1 NAGAWAN NAGAWAN-NEN KWARIDNAK WENE 19 - Nanduk Ngget Tul Pidnak Wene

Elia Ndobo Sinai bem woragid wene 19:1-18

¹ Nde, Akap na mberarig-e, Elia-nen kwaridnak wene min at-nen kugwi Mbaal ombo oboksa indid wene min ereba na-ge oboksa ogwe Isebel yak tij-o.

² Yak tosoloma, Isebel-nen Elia eram wene yu wosa pil mborosolar-e: ”Kup nde yanem nggal nde Mbaal ombo kwat inpigen ereba nggal nde an-nen kat kwat kibigit lak nde ala-ge, an-e nuruk wolmomtag-e lag-o. Mbaal-nen lak tak nubuwag-o” luk yij-o.

³ Iri yid iri na Elia-nen kulurug-e, wuruwa naru kwiye-nen mborosolar-e, at ndegel oboso nap misik min Yewura nggweyak pem o Mbereseba mbirij-o. Mberarik, ndegel oboso nap iri na-ge iri me keya ibij-o.

⁴ Iri luk, ijok tu nembaga nggwe aptusa misik tarem-et mbirij-o. Mberarik, e angga mumak worak misik indipma-t ndong luk kore yosolar-e, wat yurak nak mot tak pij-o. Woralat-nen tepan yosolar-e: ”Nagawan Indo wa-e. An-e ndak siri mbarigi-o. Iri ala, an-e wat yeg-o. Nomborag-e wat yiga-t nde, an-e noluk nuruk wolmomtag-o? Mondok nindi wani-o!” yij-o.

⁵ Yosoluk yarik, e iri na indipma mbiring luk, nene yij-o. Nene yosoma, aid nap mbi-nen mimo sil karuk-nen yak tosolar-e: ”Elia wa-e. Men yugundik, nunggwi mende min-o” yak tij-o.

⁶ Yosoloma, men yosolat eralu ereba na mbenarosoma-ge, anggul ndug-e oroti wora misik min yimbe yi kenanggo misik min worasoma, kagaij-o. Karug-e, oroti min yi min ereya na nurug-e, tuguruk mbiring yij-o.

⁷ Tuguruk Nagawan Indo-nen idnak aid nap iri na lobok yosolat, sil kasolat-nen yak tosolar-e: ”Elia wa-e. Nunggwi mende nuruk kamawisa tula erepma-t mboronok-nen menluk nunggwi mende min-o” yak tij-o.

⁸ Yosoloma, Elia iri na men yosolar-e, yi min nunggwi mende min ninggij-o. Nuruk, amawi rak purug-e, Mbal Pem Nagawan ondomok-nen nam yaga mirik inpid Ndobo Sinai iri na me mborosolar-e, empat pulu (40) tarem irit mbirij-o.

⁹ Mberarig-e, Elia na-ge kerep yanggoma nene yij-o. Iri yosoma, Nagawan Indo-nen yak tosolar-e: ”Elia wa-e. Kar-e yu me-ge no wanusu-o?” luk yak tij-o.

¹⁰ Yosoloma, Elia-nen onggo yosolar-e: ”Nagawan Indo kamawi worak Mbal Pem Nagawan wa-e. An-e pempa Nagawan Indo kat kamanggim nag-et yabu-ge wanoso-o. Alat nde, Isarael nab-e it-nen kat kimin urul piga wene ereba na ondomok-nen kwid togolar-e, kat kamanggim wam wosa kan pugwi ondoro ereba na mijarogolat, kat kene lomboksa yugwi nap ereba na oboksa ondogolat yikma, an narig-et nak worala, yawo-ge nururak yili-o” luk yak tij-o.

¹¹ Yosoloma, Nagawan Indo-nen yak tosolar-e: ”Kerep yanggoma yu me-n wagundik, an neram ndobo bem luwagundik, mendak wolmin-o” yak tij-o. Nde, Nagawan Indo na lobok yosolar-e, e kemereya nggok puk kil lobok yosolar-e, ndobo amun min kerep ndobo min ereba na-ge yang pang mbosolat, ndamera mbosolat kwaril lobok yij-o. Iri kwarij-et nde, Nagawan Indo-ge e kemereya iri na arem-e nam yigit lag-o. Nde, e kemereya iri na lak yosola-ge, o lele-nen o nden penden kagaij-et nde, o lele iri na arem na Nagawan Indo-ge nam yigit lag-o.

¹² Imbirig-e, kan mare lobok yij-et nde, Nagawan Indo-ge kan mare iri na arem-e woragit lag-o. Ereba na kwatluk lak yosolat, yi ene ndi ene lak aptu po yosoma-nen perak, ene marik kimamo ene pu nggal irit kulij-o.

¹³ Elia-nen ene iri na kulurug-e, usum leyok sum iri na-nen erare muruksa keya buruk, lagarik, kerep yanggo iri na tumende bem mendak worasoma, ene misik-nen yak tosolar-e: ”Elia wa-e. Kar-e no wanosolat yu me worasu-o?” luk yak tij-o.

¹⁴ Kuluruk, Elia-nen erep nggarosolar-e: ”Nagawan Indo kamawi worak Mbal Pem Nagawan wa-e. An-e pempa Nagawan Indo kat kamanggim nag-et yabu wanosola-t nde, Isarael nab-e it-nen kat kimin urul piga wene ereba na ondomok-nen kwid togolar-e, kat kamanggim wam wosa kan pugwi ondoro ereba na mijarogolat, kat kene lomboksa yugwi nap ereba na oboksa ondogolat yikma, an narig-et nak worala, yawo-ge nururak yili-o” luk yak tij-o.

¹⁵ Nagawan Indo-nen yak tosolar-e: ”Kar-e nembaga Ndamsik koroga iri me tuguruk mbiri-o. Mborosolar-e, o silmu nggugundik, o Siria iri me nagawan mendak posolat, amburu-ge Asael anggul pem kilik pi-o.

¹⁶ Iri nggal-et Nimsi ambara Yegu iri-ge Isarael iri me nagawan mendak posolat, anggul pem amburu kilik purag-o. Nde, o Abel Meola nap Sabat ambara Elisa iri-ge kat kondolma an nene lomboksa yoso nap makluk, amburu anggul pem-et kilik purag-o.

¹⁷ Iri rak unpugunmu, Asael-nen nde indigit lak ala-ge, Yegu-nen unduwa-o. Nde, Yegu inggem-nen mengga mborogola-ge, Elisa-nen unduwa-o.

¹⁸ Alat nde, Isarael wi iri me-ge ap tuju ribu (7.000) irit inmiri yimin-o. Nde, inmiri yimin nap iri-ge tugup lak an-nen yidnak yidnak kwarogolat, kugwi Mbaal ndak worak iri na erembel mondok wanigit lak yogolat, ndak worak iri na erabengen porok tigit lak woragolat kwarugwi nap irit inmiri-t yimin-o” luk yij-o.

Nagawan Indo-nen Elisa iri na lenak pidnak wene 19:19-21

¹⁹ Yak tosoloma-ge, Elia na-ge mberarik, Elisa na-ge sapi wam-e ondok min lombok nak duabelas ereya na bem abuwok nggwe nggweyak yalogola, ar-e sapi worok siyem ambigit nggwe ondok min mberen ereya na bem-nen nggweyak yalosoma, Elia na-ge Elisa eram wok yij-o. Wok yosolar-e, Elia-nen-e usum leyok sum iri na yonggora Elisa endakmbe bem langgwirik pil lagaij-o.

²⁰ Iri kwarosoloma-ge, Elisa na-ge esapi ereba na-ge ereya nak keya buruk, Elia imbirik muk karik, Elisa-nen Elia yak tosolar-e: ”Nab-o. An-e neid niya yak unduruk-nen kimbirik lobok yimin-o” luk yak tij-o. Yosoloma, Elia-nen yosolar-e: ”Ob-o. Iri kwarurak iri-ge kat kebem-o. An-nen lag-o yak kururag-e lag-o” luk yak tij-o.

²¹ Yosoluk, Elisa na tuguruk yabu eraretma mberarik, esapi wam ereba na wutluk, sapi bem parik puruk nggweyak yalugwi e ereba na-ge sapi ereba na sagosolat kan wanij-o. Sagarik, mbara at imin nugwi nap ereba na tembet indij-o. Iri yamu, ir-e ningga-o. Iri rak puruk, Elisa na-ge Elia imbirik mberarik, at yongga woroso nap kwat yij-o.