1 NAGAWAN NAGAWAN-NEN KWARIDNAK WENE 3 - Nanduk Ngget Tul Pidnak Wene

Nagawan Salomo-nen indi nggat nggat elem nggi yosolat tepan yidnak wene 3:1-15

¹ Salomo na woralar-e, Mesira nagawan iri na ara wanosolar-e, Mesira nap inmin kundij-o. Nde, ogwe iri na-ge wanuruk, Ndaut uwi silmu iri na me waruk lobok yarik irit worasolar-e, nagawan wolmomtak sa min Nagawan Indo uwi min Yerusalem siri kerep pak leget min iri na-ge abu irit worak pij-o.

² Nde, ereya tarem-e Nagawan Indo uwi-ge wirigit lak me, ap-nen Mbal Pem Nagawan amanggim wosa pogolar-e, ondoro ariktak ereba me pogolat woraiga-o.

³ Nde, Salomo na-ge Nagawan Indo abuwa kasolat, eid-nen kwarurak mul tidnak ereba na-t kwarosolat woragij-o. Iri-ge kwarosolar-et nde, Nagawan Indo amanggim eyabi worak wosa posolar-e, ondoro misik me nag-e pigit lak, nin me nan me irit posolat woragij-o.

⁴ Nde, it-nen Nagawan Indo erembel wanugwi sa unu worak iminep ma nggal-e Nggibeon iri mer-o. Nde, Salomo-ge pempa Nagawan Indo amanggim eyabi worak wosa pil-e iri me nak mborosolat woraso me, misik tarem-e iri kwarurag-et iri na me mbirij-o.

⁵ Mberarik pem kubu iri na-ge Nagawan Indo-nen nabi bem at eram nam luk-nen yak tosolar-e: ”Salomo wa-e. Kat-nen kindi perasu-ge an nebem nggi yi-o. Iri yosola-ge, an-e wog-et kirimin-o” yak tij-o.

⁶ Yosoloma, Salomo-nen yosolar-e: ”Kat-nen ndegel koboso nap an neid Ndaut abuwa mondok kwarat kaigen-o. At-nen tugup lak woralat, ndemeret mot mot kat keram-nen kwarosolat worala me, kat-nen pempa abuwa kasolat wolmomtak pem yenggerak purak pem-e kat-nen ambara misik wok tigenma, yawo ondolma men yigirik o tena unpurak worasu yur-o.

⁷ Nagawan Indo Nembal Pem Nagawan wa-e. An-e ap sujwe awo me, o tenagurak iri-ge naru bug-et nde, kat-nen neid ondolma nagawan mendak nibigen-o.

⁸ Nde, an-e kat-nen kondomok kilirak tak enpeyekluk len inpigen enlem iri na ennggendumu worasu-o. It yu-ge enpe mondok kwarat, wonat unpurak puk-nen yili-o.

⁹ Iri bem-e, Nagawan Indo wa-e. An-nen kat kilirak yu mot mor-et tena unpuruk woralat, konak min meya min weyarosolat worayek-nen kindi nggat nggat elem wok niri-o. Kindi nggat nggat elem nde wok nirigit lak-nen-e nggesa-nen kat kilirak kwarat yu nggal-e tena unpuruk woramin-o?” luk yij-o.

¹⁰ Yosoloma-ge, Salomo-nen nggi yid iri na-ge Nagawan Indo-nen-e indingen irit kagaij-o.

¹¹ Indingen karuk-nen yak tosolar-e: ”Kar-e kuruk mot pem wolmomtak min kat kondomok kamanggim yi mende ndi mende wok kururak min kat kuwim nap lak tak unpurak min iri-ge nggi yigit lak. Are, kat-nen mot mot pem-et Isarael nap tena unpuruk wolmomtak pem indi nggat nggat elem nggi yigen pem-e

¹² kat-nen nggi yigen iri-ge kwar-et kibimin-o. Iri kwat kobosolar-e, kar-e mondok terak mena kindi nggat nggat worak tak kibimin-o. Ap erep kat ndet yigit lak ma-nen enaru yugwi mende enaru yiga min abok-nen enaru yugwi mende enaru yuwa min ereba-ge teberak nggal-et nde, kar-e enaru yugwi mende-ge terak minik irit karu rak pimin-o.

¹³ Mondok kat-nen nebem nggi yigit lak yigen erep min-et wok kirimin-o. Wok korosolar-e, nagawan erep-nen yi mende ndi mende ombo woragwi min kek tak unpugwi min iri-ge teberag-et nde, kat woralar-e, yi mende ndi mende ombo woragun min mondok kek tak kobogolat wolma min iri-ge terak minik-nen yusu-o.

¹⁴ Kat-nen nde keid Ndaut-nen kwaroso nggal kwarosolat, an-nen yidnak yidnak kwarosolat, an-nen ’Irit kwarurag-o’ yidnak ereba na nde ndak ndag-et kwarosolat worasola-ge, an-nen-e kat kuruk wolmomtag-e mot pem tak kibimin-o” luk yak tij-o.

¹⁵ Yosoloma, Salomo na indi luk yidnggal-e Mbal Pem Nagawan-nen nabi bem wene yak tidnak irit yenggerak pij-o. Karug-e tuguruk Yerusalem mberarik, Nagawan Indo-nen idnak urul pidnak wene labu mbarak iri na eralu mendak woralat wam wosa amanggim kan posolat, Nagawan Indo imin kundurak pem wosa posolat kwatluk, imbirig-e at eyabu wanugwi nap oboksa enmanggim nggok sagij-o.

Salomo-nen wene angin worag-et nde konid wene 3:16-28

¹⁶ Nde, misik tarem-e kweyap terak waring kil nugwi mberen mbi Salomo eram lobok yiga-o.

^17-18 Lobok yogolar-e, at misik-nen yosolar-e: ”Nagawan kek tak wa-e. An min kwe misik yu min-e o misik me nak woragwi-o. Woragola-ge, kweyap ereb-e nit ninmin-e mondok woragit lag-o. Woragolar-e, siyak woraige ereya bem-e an-e liap misik ndaki-o. Ndaguruk mberen nene lug-e, at misik yu na liap misik ndagij-o.

¹⁹ Nde, misik tarem-e nit nene yogolar-e, kwe yu-ge yeberak lak nene yosolar-e, era na-ge angin-nen tebara worak pij-o.

²⁰ Iri rak purug-e, nggiringgendumu an nene yosola-ge, at men yarig-e an nera iri na-ge neram-nen waga at nene yoso sa eram puruk, nde, at era wat yidnak iri na-ge waga an nene yoso sa pij-o.

²¹ Nde, kup o nda yosoloma, an-nen kamo mak teyekluk yosoma-ge, la na-ge lugwinik nde karug-e, la na kwarat limbit lombot posoma-ge, la na-ge an nera-ge lak, nin nde kagi-o” yij-o.

²² Yosoloma, kwe misik iri-nen yosolar-e: ”Kar-e kenesiget yusu-o. Uruk yu-ge an nerar-o. Nde, lugwinik iri-ge kat kerar-o!” luk yij-o. Yosoloma, kwe nandug-et wene yid iri na-nen yosolar-e: ”Lugwinik yu-ge kat kerar-o. Nde, uruk iri-ge an nerar-o!” luk yij-o. Iri nggal enne amawi pebe yogolar-e, nagawan eram iri me nggino piga-o.

²³ Iri kwarogoloma, Nagawan Salomo-nen yosolar-e: ”Kit kenmberek yu-ge uruk yu-ge an nera kat kera yogolat, lugwinik iri na an nera-ge lak kat kera-ge lak yili-o” luk yij-o.

²⁴ Yuruk, Nagawan Salomo-nen ap yak ondosolar-e: ”Kabo wok niril lobok yer-o” luk wirik inpij-o.

²⁵ Wirik enpamu, waruk lobok yogola, nagawan-nen yak ondosolar-e: ”La uruk yu-ge mbara yugupndik, ponok nggwe-ge at misik, nde, ponok nggwe-ge at misik wok undurag-o” luk yak indij-o.

²⁶ Mbarurak wene iri na kulurug-e, ndemeret la iri ija iri na-nen yosolar-e: ”Nagawan kek tak wa-e. Mondok la iri-ge wururak pug-o. At irit urug-et wok turag-o!” luk yij-o. Nde, kwe iri na-nen iri yid iri-ge era indi kundugu iri-nen ndowaga-nen yij-o. Alat nde, kwe misik iri na-nen yosolar-e: Nit ponokigi we wolmok-nen mondok mbarurag-o” luk yij-o.

²⁷ Yosoloma, Salomo-nen yosolar-e: ”La iri-ge wururak pug-o. Kwe nandug-et wene yid iri-ge ija-ge irit kagi me, irit wok turag-o” luk yak indij-o.

²⁸ Isarael nap-nen kuliganggal-e, Salomo-nen wene iri kwara konidnak kulurug-e, Mbal Pem Nagawan-nen nam-et nak mot mot kwarurak indi nggat nggat elem wok tidnak ala karuk, it pidsa-nen-e wir-o luk at nak kek tak ibiga-o.