1 NAGAWAN NAGAWAN-NEN KWARIDNAK WENE 18 - Nanduk Ngget Tul Pidnak Wene

Elia min Obaja min-nen kwaridnak wene 18:1-15

¹ Nde, siyak woraruk, o kibi mbud yarik woralat olengen mberen woraruk, kenan tak posolat ereya na arem-e Nagawan Indo-nen Elia yak tosolar-e: ”Kar-e Nagawan Akap eram mbiri-o. Marig-et nak worarug-e, an-nen talme mberak pil mbuwamin-o” yak tij-o.

² Yosoloma-ge, Elia na-ge mbirij-o. Nde, iri tarem-e nogoro nggok pendega lak yurak irit Samaria iri me-ge mbud yarik woragij-o.

³ Iri ala karug-e, Nagawan Akap-nen-e Obaja at eram lobok yuwakluk, wene mbo ibij-o. (Nde, Obaja iri-ge mondok ndemeret ndemeret Nagawan Indo erembel wanoso irit woragij-o. Nagawan woraso sa iri me-nen enanggulwak nggal-e Obaja irit woragij-o.

⁴ Nde, kwe Isebel-nen Mbal Pem Nagawan ene lomboksa yugwi nap ereba na ondosola-ge, Obaja-nen yongga ondosolar-e, ap enpe seratus (100) irit kerep yanggoma kura onposolar-e, enpe lima pulu-ge (50) nin me, enpe lima pulu-ge (50) nin me kura unpuruk, nunggwi mende min yi min mak ondosolat woragij-o.)

⁵ Nde, Akap-nen Obaja yak tosolar-e: ”Yi ugup kul, lak? Yi waru kul, lak? Kore o siri yeba oboksa arem tak puwog-o. Erep-nen-e tusuangge mbi kulndik, nonowam kura min nenkelerai wam min yi ulusu kundik puwog-o. Nit nonowam urusuwaga misiger-o luk tet wururak iri-ge meya-o” yak tij-o.

⁶ Iri luk it-nen it waring kudtak sa tembesa keya burug-e, mbiriga-o. Mborogolar-e, Akab-e tula misik nggwe-t mbirij-o. Nde, Obaja-ge tula misik nggwe-t mbirij-o.

⁷ Iri kwasa mborogolar-e, tundumu Obaja na-ge Elia imin lid pid yij-o. Elia yenggerak karug-e, Obaja na-ge Elia eram erare nggwe tud yosolat-nen yosolar-e: ”Kar-e ndemeret nombo Elia-t, lak?” yosoloma,

⁸ Elia-nen onggo yosolar-e: ”Ndemeret an-e Eliar-o” yak turuk, Elia-nen yosolar-e: ”Yawo kar-e mburugundik, kat-nen idnak nagawan iri na an nobok yak til mborosolar-e: ’Elia iri me worasu-o’ yak tugun-o” luk yak tij-o.

⁹ Yosoloma, Obaja-nen onggo yosolar-e: ”An-e meya no kwarukmu-nen Akap-nen nuruwakluk nare pusu-o?

¹⁰ Nagawan Indo uruk nak woraso kat-nen kek tak poso Mbal Pem Nagawan iri na owag-o. Nam-et para yak kereyeg-o. Nagawan Akap-nen-e kat kogore yurak an wirik nobosoma-ge, an-e nin me nan me waring kaso. Nde, o misik me nagawan-nen yogola-t nde: ’Elia yu me-ge lag-o’ yidnak ala-ge, Akap-nen-e o iri me woraso nagawan iri na imin-e: ’Irit nde, Elia-ge yu me-ge lag-er-o luk mondok owak mbarurag-o’ luk yak ondoso-o.

¹¹ Iri yoso na bem-et nde, yawo-ge nombo kat-nen-e an-e at eram mbutluk, ’Elia-ge endeba worasu-o’ luk yak turak wirik nubusu-a?

¹² Nde, erep-nen-e an yu me-nen mborosola-ge, Nagawan Indo Indi-nen kar-e waga an naru buk sa nin me nde kubuwa nde ma-o. Nde, erep-nen-e an-nen nde: ’Elia na-ge endeba worasu-o’ luk Akap yak timindik pem kogore yuwarik, lak ala karug-e, an nde nuruwa-o. An-e ndemeret marik pem-net Nagawan Indo erembel wanoso iri-ge karu nar-o.

¹³ Isebel-nen Mbal Pem Nagawan ene lomboksa yugwi nap ondosola-ge, an-nen ap enpe seratus (100) irit kerep yanggoma kura onposolar-e, an-nen-e ap lima pulu-ge (50) nin me, lima pulu-ge (50) nin me kura unpuruk, nunggwi mende min yi min mak ondosolat woragi iri na-ge kar-e koloso buk, lak?

¹⁴ Irit nde, nap kar-e kat keresa-ge ’Iri me worasu-o’ luk yak turak wirik nubusu-a? Iri yosola-ge, mondok ndemeret an-e nuruwar-o” luk yak tij-o.

¹⁵ Yosoloma, Elia-nen onggo yosolar-e: ”Nagawan Indo amawi worak an-nen ndegel oboso iri na owag-o. Mondok karu wolmin-o. An-e mondok yawo-t nagawan iri na eram wok yimin-o” luk owak mbarij-o.

Elia min kugwi Mbaal ombo min-nen kwaridnak wene 18:16-40

¹⁶ Iri yosoloma-ge, Obaja iri na mberarig-e, Nagawan Akap iri na yak tosola-ge, Akap na-ge ereya na-net Elia eram mbirij-o.

¹⁷ Mberarik, Akap-nen Elia karuk-nen yak tosolar-e: ”Isarael yu me nari wari rak poso yu na-ge yur-o” luk ene nggoksa yij-o.

¹⁸ Yosoloma-ge, Elia-nen onggo yosolar-e: ”An-e nari wari rak poso nab-e lag-o. Iri kwarugwi-ge nagawan kat min kat keid min perak nde nari wari rak pugwi-o. Iri kwarogolar-e, Nagawan Indo-nen kebem pidnak wene kwid togolat, kugwiwak Mbaal erembel wanogolat kwatli irir-o.

¹⁹ Yawo-ge kat-nen Isarael nap oboksa yak indi-o. An nimin Karamel Ndobo bem ndok wuruwag-o. Iri yogolar-e, kugwi Mbaal ombo empat ratus lima pulu (450) min kugwi Ndewi Asera ombo min ereba-ge kogwe Isebel-nen onggo wok ondoso nap empat ratus (400) ereya min-et oboksa inmin lobok yurag-o” luk yak tij-o.

²⁰ Yosoloma-ge, Akap-nen Isarael nap oboksa min kugwi Mbaal ombo min oboksa yak ondosolar-e: ”Mondok Karamel Ndobo bem nak ndok wururag-o” luk yak indij-o.

²¹ Iri yamu, ndok worogola, Elia na Isarael nap endam mberarik-nen yak ondosolar-e: ”Kir-e mepme-nen kinndi mberen worali iri-ge misiget tak pugub-o? Mbal Pem Nagawan iri nde ndemeret Mbal Pem Nagawan-et ala-ge, irit kek tak uburag-o. Nde, Mbaal iri nde mbal pem nagawan ala-ge, irit kek tak uburag-o” luk yak indij-o. Iri yak ondosola-ge, iri me ndok wiriga nab-e onggo yigit lag-o.

²² Iri luk, Elia-net yosolar-e: ”Yu me-ge kugwi Mbaal ombo-ge empat ratus lima pulu (450) worali-t nde, Mbal Pem Nagawan ene lomboksa yugwi nap ereba ennggendumu-ge an narig-et nak worasu-o.

²³ Yawo-ge sapi kusi mberen yu me waruk lobok yer-o. Iri lug-e kugwi Mbaal ombo-nen-e sapi misik iri-ge wosa keya buruk, mbara kan ndama buruk, iri na bem purag-o. Iri rak purug-e, mondok kan-e pago burak pug-o. Nde, iri nggal-et sapi misik iri-ge an-nen wosa keya buruk, mbara kan ndama buruk, iri na bem puruk, kan-e pago pimin pug-er-o.

²⁴ Iri rak purug-e, kugwi Mbaal ombo-nen-e Mbaal emengen mbarurag-o. An-nen na Nagawan Indo emengen-et mbarimin-o. Iri kwarukmu nde kanduk nde pil mbuwasola-ge, iri-ge ndemeret Mbal Pem Nagawan nag-e irir-o luk yebet kudtag-o” yak indij-o. Iri yak ondosoloma, ap oboksa-nen enne nggoksa onggo yogolar-e: ”Ob-er-o” luk yiga-o.

²⁵ Iri lug-e Elia-nen kugwi Mbaal ombo ereba na yak ondosolar-e: ”Kit kenpe-ge kwarat me, sapi kit-nen peragup iri wanuruk, wosa mbara kan pem puruk, kan pago pigit lak-nen kenmbal pem nagawan nggi yak ter-o” luk yak indij-o.

²⁶ Yak ondosoloma-ge, it-nen-e sapi misik wanurug-e, wosa mbara kan pem puruk, Mbaal iri na emengen mbal tenak kuplila-nen pak mbiga lenggesilmu irit yij-o. Iri kwarogolar-e, wam kan purak lid lud tak piga iri na inggi nggwe kot kil waring kagolat-nen kwariga-o. Alat nde, mondok enne erep mbi nggarigit lag-o.

²⁷ Iri kwat tenak worakmu, o iri na lenggesilmu ala karug-e, Elia-nen pesel onposolat-nen yak ondosolar-e: ”Ar-e ndemeret mbal pem nagawan-et iri nar-o. Kenne-ge mondok nggok pem-net emengen mbarer-o! Erep-nen-e ar-e kwarurak ereba na indi yebet kerenak nde worasu, lak? Are, wanggema nde worasu-a? Are, tula nde mburusu-a? Nene nde yusu ma-o. Ndak mendak per-o” luk yak indij-o.

²⁸ Mbaal ombo ereba na-ge tepan-e tugurug-e enne nggoksa yiga-o. It-nen pem kwarugwi ereba na nggal-et kwarogolar-e, kabo min tege min wanogolar-e, enaboro yeba-ge mep tak pogola, mep nak yo lo mbij-o.

²⁹ It iri-ge ap kugwi enarem nggwidnak nap-nen kwarugwi nggal irit kwat tenak worakmu, o na-ge abu keyama yij-et nde, enne erep mariget tet mondok nggarigit lag-o. Mondok mariget tet yebet eneyagit lag-o.

³⁰ Iri luk, Elia-nen Isarael nap oboksa yak ondosolar-e: ”Panggosa lobok yer-o” yosoloma-ge, at eralu panggosa ndok wiril lobok yiga-o. Iri yogola-ge, Nagawan Indo amanggim wam wosa kan pugwi ondoro mijara labuk yid iri na kona keya bosolar-e,

³¹ Yakup ilirak enlem duabelas ereya na ndak wosa kerep duabelas wanij-o. Nde, iri-ge Nagawan Indo-nen Yakup imin yosolar-e: ”Kat kunu-ge Isarael-o” yid iri na ala karuk-nen kwarij-o.

³² Kerep ereya na bem-nen Nagawan Indo amanggim kan pugwi ondoro mijara labuk yid iri na-ge tuguruk konij-o. Iri rak puruk, inggi nggwe-ge yi pud embe lima belas (liter) kenanggo-nen kobong tak purak irit mbarij-o.

³³ Wam wosa kan pugwi ondoro iri bem-e kan ndamij-o. Ndamak purug-e, sapi misik iri na worarik, mbara kan ndamak iri na bem pij-o. Iri rak purug-e, at-nen yosolar-e: ”Nggweyak yimbe empat ereya yi kobong tak per-o. Iri rak purug-e, wam mbarak kan ndamak pem worasu iri bem kilik pogolat, kan min-et piri rak per-o” yak ondosoloma, it-nen iri na kwatlug-e,

³⁴ at-nen tugurug-et yak ondosolar-e: ”Iri nggal-et tuguruk kwarer-o” yak ondosoloma-ge, tugurug-et iri na nggal-et kwariga-o. ”Iri na nggal-et tugurug-et kwarer-o” yak endamu, tugurug-et kwariga-o.

³⁵ Iri kwasa kologola-ge, yi iri na-ge wam wosa kan pugwi ondoro inggi inggi pud mbarak iri na-ge yi-nen kobong yij-o.

³⁶ Keyama-nen wam wosa Nagawan Indo amanggim kan pugwi ndak ndak keyama yij-o. Iri yosola, Mbal Pem Nagawan ene lomboksa yoso nap Elia iri na wam wosa kan pugwi ondoro iri na eralu panggosa lobok yosolat, tepan yosolat-nen yosolar-e: ”Nagawan Indo wa-e. Abarakam min Isak min Yakup min-nen kek tak kubugwi Mbal Pem Nagawan wa-e. Yawo-ge kar-e ndemeret Isarael nap Enmbal Pem Nagawan-nen yusu-o luk enaru rak pi-o. Nde, ndegel koboso nap an-nen kwarusu oboksa yeba-ge kat-nen yidnak pem-et kwarusu-o luk enaru mak-nen enaru rak pi-o.

³⁷ Nagawan Indo wa-e. Nene erep nggari-o. Ap yeba-nen kat kimin enaru yogolar-e, Nagawan Indo-ge Mbal Pem Nagawan-net yusu-o luk enaru yogolat, Mbal Pem Nagawan-net nir-e tuguruk nden yaga at eram ninpil lobok yusu-o luk enaru yuwakluk, kat-nen nene erep nggari-o” luk tepan yij-o.

³⁸ Yosoloma-ge, Nagawan Indo-nen mbal pem-nen kanduk mberak pil mbuwasolar-e, sapi mbarak iri na min kan min mondok nuruk lak tak pij-o. Iri yosolar-e, kerep min yi pud arem iri min-et nuruk, nggweyak nak nderak pij-o.

³⁹ Iri kwarosola karug-e, iri me woraiga nap ereba na-nen entare nggwe nggweyak pem yud tud mbogolat-nen yogolar-e: ”Nagawan Indo iri-ge Mbal Pem Nagawan-net yusu-o! Mondok ndemeret Nagawan Indo-ge Mbal Pem Nagawan-net yusu-o!” luk yiga-o.

⁴⁰ Yogoloma, Elia-nen yosolar-e: ”Mbaal kugwi ombo yeba-ge mondok tenagil lobok yer-o! Mondok misiger-o luk keya unpurak pug-o” luk yosoloma, ap ereba na-nen kugwi Mbaal ombo ereba na oboksa-ge tenaga inpil lobok yogola-ge, Elia na-ge Yi Kison arem inmin mberarik, kugwi Mbaal ombo ereba na-ge oboksa indij-o.

Tuguruk talme mbidnak wene 18:41-46

⁴¹ Iri kwatluk ombol nggwe-ge Elia-nen Nagawan Akap yak tosolar-e: ”Yawo mburugundik, nunggwi mende min-o. An-e talme ene nggu kulusu me, talme-ge yanem-et mbuma-o” yak tij-o.

⁴² Yosoloma, Akap iri na-ge nunggwi mende nil mborosola-ge, Elia na-ge Karamel Ndobo bem lagarig-e, endaru yunggusa tud yosolar-e, erare imbimbiwak pem lud tak puruk,

⁴³ at ndegel oboso nap iri na yak tosolar-e: ”Kar-e ndobo wolak pem lagundik, kerengen yi koma ambigit nggwe mbenari-o” yosoloma, ndegel oboso nap iri na-ge ndobo bem lagarik, mbuwasolat-nen yosolar-e: ”Talme mbuwa-o luk yenggerak purak mende misiger-o luk mbi mondok kagit lag-o” luk yij-o. Iri nggal kwarosolar-e, Elia-nen-e ndegel oboso nap iri na-ge o abut mbaril tuju bem-et ndimirik pil lasola, o kil lalik mbuwalik tuju bem-et kwat tenak woragij-o.

⁴⁴ Tuju bem tak posolat-nen mbuwasolat, ndegel oboso nap iri na-nen yosolar-e: ”Nggan nggan mariget ininggi mok nggal mbi yi koma arem nggwe-nen lobok yosola, kagi-o” luk yak tij-o. Yosoloma, Elia-nen ndegel oboso nap iri na yak tosolar-e: ”Kar-e Nagawan Akap eram mburugundik, yak tosolar-e: ’Talme abiyem yugun naru, abuwokma-nen konggweyak koma arem ngguruk, tuguruk kama mbiri-o’ luk yak ti-o” luk yak tij-o.

⁴⁵ Ereya na-net enlengen sambok yidnak nggal o puru yij-o. Iri yosolat, o wija puk kil lobok yosolar-e, talme nggok irit mbij-o. Nde, Akap na-ge onggweyak koma arem ngguruk, o Yisiriel mbirij-o.

⁴⁶ Ereya na-net Nagawan Indo-nen Elia iri na amawi wok tosolar-e, usum leyok sum iri na yunggusa pesera abam nggwe pil lasolug-e, abare kamarak purug-e, at nanduk pong kid kid Yisiriel o pak tumende bem Akap abuwok nanduk wok yil mbirij-o.