1 NAGAWAN NAGAWAN-NEN KWARIDNAK WENE 5 - Nanduk Ngget Tul Pidnak Wene

Salomo-nen Nagawan Indo uwi wururak lid lud tak pid wene 5:1-18

¹ Nde, Tirus nap nagawan Iram iri na-ge Ndaut imin kundik woragij-o. Nde, Iram-nen kulidnggal Salomo na-ge Ndaut ondolma nagawan men yidnak wene kulurug-e, ap ereb-e Salomo eram inpil mbirij-o.

² Inpil mberamu, Salomo-nen na Iram amanggim wene wosa posolar-e:

³ ”Nagawan Iram kunu worak wa-e. An neid Ndaut na-ge nit nendam inggi inggi woragwi nap-nen pempa nondogola karuk, inmin wim mbal tenak woraso-ge kar-e karu iri nar-o. Nde, Nagawan Indo-nen-e wim nap oboksa urugwe nggwe rak unpuruk ombol nggwe rak ibigit lak me, wim nak nggwerenak woralat, Nagawan Indo at Ambal Pem Nagawan erembel wanurak uwi-ge wirigit lag-o.

⁴ Alat nde yawo-ge Nagawan Indo Nembal Pem Nagawan-nen an-nen tena worasu wi oboksa yamuk tak pamu, yamuksa worali-o. An nimin sirid nap na lak. Iri-nen nit nenpem angin worak mbugwi na lak irit worali-o.

⁵ Nagawan Indo-nen neid Ndaut yak tosolar-e, yu nggal yak tij-o: ’Kat kondolma kambara men ma iri-nen an nerembel wanurak uwi-ge wuruwa-o’ yak tidnak me, iri bem-e nap Iram kunu worak wa-e. O yanem yu-ge an Salomo-nen Nagawan Indo Mbal Pem Nagawan erembel wanurak uwi wururak wat tak puruk worasu-o.

⁶ Nagawan kar-e karu-o. An nuwokma-ge ap kat kuwokma e ndarugwi nap enaru ereba nggal worali bug-o. Iri bem-e, nab-o. E libe Libanon woraso ereba an namanggim ndaruwakluk ap kat kuwokma ereba enpem pi-o. Nde, iri yogola-ge, ap an nuwokma-ge it yongga undurak inpil lobok yimin-o. Kat-nen ap kat kuwokma ereba onggo wok undurag-e ’Iri nggal wok undurag-o’ luk unu yarak pugun iri nag-o. Onggo-ge an-nen pimin-o” luk yak tij-o.

⁷ Nde, Iram iri na-ge wene iri na kolosolug-e, alen kwarat yij-o. Iri luk, at-nen yosolar-e: ”Nagawan Indo-nen Ndaut wok tosolar-e, ambara mondok indi nggat nggat worak ap enlem nggok iri enanggul pem nagawan men yurak wok tidnak me, yawo Nagawan Indo nak erembel wanurag-o!” luk yij-o.

⁸ Yosoluk, Iram-nen wene onggo-ge yu nggal Salomo eram wirik pij-o: ”Nab-o. Kat-nen nggi yigen wene iri-ge abu kuligi-o. An-nen-e kat-nen yigen iri ndak ndag-et kwarimin-o. E libe Libanon woraso min we e erep min kat-nen yigen ndak ndag-et kamanggim lid lud tak pimin-o.

⁹ Nde, e ereba-ge an nap-nen-e Libanon-nen waruk yi koma eyak pem pil mbuwa-o. Pil mburug-e, kamasa keya buruk ebem kore luk yi koma ombol pem waruk mburuwarik, nap kat-nen yi koma eyak pem iri me purag-o yugun sa-t pil mburuwa-o. Nde, iri me-nen-e kere kamaridnak kere ereba na wesera keya buruk puwama, iri me-nen kwarurak iri-ge kat nap enpem-o. Nde, kat-nen kwarosolar-e, an woraso sa woragwi nap enmanggim nunggwi mende lid lud tak purak iri nag-o” luk yak tij-o.

¹⁰ Iri lug-e, Iram-nen-e e libe Libanon woraso ereba na min at-nen ukwe yidnak e erep ereba na min oboksa-ge Salomo wok tij-o.

¹¹ Nde, Iram woraso sa woragwi nap enmanggim nunggwi mende-ge pempa olengen ndak wosa Salomo-nen Iram wok tosolar-e, nggandum mbato-ge angin-e 322.500 kilogram min e saitun amburu ndak wosa 4.400 liter kenangga pil nggwidnak min irit wok ondosolat woragij-o.

¹² Nagawan Indo-nen urul pid iri na ndak ndag-et kwarosolar-e, indi nggat nggat elem-e Salomo wok tij-o. Nde, Iram min Salomo min-nen-e: ”Mondok kundik irit wolmog-o” luk wene mbarak puruk, kundik irit woraiga-o.

¹³ Nagawan Salomo-nen onggo lak yabu enpem posolar-e, ab-e 30.000 irit enpem pij-o.

¹⁴ Yabu wanogola yik eneyarok wolmomtak enanggul pem-e Andoniram irit mendak ibij-o. Nde, Salomo-nen-e ap tembesa ondoro kenan irit inpij-o. Iri nggal kwasa tomborosolar-e, enpe-ge sepulu ribu (10.000) sepulu ribu (10.000) irit lenak inpil lobok yij-o. Iri rak enpamu ondolma kondolma kwat tenak Libanon woragolar-e, waneya misig-e Libanon, nde, waneya mberen-e o ma kwat tenak woraiga-o.

¹⁵ Nde, Salomo-nen-e ap 80.000 iri-ge o ndobo worak sa kerep abak ngarurak enpem pij-o. Nde, ap 70.000 kerep ngara pidnak iri na putlurak enpem pij-o.

¹⁶ Iri rak purug-e, yabu ereba na wanogola, yik eneyarok wolmomtak nab-e 3.300 irit lenak inpij-o.

¹⁷ Salomo-nen enpem pidnak pem-et kerep mondok konak yok nggok Nagawan Indo uwi worogolat mabin purak irit nggariga-o.

¹⁸ Iri nggal kwarogolar-e, Salomo-nen yabu enpem pidnak nap min Iram-nen yabu enpem pidnak nap min iri-nen o siri Nggebal woragwi nap min-e Nagawan Indo uwi wururak pem e min kerep min lid lud tak piga-o.