1 NAGAWAN NAGAWAN-NEN KWARIDNAK WENE 6 - Nanduk Ngget Tul Pidnak Wene

Salomo-nen Nagawan Indo uwi wiridnak wene 6:1-13

¹ Salomo-nen Nagawan Indo uwi wirij-e, Isarael nap Mesira-nen wesera lobok yigarik, olengen empat ratus delapan pulu (480) woraruk ombol nggwe, Salomo nagawan men luk olengen empat worarug-e, waneya mberen tak pogolar-e, waneya unu-ge Sip iri arem-nen o iri na-ge woroso tel kwirij-o.

² Nagawan Indo uwi iri na arem nggwe ndak wurugwi mende meter bem ndak wiriga-ge yu nggal-o: mot nggwe-ge 27 meter, nde, wigak tak nggwe-ge 9 meter, nde, teram kek tak nggwe-ge 13,5 meter irit ndak wiriga-o.

³ Nde, Nagawan Indo uwi iri erep kundik tumende ambigit nggwe ndak wiriga-ge mot nggwe-ge 4,5 meter, nde wigak tak nggwe 9 meter irit ndak wiriga iri-ge o ebe iri na wigak tak nggwe ndak ndak irir-o.

⁴ O iri na kebet pem eyaya nggurak uru pilil lobok yiga-o. Nde, uru ereba-ge mbepme nggwe-ge marik tak pogolar-e, ma nggwe nggok tak pil lobok yiga-o.

⁵ Nde, o iri na inggi inggi-ge erep konda ombol nggwe o kune kenan irit wiril laiga-o. Nde, o kune kenan ereya na mot nggwe-ge oboksa ndak ndak nak 2,2 meter nag-o.

⁶ Nde, nggweyak ma kuri wiril lobok yiga-ge oboksa-nen wigak tak nggwe-ge 2,2 meter irit wiril laiga-o. Nde, abam silabaga iri me kuri wiril lobok yiga-ge wigak tak nggwe-ge 2,7 meter irit wiril laiga-o. Nde, silabaga maksa teram iri na-ge kuri wiril lobok yiga iri na-ge wigak tak nggwe-ge 3,1 meter irit wiril laiga-o. Nde, kebet nggweyakma nggwe-ge mambu rak pogolat, abam nggwe-ge lep lep tak piga-o. Iri rak pogolar-e, o silabaga ereba na ugwi pogolar-e, o iri na kebet uru piligit lag-o. Are, ebem nak ludsa pil lobok yiga-o.

^7-10 Nde, o owak ereba-ge e Libanon-nen wanidnak ereba na bem wiriga-o. Nggweyakma nggwe nde, o eralu nambena wiridnak ereba na arem nggwe tumende nde abare ena nggwe (selatan) pil lobok yiga-o. Nde, silabaga enggendumu min abam iri na min lorag-e tu mbera piga-o. Iri rak purug-e, Salomo-nen-e arem nggwe teram-e kona panggara nenasa keya bij-o. Nde, iri rak purak pem-e e Libanon-nen wanidnak libe ereba na min-nen-e o iri na-ge muruksa wirij-o. Nde, o iri na ene lo lak wiriga iri-ge, kereb-e ndobo arem-nen yala wanogolat-nen iri me-nen mondok abu kona lid lud tak pidnak me, waga nak worogolar-e ndonggwid min ije min o wurugwi mende posid-nen konidak erep min-e ene lo lak irit wiriga-o. Nde, iri nggal kwasa Salomo-nen Nagawan Indo uwi iri na-ge wutluk iminep mbarak pij-o.

¹¹ Worak posoloma, Nagawan Indo-nen Salomo yak tosolar-e:

¹² ”Kat-nen nde an-nen imiri mbarak pidnak wene min an-nen ’Irit kwarurag-o’ luk kebem pidnak wene min oboksa-nen yidnak yidnak kwarosola-ge, an-nen-e kat keid Ndaut urul yak tigi iri na ndak ndag-et kwat kibimin-o.

¹³ An nilirak Isarael nap ennggendumu kat-nen nuwi wirigen iri arem-et woramin-o. An-e ir-e mondok keya inpimin pug-o” luk yij-o.

Nagawan Indo uwi iri na arem pidnak wene 6:14-38

¹⁴ Salomo-nen Nagawan Indo uwi iri na worak purug-e, iminep mbarak posolar-e, yu nggal kwarij-o:

¹⁵ Kebet arem nggwe-ge e libe Libanon-nen waruk lobok yidnak ereba na bem panggara worosolar-e, kune-nen kundugu teram nggwe min-et nenasa panggarij-o. Nde, kune-ge e erep nggarak-nen konij-o.

¹⁶ Nde, o iri na arem-e o kuri worak pogolar-e, e Libanon-nen waruk lobok yidnak ereba na-nen nggweyakma-nen panggara pil laruk, o iri na kuri wosa mberen tak pij-o. Nde, o kuri worak pidnak arem misik iri na unu-ge o kuri worak Mondok Marak Sa irit yarij-o. Nde, o iri-ge mot nggwe ndak worag-e 9 meter irir-o.

¹⁷ Nde, o kuri worak tumende ambigit nggwe iri-ge mot nggwe ndak wiriga-ge 18 meter-o. Nde, unu-ge O Kuri Worak Nggok irit yariga-o.

¹⁸ Nde, kebet arem nggwe oboksa-ge e libe Libanon-nen waruk lobok yidnak ereba na bem-nen panggara worosolat, kebet kerep-nen wiridnak iri na-ge panggara lumurak irit woragij-o. Nde, kebet arem nggwe mendaiga ereba na bem-e nagamburu min engen isi nggeret kopsoroso min ndak wosa piga-o.

¹⁹ Nde, Nagawan Indo uwi O Mondok Marak Sa kuri worak iri na me-ge Nagawan Indo-nen idnak urul pidnak wene labu mbarak iri na purak ondoro lid lud tak piga-o.

^20-22 Nde, o kuri worak iri-ge mot nggwe na irit, wigak tak nggwe na irit, mot teram nggwe na irit, mondok ndak ndak 9 meter nag-o. Nde, O Mondok Marak Sa iri na nggugwi sa tumende bem-e Nagawan Indo amanggim kan purak ondoro konogolar-e, e libe Libanon-nen waruk lobok yidnak iri na bem-nen koniga-o. Nde, o iri nggugwi tumende-ge emas-nen konidnak kere-nen panggara mberak piga-o. Nagawan Indo uwi iri na arem nggwe oboksa O Mondok Marak Sa iri na min Nagawan Indo amanggim kan pugwi min iri na oboksa emas-nen muruk til lobok yiga-o.

²³ Nde, O Mondok Marak Sa iri na me-ge e saitun pem konidnak aid nap kerup insiyamu worak ut memera ndak worak mberen iri na piga-o. Nde, ereya ndak worag-e mot nggwe-ge 4,4 meter irit konidnag-o.

^24-26 Nde, aid nap ndak worak mberen ereya-ge ebe min abage min-e ndak ndak nag-o. Insiyamu na mberen worak. Nde, insiyamu ereba na mot nggwe-ge 2,2 meter-o. Nde, at misik isiyamu wok at misik isiyamu wok yobok tak terak iri wigaktak nggwe ndak worag-e 4,4 meter-o.

²⁷ Nde, aid nap kerup ndak worak mberen ereya na-ge unlugwe misik nggwe nak O Mondok Marak Sa iri na me piga-o. Nde, insiyamu ereb-e kebet pem ndurum tag-o. Nde, insiyamu ponok nggwe-ge misik isiyamu abi min kundij-o.

²⁸ Nde, aid nap kerup ndak worak mberen ereya na-ge emas-nen mbeyoksa keya bidnag-o.

²⁹ Nagawan Indo uwi iri na arem nggwe-ge kebet pem oboksa aid nap kerup min kelapa ari nggal min engen isi nggeret kopsoroso min ndak wosa pil lobok yiga-o.

³⁰ Nde, Nagawan Indo uwi iri na kune oboksa-ge emas-nen muruk tak piga-o.

³¹ Nde, o kuri worak Mondok Marak Sa iri na tumende-ge e saitun-nen konidnak embet abak mberen-nen kona lerak piga-o. Nde, tu-ge enggendumu-nen kuwarugwi-o. Nde, tumende ambanggo abam nggwe-ge wangget yaga pogolar-et nde, enggendumu-ge anggat kela piga-o.

³² Nde, tumende embet mberen iri na bem-e aid nap kerup min kelapa ari nggal min engen isi nggeret kopsoroso min ndak wosa piga-o. Iri rak puruk, tumende embet mberen ereya na min aid nap kerup ndak worak min kelapa ari nggal ndak worak min iri na-ge ombol nggwe-ge emas pem-nen mbeyok tiga-o.

³³ Nde, o Kuri Worak Nggok iri na me nggugwi tumende-ge inggi inggi-ge e saitun pem-nen konogolat, unggut empat worak irit koniga-o.

³⁴ Nde, tumende mberen e libe-nen konidnak ereya-ge yunggurugwi-o.

³⁵ Nde, tumende ereya bem-e aid nap kerup min kelapa ari nggal min engen isi nggeret kopsoroso min ndak worak piga ereba na oboksa-ge emas-nen mbeyok til lobok yiga-o.

³⁶ Nde, Nagawan Indo uwi iri na mbepme tumende bem kerep leget mambu tap arem mberam irit koniga-o. Arem-e kerep tap kenan, nde, tap misig-e e libe Libanon-nen waruk lobok yiga ereba bem-nen koniga-o.

³⁷ Nde, Nagawan Indo uwi iri na worogolar-e, nanduk nandug-et o mabin pogolar-e, waneya nandug-et woraruk imbirik unu-ge Sip iri bem-e o mabin piga-o. Nde iri-ge Salomo-nen o tena woralar-e, olengen empat tak posolat pem-nen piga-o.

³⁸ Nde, waneya delapan tak posolat unu-ge Mbul iri bem-e Salomo o tena woralar-e, olengen sebelas tak posolat pem-nen Nagawan Indo uwi Salomo-nen wirid iri na-ge at-nen ”Iri nggal-et wirimin-o” luk wene mbarak pid iri na ndak ndag-et abu worak pij-o. Nde, o iri worosolar-e, olengen tuju irit woragij-o.