tak puruk, tugup lak kat-nen yidnak yidnak kwatli nap enabuwa kasolat, kat-nen urul yak indidnag-e ndak ndak nak kwat onposo-o.

²⁴ Kat-nen an neid Ndaut urul yak tigen-e ndak ndag-et kwarigen-o. Nde, kat-nen urul pigen-e yawo-nen kwarigen yur-o.

^25-26 Nde, misig-e kat-nen an neid urul yak tosolar-e: ’Kat-nen wigarak-nen nde kat-nen kwaroso nggal ndemeret an-nen yidnak yidnak kwarosola-ge, kat-nen wigarag-e pem irit Isarael nap enanggul pem nagawan men yik tenak wolma-o’ yak tigen-o. Iri yigen iri na-ge Nagawan Indo Isarael nap Enmbal Pem Nagawan wa-e. Kat-nen ndegel koboso nap an neid Ndaut yak tigen iri na yawo ndak ndak tak pi-o.

²⁷ Alat nde, Mbal Pem Nagawan wa-e. Kar-e ndemeret nggweyakma yu me ndak woragun, lak? Mbal pem oboksa-t nde kat wolmomtak kondoro-ge meya yusu yu-t nde, kat kerembel wanurak uwi an-nen wirigi yu arem-e nggesa-nen ndak woragun-o?

²⁸ Nagawan Indo Nembal Pem Nagawan wa-e. An-e ndegel koboso nap-nen yusu-o. An-nen tepan yusu yu kuli-o. An-nen nggi yak kurusu yu-ge yawo-t nene erep nggari-o.

^29-30 Kat-nen kat kerembel wanurak uwi kat-nen lenak pigen yu-ge kubu-nen lengge-nen kwara yik karok wolmin-o. Nde, an min kat kilirak min-nen nde nenanggul o yu ambigit ndimirik puruk, tepan yogola-ge, kat woraso sa aid arem-nen nenne kuluruk, nit-nen kimin meya kwarugwi-ge kamberam tak pi-o.

³¹ Ap misik-nen nde ap misik imin meya kwaramu-o luk yogola-ge, ’An iri kwarigit lag-o’ luk owak mbarurak pem-e kat kerembel wanugwi sa o yu arem Mbal Pem Nagawan amanggim kan pugwi sa eralu waruk lobok yogola-ge,

³² Nagawan Indo wa-e. Kat ndegel kubugwi nap enpem wene mbidnag-e kat-nen aid arem-nen kuluruk, ndemeret meya kwaridnak ala-ge, at-nen kwaridnak ndak ndag-et angin worak ebem posolat, nde, meya kwarigit lak ala-ge, keya uburag-o.

³³ Kat kilirak Iserael nap nde it-nen meya kwaridnak pem wim nap-nen urugwe nggwe rak onpogola, tuguruk kat keram lobok yogolat: ’Kar-e nit-nen idnak Nagawan Indo-nen yusu-o’ luk kat kek tak kuburuk, kat kerembel wanugwi o yu me lobok luk, ’Nit meya yidnak kamberam tak pi-o’ luk kemengen mbarogola-ge,

³⁴ kat-nen-e aid arem-nen enne kulurag-o. Kat kilirak-nen meya yidnag-e kamberam tak purug-e, kat-nen wok unpuruk, kat-nen onmborak wok indigen o yu tuguruk wok unpuruk lobok yi-o.

³⁵ Nde, kat kilirak-nen nde kat kimin meya yogola, kat-nen angin worak enpem posolat, talme mberak pigit lak yosola, it nde kondok yogola-t nde, ’Kar-e nit-nen idnak Nagawan Indo-nen yusu-o’ luk kat kek tak kobogolat, kat kerembel wanugwi o yu ambigit enanggul ndimirik puruk tepan yogola-ge,

³⁶ kar-e aid arem-nen it enne kuli-o. Kuluruk, kilirak Iserael nap min it-nen idnak nagawan min-nen meya yidnag-e kamberam tak inpi-o. Kat-nen it-nen ndemeret mot mot kwarurak irit mul indi-o. Iri rak unpurug-e, Nagawan Indo wa-e. Kilirak-nen pem irit ombo wolmakluk wok indigen kuwi nggweyak yu me talme mberak purag-o.

³⁷ Nde, yu me nde nere mbud yosolat, kugwilare mbud yosolat, yagidnak mende mo eyak-nen woraga keya bosolat, sil-nen lak tak posolat, kilirak wim-nen enpem kore yogolat, kugwi enpem mbud yosolat kwarosola-ge,

³⁸ it-nen tepan yuwa-ge kat-nen kulurag-o. Nde, kat kilirak Isarael nap ennggendumu-nen nde ininggi kat kerembel wanugwi o yu ambigit ndimirik puruk inndi puru min-et kat kemengen mbarogola-ge,

³⁹ kat woraso sa aid arem-nen kuluruk, it meya yidnak kamberam tak posoluk yongga indi-o. Ap enarem-nen yebet kagwi oboksa-ge kat karig-et nak karu-o. Iri bem-e ap ondomoktak-nen kwarugwi ndak ndag-et kwat onposolat wolmin-o.

⁴⁰ Kat-nen nit nonmborak wok indigen o yu me pem woragolar-e, kat kilirak-nen-e kat-nen yidnak yidnak kwaruwakluk, iri kwat unpurag-o.

^41-42 Woragolat yeba nde elem nin nap erepma-nen kat-nen ndemeret mot mot kwaroso min kat-nen kwiye worak kat kilirak enmanggim kwaroso min ereba na kuluruk, o kat kerembel wanugwi yu me lobok yuwarik, kat kek tak kobosolat, kat keram tepan yosola-ge,

⁴³ kar-e kat woraso sa aid arem-nen kuluruk, at-nen tepan yuwa-ge ene erep nggari-o. Iri nggal kwarosola-ge, yi nap ndi nap yi wi ndi wi worali oboksa-nen kat enaru luk, Isarael nap-nen kwatli nggal kat-nen yidnak yidnak kwarogolat, it-nen-e an-nen wirigi o yu-ge ndemeret Mbal Pem Nagawan kerembel wanurak uwi-t woramu-o luk enaru ma-o.

⁴⁴ Kat-nen kilirak wim timbiril mberer-o yak undugunmu, mburuwarik ereba ma-nen tepan yogola-t nde, kat-nen lenak pigen o siri yu ambigit unlugwe nirik puruk, an-nen kat kamanggim wirigi o yu ambigit tepan yogola-ge,

⁴⁵ aid arem-nen kar-e it-nen tepan yidnak kuluruk, kat-nen ombol nggwe rak inpi-o.

⁴⁶ Ab-e meya kwarigit lak konak nag-e woragwi buk me, kat kilirak-nen nde meya kwarogola-ge, kat kisilepma luk keya unpugunmu, wim nap-nen urugwe nggwe rak unpuruk, kugun wok unpuruk erepma ala na irit, koroga ala na irit wok unpuruk mburuwarik woragola-ge,

⁴⁷ kat-nen-e it-nen tepan yuwa-ge kulurag-o. Nde, inmin mburuwarik wolma sa iri me woragolat-nen nde it meya kwaridnak keya buruk, kondok yogolat-nen nde kat keram tepan yogolat: ’An-e ndemeret meya-t kwarigi-o’ luk para yogola-ge, Nagawan Indo wa-e. It enne-ge kulurag-er-o.

⁴⁸ Nde, it inmin mburuwa sa iri na me woragolat-nen nde ’An meya kwaroso yu-ge keya-t peyeg-o’ peraruk-nen nde ndemeret keya buruk, kat keram tepan yogolat, kat-nen nonmborak wok indigen o yu me o siri kat-nen linigen yu min kat kerembel wanurak an-nen wirigi o yu min ambigit unlugwe nirik puruk tepan yogola-ge,

⁴⁹ kat-nen-e kat woraso sa aid arem-nen it-nen tepan yuwa-ge kuli-o. Kulurug-e enabuwa-t ki-o.

⁵⁰ Enabuwa karug-e, it-nen kimin meya yidnak min kimin eyak wurugwi min-e kamberam tak onposolat, it unuwim nap-net nde, it konak kwat unpugwi nap tak inpi-o.

⁵¹ Nde, it iri-ge it anggun panggun tak inpiga sa Mesira-nen lesa wok unpuruk lobok yigen kondomok kilirak-nen yili-o.

⁵² Nagawan Indo Mbal Pem Nagawan wa-e. Kat kilirak Isarael nap min it-nen idnak nagawan min kwara yik eneyarok wolmin-o. It-nen pempa ’Yongga nindi-o’ luk keram nggi yogola-ge, kat-nen enne nggarosolat wolmin-o.

⁵³ Nagawan Indo wa-e. It iri-ge kat-nen nit nonmborak Mesira-nen lit unpuruk lobok yosolat, kat-nen it yak ondosolat, ndegel koboso nap Musa emendam tak pigen iri na ndak ndag-et ap enlem oboksa ennggendumu-nen kat kilirak tak enpeyekluk len inpigenma-o” luk tepan yij-o.

Inmbiringgat tak posolat tepan yidnak wene 8:54-61

⁵⁴ Salomo-nen Mbal Pem Nagawan amanggim kan pugwi eralu endaru yunggusa koreluk inggi teram nggwe ligik puruk tepan yu nggal yosolug-e, men yij-o.

⁵⁵ Men yosolar-e, ap oboksa iri me ndok wiriga ereba na inmbiringgat tak unpuwakluk ene nggoksa Mbal Pem Nagawan emengen mbarosolat-nen yosolar-e:

⁵⁶ ”Ndegel oboso nap Musa emendam tak posolat urul yid iri na ndak ndag-et yamuksa wolmomtak elem ilirak wok indid Nagawan Indo nak erembel wanurag-o. Nde, at-nen konak mende urul pij-e oboksa kwaramu-o.

⁵⁷ Nagawan Indo Nenmbal Pem Nagawan-nen nanduk nonmborak inmin woraso iri na nggal-et, keya ninpigit lak ninmin irit wolmag-o.

⁵⁸ Nit-nen pempa at indi-n pidnak kwarogolat, at-nen imiri mbarak pidnak wene oboksa min kwaruwakluk nonmborak enpem pidnak wene min kwarogolat wolmok-nen nir-e tugup lak at-nen yidnak yidnak kwarugwi nap tak nunpuwag-o.

⁵⁹ Nagawan Indo Nenmbal Pem Nagawan-nen-e an-nen at eram tepan yosolat at ebem nggi yosolat yusu yu min indi yebet yebet tak wolmag-o. At-nen-e at indi konak pem at ilirak Isarael nap min it-nen idnak nagawan min-nen pempa ukwe peragwi mende-ge wok ondosolat wolmag-o.

⁶⁰ Iri nggal kwarosola-ge, yi nap ndi nap oboksa-nen-e: ’Nagawan Indo-ge at arig-et nak Mbal Pem Nagawan-nen yusu-o. Mondok nin mbi worasu bug-o’ luk enaru yuwa-o.

⁶¹ At ilirak kit oboksa-ge Nagawan Indo Nenmbal Pem Nagawan-nen yidnak yidnak yawo kwatli yu nggal-et at-nen imiri mbarak pidnak wene min at-nen kwarurak nenpem pidnak wene min iri na pempa kwarugwi nap irit wolmer-o” luk yij-o.

O wiridnak iri na Nagawan Indo amanggim lenak pidnak wene 8:62-66

⁶² Iri rak purug-e, Nagawan Salomo min Isarael nap oboksa ndok wiriga inmin-e Nagawan Indo amanggim wam wosa piga-o.

⁶³ Nagawan Indo imin kondosolar-e, Salomo-nen-e sapi-ge 22.000 min lomba 120.000 min irit worarig-e, Isarael nap oboksa min nagawan min-nen-e Nagawan Indo uwi iri na silo nggok saiga-o.

⁶⁴ Iri na tarem-et Salomo-nen-e Nagawan Indo uwi iri na tumende bem enggendumu ondoro misik iri na me-ge arik lenak pij-o. Iri rak purug-e, iri na me Mbal Pem Nagawan amanggim ebis-et kan pugwi min nggandum mbato min Nagawan Indo imin kondogolat wam wiridnak ereba na omok min oboksa-ge Nagawan Indo amanggim posid perunggu-nen konidnak kan pugwi sa iri na-ge ondoro marik ala karuk, ondoro tumende enggendumu iri na me kan pij-o.

⁶⁵ Nde, Nagawan Indo uwi iri na arem-e Salomo min Isarael nap oboksa min irit E Sit Kere Sit Uwi Wiridnak Tarem yebet kagolat, tuju tarem woraiga-o. Nde, ap iri me ndok wiriga-ge enpe-ge mondok kwarat ndok wiriga-o. Nde, it iri-ge o erepma-nen lobok yogolar-e, abare abam (utara) nggwe Amat Mburugwi Tula-nen kundugu mberarik, abare ena nggwe (selatan) Mesira kuri-nen ndok wiriga-o.

⁶⁶ Iri kwarogolat tuju bem nggok sakolat worarug-e, delapan pem tak pogolar-e ap ereba na-ge Salomo-nen-e ”Kenma mberer-o” yak endamu, mbiriga-o. Mborogolar-e, it oboksa-nen Salomo kek tak puruk, inndi alen min-et enma lombok mbiriga-o. Salomo kek tak piga iri-ge Nagawan Indo-nen at imbiringgat oboksa at ndegel oboso nap Ndaut min Isarael nap min wok indidnak pem-nen kwariga-o.