1 NAGAWAN NAGAWAN-NEN KWARIDNAK WENE 13 - Nanduk Ngget Tul Pidnak Wene

¹ Nde, iri tarem-e Mbal Pem Nagawan ene lomboksa yoso nap misig-e o Yewura woragij-o. Worasoma-ge, Nagawan Indo-nen-e: ”Mbetel mbiri-o” yak tij-o. Yosoloma, mberarik Mbetel wok yidnggal-e, Yerobeam iri na-ge wam wosa kan peyekluk kan pugwi sa lagarik worasoma wok yij-o.

² Nagawan Indo-nen yidnak pem-et ene nggoksa wam wosa kan pugwi ondoro iri na yak tosolar-e: ”Kat wam wosa kan pugwi ondoro yu-ge wa-e. Wam wosa kan pugwi ondoro kat yu-ge wa-e. Nagawan Indo-nen-e yu nggal yij-o: ’La marik mbi unu-ge Yosia Ndaut-nen nderak pem-nen ndesa mbuwa-o. Wam wosa kan pugwi ondoro wa-e. Kat kebem-e Yosia-nen-e kugwiwak amanggim kan pugwi tepan ombo kugwiwak erembel wanugwi sa-nen kugwiwak amanggim wosa kan pugwi nab-e kat kebem wosa kan onposolat, onowak min-et kebem kan puwa-o’ yij-o” luk yak tij-o.

³ Iri yak tosoluk erep min-et yosolar-e: ”Wam wosa kan pugwi ondoro yu-ge mijara langgu yosolat, mabe-ge kuluksa mbuwa-o. Iri kwaruwa iri-ge kat-nen yebet kasolar-e: ’At yu-ge Nagawan Indo-net ebem pamu yid kagi’ luk karu makluk-nen kwaruwa-o” luk yak tij-o.

⁴ Iri yosola, Yerobeam-nen kulurug-e, inggi ndum Mbal Pem Nagawan ene lomboksa yoso nap iri na wok tosolat-nen yosolar-e: ”Ap yu-ge mondok tenagurag-o” luk ene nggoksa yij-o. Alat nde, Yerobeam inggi ndum ap iri wok tosolat ndimirik pid inggi iri na-ge lud tak purak meya mondok nggwelsa labuk yij-o.

⁵ Mbal Pem Nagawan-nen ebem pidnak pem Mbal Pem Nagawan ene lomboksa yoso nap iri-nen yid iri na ndak ndag-et kwarosolar-e, wam wosa pugwi ondoro iri na mimo mijara mbosolar-e, mabe na-ge nggilara nggweyakma mbij-o.

⁶ Iri ala karuk, Nagawan Yerobeam-nen Mbal Pem Nagawan ene lomboksa yoso nap iri na yak tosolar-e: ”An ninggi konak tak puwakluk kat-nen Nagawan Indo Kembal Pem Nagawan iri emengen mbari-o” luk yak tij-o. Yosoloma, Mbal Pem Nagawan ene lomboksa yoso nap iri na-nen tepan Nagawan Indo nggi yak tosola-ge, nagawan iri na inggi-ge konak yij-o.

⁷ Iri luk Yerobeam-nen Mbal Pem Nagawan ene lomboksa yoso nap iri na yak tosolar-e: ”An nama nunggwi mende nonggolat, narengge mende siyak we wok korosolat kwareyek-nen lobok yi-o” yak tij-o.

⁸ Yosoloma, Mbal Pem Nagawan ene lomboksa yoso nap iri na-nen yosolar-e: ”Nagawan kat-nen karengge mende erep wok nururak yugun-et nde, nagawan kat karengge wanosolat, kimin mbutluk, yi min nunggwi mende min nasolat mondok kwarimin pug-o.

⁹ Nagawan Indo-nen-e watsa yak norosolar-e: ’Yi min nunggwi mende min norak pug-o. Nde, tula na mburugun nggwe-ge lobok yurak pug-o’ yak neramu-o” luk yak tij-o.

¹⁰ Iri nggal yidnak me, Mbal Pem Nagawan ene lomboksa yoso nap iri na-ge mborosolar-e, tula nin nggwe mbirij-o. 13:11–16:28 Pasal yeba arem-e Mbal Pem Nagawan ene lomboksa yoso nap-nen Isarael nap Nagawan Yerobeam iri na watsa yak tosolar-e: ”Kugwiwak erembel wanurak pug-o” luk yak tij-et nde, nagawan iri na kondok yigit lak, kugwiwak erembel wok tenak woragij-o. Iri kwarosoma, Yewura nap Nagawan Ereabeam wat yosola, ondolma Abiam men agaij-o. Nde, Abiam iri na wat yosola, at ambara Asa iri na nagawan men agaij-o. Nde, Nagawan Yerobeam min-et wat yosola, ondolma-ge nagawan kwarat men luk, abam nggwe (utara) ambigit woragwi tenagidnak wi it-nen nagawan men yik tenak woraiga-o.