1 NAGAWAN NAGAWAN-NEN KWARIDNAK WENE 17 - Nanduk Ngget Tul Pidnak Wene

Elia worala, o kareya nggok wok yidnak wene 17:1-7

¹ O Nggileat nggweyak arem o siri Tismbe nap Mbal Pem Nagawan ene lomboksa yoso nap mbi unu-ge Elia irit woragij-o. Nde, misik tarem-e Elia na-ge Nagawan Agap eram mberarik-nen yak tosolar-e: ”Nagawan Indo uruk nak woraso Mbal Pem Nagawan, Isarael nap-nen kek tak ubugwi an-nen ndegel ubusu owag-o. Mondok nap kat yak kereyeg-o. Abok olengen mberen, lak? Are, kenan lak? woragolar-e, ereya arem-e mondok lilangen ala na talme mariget ala na mondok mbuma bug-o. An-net yosola-nen perak mbuma-o” luk yak tij-o.

² Iri luk ombol nggwe-ge, Nagawan Indo-nen Elia yak tosolar-e:

³ ”Kar-e mo luwaso ambigit (timur) nggwe Yareren eyak ele bem elpa ndil lagundik, yi waru Kerit arem ereba kura wolmin-o.

⁴ Woralar-e, yi iri na nok tenak worasoma, towe ijamu an-nen nunggwi mende waruk keram wirik pil lobok yimin-o” luk yak tij-o.

⁵ Yak tosoloma-ge, Elia na-ge Nagawan Indo-nen yak tid iri na-t kwarosolar-e, yi waru Kerit iri na arem mberarik iri na me woragij-o.

⁶ Woralar-e, Elia na-ge yi iri na nok tenak worasoma-ge, kuplila-nen keyama-nen towe ijamu ereba na-nen oroti min uno min wok til lobok yosola, nasolat woragij-o.

⁷ Iri kwat tenak worasoma-ge, talme mbigit lak-nen ndowaga yi iri na-ge eberek yij-o.

Elia min Sarapat kwe togwe iri na min-nen kwaridnak wene 17:8-24

⁸ Iri luk, Nagawan Indo-nen Elia yak tosolar-e:

⁹ ”Kar-e yawo-ge o Siron koroga Sarapat mburugundik, iri me wolmin-o. Worasoma, iri me-nen-e kwe togwe mbi-nen nunggwi mende mak kuruwakluk ebem pukmu-o” luk yak tij-o.

¹⁰ Yosoloma, Elia na-ge Sarapat wi mbirij-o. Mberarik, o pak tumende bem wok yosoma-ge, kwe togwe misig-e kan ereme pondogosoma kagaij-o. Karuk, Elia-nen kwe togwe iri na yak tosolar-e: ”An namanggim yi siyak kenangga wok niril lobok yi-o” yak tij-o.

¹¹ Yak tosoloma, kwe iri na yi wil mborosola-ge, Elia-nen ene nggoksa yak til mborosolar-e: ”Oroti marig-et min-et wok niril lobok yi-o” yak tij-o.

¹² Yosoloma, kwe togwe iri na-nen yosolar-e: ”Nagawan Indo uruk nak woraso Mbal Pem Nagawan kat-nen kek tak pusu iri owag-o. An-e oroti-ge mondok lag-o. Alat nde, nggandum mbato yigirik ininggi mok misiget pem waga pidnak nggweyak yimbe arem yarak worasu-o. Nde, amburu-ge yi embe marik komosa arem yarak worasu-o. Ereya nak woraga an nambara min norak kan ereme pundugusu yur-o. Nde, marig-et ereya woroksa nurug-e, mondok wat momtak nak yik karok wulmul-o” luk yak tij-o.

¹³ Yosoloma-ge, Elia-nen yosolar-e: ”Kar-e kumud kasu-ge meyog-o. Kat-nen-e nggandum mbato yigirik ereya-ge amburu marig-et ereya bem oroti kambara min norak konurag-o. Alat nde, konigit lak ma nandug-er-e nggandum mbato yigirik ereya min amburu ereya min marig-et waga an namanggim oroti marik misik kwasa woraga an wok niril lobok yi-o.

¹⁴ Nagawan Indo Isarael nap Enmbal Pem Nagawan-nen yosolar-e: ’Nggandum mbato yigirik yarak worasu ondoro iri-ge nggandum mbato na lak yigit lak woraso komo irit wolma-o. Nde, amburu yarak worasu ondoro iri-ge amburu na lak yigit lak woraso komo irit wolma-o. Irit worasoma, an-nen talme nggweyak ma mberak pil mbuwamin tarem-net lak ma-o’ yamu-o” luk yak tij-o.

¹⁵ Yosoloma, kwe togwe iri na mberarik, Elia-nen yak tid iri na-t kwarij-o. Iri kwarosola-ge, it kenan enmanggim-e nunggwi mende-ge pempa ndak nak worala nonggolat woraiga-o.

¹⁶ Nagawan Indo-nen Elia yak tid iri na ndak ndag-et ondoro mberen ereya na arem-e nggandum mbato yigirik min amburu min-e lak yigit lak woraso komo nak irit woragij-o.

¹⁷ Nde, misik tarem-e kwe togwe iri ambara iri na-ge kugwi woramu, nde, woralar-e, mondok kugwi wirid iri na-ge nggokma angin mbud yosolar-e, wat yij-o.

¹⁸ Wat yosoloma, kwe togwe iri na-nen Elia yak tosolar-e: ”Mbal Pem Nagawan ndegel oboso nap wa-e. Nab-o. Kar-e noluk-nen yu nggal kwat nigiben-o? Kat an neram lobok yigen yu-ge an meya yidnak ereba na Mbal Pem Nagawan-nen nimbiri parosolat, an-nen meya kwaroso iri na-nen ndowaga nambara yu wat yuwakluk lobok yigenma, lak?” luk yak tij-o.

¹⁹ Yosoloma, Elia-nen onggo yosolar-e: ”La iri-ge wok niri-o” yak tosoloma, waruk lobok yosola-ge, ija inggem-nen la iri na Elia-nen wanosolar-e, at worasu sa silabaga iri na me at ondoro kuri worak iri na me waruk lagarik nggosolar-e, la iri na-ge nene yugwi ondoro bem mbinggirik puruk,

²⁰ mondok ene nggoksa tepan yosolar-e: ”Nagawan Indo Nembal Pem Nagawan wa-e. Noluk-nen inndi kalok tak poso mende yu-ge kwe togwe yu ebem pil lobok yigen-o? At-nen-e an luru wok yosola wolmomtak ondoro wok nirij-et nde, kar-e at ambara yu wirigen-o!” luk tepan yij-o.

²¹ Yosolug-e, la iri na imid pem-et erare nggwe yebaksa mbiring luk, pugak luk kenan pem-et kwarosolat-nen tepan yosolar-e: ”Nagawan Indo Nembal Pem Nagawan wa-e. La yu-ge uruk tak pi-o!” luk yij-o.

²² Yosola-ge, Nagawan Indo-nen-e Elia-nen tepan yid iri na kulurug-e, la iri na-ge indisep wok yosolar-e, mondog-et uruk yij-o.

²³ Uruk yosoloma-ge, Elia na-ge at nene yoso sa-nen la na waruk mbuwasolar-e, ija wok tosolat-nen yosolar-e: ”Kwe yu-ge wa-e. Kambara na-ge tuguruk uruk yamu-o!” luk wok tij-o.

²⁴ Yosoloma, kwe togwe iri na-nen yosolar-e: ”Yawo-nen perak mondok naru yusu-o. Kar-e ndemeret Mbal Pem Nagawan ndegel oboso nab-er-o. Kat-nen yusu wene-ge ndemeret Nagawan Indo-nen yidnak wene-t yusu-o” luk yak tij-o.