1 NAGAWAN NAGAWAN-NEN KWARIDNAK WENE 21 - Nanduk Ngget Tul Pidnak Wene

Nabot eyabu anggut yagoso mengga wanidnak wene 21:1-29

¹ Yisiriel iri me-ge Nagawan Akap woraso sa korok korog-e ap misik unu-ge Nabot iri na eyabu anggut yabu misik woragij-o.

² Nde, misik tarem-e Akap-nen Nabot yak tosolar-e: ”Kat konggweyak anggut yagoso iri-ge an nuwi mborom me, an-e seman nde korangen nde yageyek-nen an onggo beyeg-o. Nde, ondolma-ge nggweyak anggut yagurak mondok konak misik wok kirimin-o. Nde, iri nde kimbit-nen-e nggweyak iri onggo ndak ndak wok kereyeg-o” luk yak tij-o.

³ Yosoloma, Nabot-nen onggo yosolar-e: ”Nggweyak iri-ge nomborak mbal indidnak nderak pem lud tena woragwi-nen yusu me, mondok Mbal Pem Nagawan owag-o. An-e nggweyak iri-ge mondok kat wok kirimin pug-o” luk yak tij-o.

⁴ Nabot-nen yak tid iri na kulurug-e, indi siklumu luk, isilepma min Akap iri na-ge ama mbirij-o. Mborosolar-e, erare kebet wok turuk nene yoso sa mbinggirik nak woralat nunggwi mende-ge ninggit lak keya bij-o.

⁵ Iri yosola, ogwe Isebel iri na-nen eram mberarik, yak tosolar-e: ”Noluk-nen kar-e kindi siklumu rak worasolat, nunggwi mende keya busu-o?” luk yak tij-o.

⁶ Yosoloma, Akap-nen yosolar-e: ”An-e Nabot nisili rak posolat-nen yusu-o. An-nen at ebem nggi yosolar-e: ’Kat keyabu anggut yabu iri-ge an nebem onggo wani-o. Iri nde kimbit ala-ge, an-nen idnak anggut yabu misik min onggo onggo yuwog-o’ yak tigi-t nde, ar-e larok yij-o!” luk yak tosoloma-ge,

⁷ Isebel-nen yak tosolar-e: ”Kar-e Isarael nap nagawan yu-t nde noluk-nen iri kwarij-o? Ndak menluk nunggwi mende min-o. Nabot eyabu iri-ge kar-et wok kirimin-nen yusu-o. Kar-e kindi yanggo yi-o” yak tij-o.

⁸ Yak turug-e, Isebel-nen-e engga Nagawan Akap unu bem mbatluk, engga ereba na bem-e Akap-nen idnak lop nok tak pugwi mende (cap) iri na puruk, Yisiriel woragwi nap onowe min enne kulugwi nap min ereba na enmanggim engga mbara timbirij-o.

⁹ Nde, wene ebe mbarij-e yu-o: ” ’Misik tarem-e nunggwi mende ninggit lak, tepan nak yurak pem ap oboksa ndok wururag-o’ luk yak ender-o. Iri yogolat tarem-e Nabot iri-ge ap kek tak-nen koreyak woragwi ondoro iri bem koreyak uburag-o.

¹⁰ Iri luk, ap oboksa enlengen pem-et meya kwarugwi nap mberen-nen at yak togolar-e: ’Kar-e Mbal Pem Nagawan min Nagawan Akap min inmbiri lamut tak onposola kulige-o’ luk ebem puwakluk meya yugwi nap mberen yak ender-o. Iri luk, o silmu-nen mbepme nggwe waruk mburugupndik, kerep pem nak mondok langgona wururag-o!” luk engga mbara wirik pij-o.

¹¹ Nde, Isebel-nen enpem pid wene iri na-ge it Yisiriel woragwi nap onowe ereba-nen na irit, it ennggendumu enne kulugwi nap-nen na irit ndak ndak kwarogolar-e:

¹² ”Ap oboksa nunggwi mende ninggit lak, tepan nak yogolat wolmomtak pem ndok wururag-o” yikma, ndok worogolar-e, Nabot iri na-ge ap kek tak nak-nen kore yugwi iri na bem koreyak ibiga-o.

¹³ Nde, meya kwarugwi nap mberen-nen-e ap oboksa enlengen pem-e enesiget wene Nabot ebem pogolar-e: ”At yu-ge Mbal Pem Nagawan min Nagawan Akap min inmbiri lamut tak onposola kulige-o” luk ebem pogola-ge, wok uburuk leget ombol mbirigarig-e, kerep pem nak ndamera wiriga-o.

¹⁴ Worogola-ge, Nabot wiridnak wene iri na-ge Isebel yak til mbiriga-o.

¹⁵ Yak tikma, Isebel-nen Nabot wiridnak wene iri na kulurug-e, ndag-et nak Akap yak tosolar-e: ”Nabot iri na-ge wiriga-o. Nde, yawo-ge mburugundik, at onggweyak anggut yabu kat kebem onggo wanurak larok yid iri na-ge wani-o” yak tij-o.

¹⁶ Yak tosoloma-ge, ereya na-net Akap na-ge anggut yabu iri na-ge winde yekluk mbirij-o.

¹⁷ Iri kwarosola karuk, Nagawan Indo-nen at ene lomboksa yoso nap Tismbe nap Elia yak tosolar-e:

¹⁸ ”Samaria Nagawan Akap iri na-ge yawo-ge Nabot-nen idnak anggut yabu iri na winde yekluk anggut yabu iri na me worasu-o. Iri ala karuk, kar-e iri me mbiri-o.

¹⁹ Nde, mburungundik-nen yak tosolar-e. yu nggal yak ti-o: ’Nagawan Indo-nen yak korosolar-e: ”Ebe-t worosoluk, onnggweyag-et wanusu me, Nabot eyabi yengge-nen aben nuruk, lak tak pid sa iri me-net kat keyabi-ge yengge-nen aben nuruk, lak tak puwa-o!” luk yak kirij-o’ luk yak ti-o.”

²⁰ Nde, Akap-nen Elia karuk, yak tosolar-e: ”Nuwim nap wa-e. Kar-e an nebem kore yurak lobok yusu-a?” luk yak tij-o. Yosoloma-ge, Elia-nen yosolar-e: ”Ye! Ndemerer-o. Nap kar-e mondok kindi-net wat tak puruk, Nagawan Indo erengen pem mondok meya nggok kwaridnak me,

²¹ Nagawan Indo-nen kat yak korosolar-e: ’An-nen-e lak tak onposo mende-ge kat kebem pimin-o. An-nen-e kar-e mondok pusa lak tak kibimin-o. Kat kambararak ap sujwe na, indi worak na oboksa lak tak kinpimin-o.

^22-23 Kat-nen ndowaga Isarael nab-e meya nak kwarogolat, an nisilepma rak pigen me, kat kilirag-e Nagawan Yerobeam Nebat ambara iri na min Nagawan Mbaesa Agia ambara iri na min inlirak kwat inpigi iri na nggal-et kwat inpimin-o’ yij-o. Nde, Nagawan Indo-nen Isebel iri na imin yosolar-e: ’Isebel iri-ge o Yisiriel silmu-net ebe-ge yengge-nen lubunuruk ndi ma-o.

²⁴ Nde, kat kowe kowot o silmu wat ma-ge yengge-nen leben unpuruk ndi ma-o. Nde, nembaga ereba-nen wat ma-ge towe-nen leben unpuwa-o’ yij-o” luk yak tij-o.

²⁵ Nde, Nagawan Indo erengen pem-e Akap-nen indi-net wat tak puruk, mondok yi meya ndi meya kwarid iri na nggal-e ap mbi-nen mondok kwaroso bug-o. Nde at-nen yi meya ndi meya kwaroso ereba-ge ogwe Isebel-nen arem woragosola-net kwaroso-o.

²⁶ Akap-nen-e yi meya ndi meya, meya mende ereba na nak kwarosolar-e, Isarael nap mondog-et Kanaan wi nggogola, Nagawan Indo-nen Kanaan wi-nen langgara wirik inpid nap Amori nap-nen kugwi erembel wanugwi ereba na nggal-et kugwi erembel wanosolat woragij-o.

²⁷ Nde, Elia-nen wene iri na yuruk keya bosola karug-e, Akap na-ge ”Niri nera kwarigi-o!” yosolar-e, usum ndela keya buruk, sum-e karung ndelak meya ereba na yirij-o. Yutluk, nunggwi mende ninggit lak irit woragij-o. Nene yosolat na, karung iri na-t yutluk nene yosolat, nde tu mborosolat na erare yek tag-e nigit lag-o.

²⁸ Iri kwarosola, Nagawan Indo-nen at ene lomboksa yoso nap Elia yak tosolar-e:

²⁹ ”Kar-e Akap-nen kondok luk, an neram tebe yusu iri-ge kasu, lak? Iri bem-e an-nen-e at uruk worala tarem-e lak tak onposo mende-ge ebem pil lobok yimin pug-o. Are, at ambara worala tarem-nen perak, lak tak unpurak mende-ge at ilirak enpem pil lobok yimin-o” luk yak tij-o.