1 NAGAWAN NAGAWAN-NEN KWARIDNAK WENE 12 - Nanduk Ngget Tul Pidnak Wene

Isarael nap abare abam (utara) nggwe woragwi nap-nen: ”Nenarig-et men mul-o” luk yidnak wene 12:1-20

¹ Nde, Isarael nap abare abam (utara) nggwe woragwi ereba na-ge Ereabeam nagawan mendak purak pem yik karok Sikem iri me ndok worak woragola karuk, Ereabeam-e Sikem mbirij-o.

² Nde, ereya tarem-e Yerobeam Nebat ambara iri na-ge Salomo aye-nen Mesira mberarik worasoma, Ereabeam obok kulurug-e, tuguruk ar-e Isarael uwi lobok yij-o.

³ Nde, Isarael nap abare abam (utara) nggwe woragwi nap-nen-e Yerobeam yonggo puruk lambuksa Ereabeam eram mbirigarik-nen yogolar-e:

⁴ ”Kat keid Salomo-nen-e nir-e angin worak nenpem pamu-o. Nde, nagawan kat-nen nde angin worak nenpem pid iri nde siyak te nggal nenpem posolat, nit-nen andi bandi kagwi na siyak marik tak posolat kwarosola-ge, nir-e kat ndegel kubul-o” luk yak tiga-o.

⁵ Yogoloma, Ereabeam-nen yosolar-e: ”An-e awo nindi yebet kamin-o. Kir-e mburugupndik, kenan pem woraruk-nen lobok yurag-o” yosoloma, it iri na-ge mbiriga-o.

⁶ Mborogola-ge, at eid Salomo nggomo wurugwi nap indi worak ereba na at-nen yurak wene-ge yak tuwakluk kin wok onposolar-e: ”An-nen-e ap ereba-ge wene onggo-ge no yak indimin-o? Kit kinndi-nen-e wene onggo-ge ngge yak undurak perali-o?” luk kin wok inpij-o.

⁷ Yosoloma, it-nen onggo yogolar-e: ”Nagawan kat-nen nde kat kindipma nap ndemeret ndegel unpurak perasolar-e, it enne kulugun-o. Iri kwarugun nde ala-ge, it-nen na pem irit kat ndegel kobogolat wolma-o” luk yak tiga-o.

⁸ Iri yak tiga-t nde, ap indi worak-nen yak tiga wene ereba na-ge Ereabeam-nen-e keya buruk, at anggul mbilit ap sujwe at nggomo wurugwi nap ereba na endam mbirij-o.

⁹ Mberarik, it inmin kin wanosolar-e: ”Ap ereba-nen enpem angin pidnak ereba marik tak purak yak norogola-ge, an-nen-e wene onggo-ge no nde yak indimin kali-o?” luk kin wok inpij-o.

¹⁰ Yak ondosoloma, it-nen onggo yak togolar-e: ”Nagawan kat-nen-e wene-ge yu nggal yak undurag-o: ’An-e namawi lag-et nde, neid amawi-ge teberak puruk, an namawi-ge terak minik ombol nggwe-net yusu-o.

¹¹ An neid-nen-e angin worag-e mondok angin kwarat kenpem pij-et nde, an-nen-e tuguruk angin worag-e ebem tebesa pimin-o. At-nen-e we linggamburok yembak tak konposo-t nde, an-nen-e posid-nen konidnak isile worak pem nggwin keneyamin-o’ luk yak unduguna-e” luk yak tiga-o.

¹² Nde, it na-ge kenan tarem worarug-e, Yerobeam min ap erep oboksa min Nagawan Ereabeam-nen lobok yurak urul yak indid iri na ndak ndag-et eram lobok yiga-o.

¹³ Ar-e ap indi worak ereba na-nen yak tiga wene iri na-ge mbo buruk, Ereabeam-nen ap ereba na wene yak ondosolar-e, ene amawi min mbaroksa yak indij-o.

¹⁴ Yak ondosolar-e, ap sujwe at anggul mbilit-nen yak tiga ereya na-t yak ondosolar-e: ”An neid-nen-e angin worag-et kenpem pij-et nde, an-nen-e mondok nambena angin worag-e nggoksa-t kenpem pimin-o. At-nen-e linggamburok pem nak yembaksa kondoso-t nde, an-nen-e linggamburok posid-nen konidnak isile worak pem nggwin keneyamin-o” luk yak indij-o.

¹⁵ Iri yak ondosolar-e, it-nen nggi yiga wene-ge no mende nggal tak pij-o. Alat nde, iri kwarid iri-ge Nagawan Indo indi-n pidnak pem-et kwarij-o. Nebat ambara Yerobeam kwat uburak wene Nagawan Indo-nen o Silo woraso Mbal Pem Nagawan ene lomboksa yoso nap Agia yak tid iri na mondok kwar-et makluk-nen iri-ge yij-o.

¹⁶ Isarael nap ereba-nen yik kaiganggal-e, nagawan iri na-ge it enne-ge kuligit lak ala karug-e, Isarael nap oboksa-nen enne nggoksa yogolar-e: ”Ndaut min at-nen wigarak min-nen-e nit Isarael nab-e no kwat nunpugwi-o? Abalombog-o! Nenma mburuwog-o! Ereabeam iri-ge at abalombok nak-nen kwaruwag-o” yogoluk, Isarael nab-e enma mbiriga-o.

¹⁷ Mbirikma, Ereabeam iri na-ge Yewura nap enarik nak enanggul pem nagawan woragij-o.

¹⁸ Insilepma iri nggal-et woragola-t nde, Nagawan Ereabeam-nen-e ap yabu onggo lak wanogola yik eneyarok woraso Andoniram iri na Isarael nap endam wirik pij-et nde, ap iri na-ge kerep pem nak mondok wiriga-o. Iri yogola karug-e, Ereabeam na-ge ndag-et nak onggweyak koma bem kwiye Yerusalem mbirij-o.

¹⁹ Nde, iri kuri-nen Isarael nap abare abam (utara) nggwe woragwi nap-nen-e Nagawan Ndaut-nen wigarak nagawan ereba na inmin-e: ”Nenarig-et men mul-o” luk yugwi-o.

²⁰ Nde, Isarael nap-nen kuliganggal-e: ”Yerobeam na-ge Mesira-nen tuguruk lobok yij-o” yogola kulurug-e, misik me wene mbarogolar-e, at yonggo puruk, Isarael nap enanggul pem irit nagawan mendak piga-o. Nde, it enlem Yewura nap-nen perak Ndaut-nen wigarak nagawan ereba na tugup lak enne nak kologolat woraiga-o.

Mbal Pem Nagawan ene lomboksa yoso nap Semaya-nen: ”Iri nggal kwat ma-o” luk urul pidnak wene 12:21-24

²¹ Nde, Nagawan Ereabeam iri na Yerusalem wok yosolar-e, enlem Yewura nap min Mbenyamin nap min san ombo mondok wim wari nak enpe seratus delapan pulu ribu (180.000) irit ndok worak unpurug-e, Isarael nap enlem abare abam (utara) nggwe iri na inmin wim mbatluk, tuguruk wanurak irit yebet kagaij-o.

²² Alat nde, Mbal Pem Nagawan-nen at ene lomboksa yoso nap Semaya yak tosolar-e:

²³ ”Wene yu-ge Ereabeam min enlem Yewura nap min Mbenyamin nap min oboksa yak indi-o:

²⁴ ’Kit kennggamirak Isarael nap inmin-e wim mbarurak pug-o. Mondok kenma mberer-o. Nde, iri kwariga iri-ge an nindi-nen pidnag-er-o’ yak indi-o” luk yosoloma-ge, it oboksa-nen Nagawan Indo-nen yak indidnak wene iri na-t kulurug-e, enma lombok ndibi ndi yiga-o.

Yerobeam-nen Nagawan Indo keya bidnak wene 12:25-31

²⁵ Yerobeam iri na-ge Isarael nap nagawan men lug-e, Eperaim nap unuwi nggweyak ndobo worak nggwe o Sikem iri na me-t o siri-ge amawi rak pij-o. Amawi rak purug-e, luru iri na me-t woragij-o. Woraruk, iri na me-nen mberarig-e, o siri Penuel iri me-t amawi rak pij-o.

^26-27 Amawi rak puruk woralar-e, at-nen yebet kasolar-e: ”Isarael nap yeba nde yawo-nen kwatli yeba nggal-et Nagawan Indo amanggim wam wosa kan purak Nagawan Indo uwi Yerusalem iri na me mbererenak woragolar-e, Yewura Nagawan Ereabeam ambigit nak wat kagolat, an-e nuruwa yur-a?” luk yebet kagaij-o.

²⁸ Indi iri nggal yebet kasolug-e, at-nen-e sapi mberen emas pem-nen ndak wosa puruk yarik, at-nen Isarael nap yak ondosolar-e: ”Kit Isarael nab-e Nagawan Indo erembel wanurag-e Yerusalem ndak mborogolat woraigeb-o. Yawo-ge kunkugwiwak Mesira-nen lesa wok kunpuruk lobok yid na-ge yar-o” luk yak indij-o.

²⁹ Yak undurug-e, Yerobeam-nen-e sapi ndak worak ereya na-ge misig-e o Mbetel puruk, nde, misig-e o Ndan puruk kwarij-o.

³⁰ Iri kwasa pamu, Isarael nab-e ereya na erembel wil ap ereb-e Mbetel mborogolat, nde, ereb-e Ndan mborogolat kwarogolar-e, mondok meya irit kwariga-o.

³¹ Erep kwarosolar-e, Yerobeam-net kugwiwak erembel wanurak ondoro-ge ndobo bem ereba me konil lobok yij-o. Iri rak purug-e, tepan ombo-ge Lewi nab-e lak, are, we nap irit lenak inpij-o.

Mbetel iri me-nen erembel wanugwi iri na-ge Nagawan Indo-nen imbiri lamut tak pidnak wene 12:32–13:10

^32-33 Iri rak purug-e, Yerobeam-nen-e tepan ombo-ge wam wosa kan posolat wolmomtak Mbetel iri me inpij-o. Nde, at ondomok-nen na sapi ndak wosa pid iri na amanggim wam wosa kan posolat woragij-o. Yewura nap-nen wam wosa Nagawan Indo amanggim kan pogolat nggok sakwi ereba na nggal-et at-nen waneya min tanggal min watsa posolar-e, waneya delapan tanggal lima belas iri bem-e wam wosa kan pogolat nggok sakolat wolmomtag-o luk watsa pij-o. Yosoluk, iri na tarem-et Yerobeam na-ge waneya min tanggal min watsa pid iri na bem at nanduk-nen anggul-et tel korosolar-e, Mbetel mberarik, wam wosa kan pij-o.