1 NAGAWAN NAGAWAN-NEN KWARIDNAK WENE 16 - Nanduk Ngget Tul Pidnak Wene

Isarael nap Nagawan Akap-nen kwaridnak wene 16:29-34

²⁹ Yewura nap Nagawan Asa-nen Yewura nap tena unpuruk woralat olengen tiga pulu delapan (38) worala-ge, Omiri ambara Akap iri-ge Isarael nap ennggendumu nagawan men luk, Isarael nap tena unpuruk o Samaria iri me woralar-e, olengen dua pulu dua (22) irit woragij-o.

³⁰ Nde, at-nen meya kwarij-e, nagawan nanduk woraiga ereba-nen meya kwariga-ge te nggal-et nde, ar-e Nagawan Indo erengen pem mondok yi meya ndi meya terak minik irit kwat tenak woragij-o.

³¹ Ar-e Nagawan Yerobeam-nen meya kwat tenak woragid iri na nggal meya kwarosolar-et nde, ereba na-ge ebem lobuk ala, Siron nagawan Etmbaal ara Isebel iri na wanosolug-e, kugwi Mbaal erembel wanosolat woragij-o.

³² Iri kwarosolar-e, kugwi Mbaal erembel wanurak uwi-ge Samaria iri me wirij-o. Wutluk o iri na arem-e kugwi Mbaal iri na amanggim wam wosa kan purak ondoro misik konij-o.

³³ Iri rak puruk, at-net kugwiwak Ndewi Asera ut mimirik misik ndak wosa bij-o. Nde, at-nen meya kwarosolar-e, at ndet yigit lak ma-nen Isarael nap nagawan o tena woraiga oboksa ereba-nen meya kwariga nggal-e lag-o. At-nen-e yi meya ndi meya terak minik irit kwarosolat woragij-o. Iri kwarosola-ge, Isarael nap-nen erembel wanugwi Nagawan Indo Mbal Pem Nagawan iri na-ge mondok isilepma rak pij-o.

³⁴ Nde, Akap-nen o tena worala tarem-e o Yeriko siri langgurak iri na-ge Mbetel nap Iel-nen-e o siri iri na-ge tuguruk wirij-o. Alat nde, awo ma-nen Nagawan Indo-nen Nun ambara Yosua emndam tak pid iri na ndak ndak kwat yosolar-e, Iel ambararak mberen wat yiga-ge yu nggal-o: Iel-nen o siri iri na mabin posolar-e, ambara manggu Abiram na wat yij-o. Nde, Iel-nen o pak tumende iri na tuguruk kona lerak posolar-e, at ambara labo Segup iri na-ge wat yij-o.