1 NAGAWAN NAGAWAN-NEN KWARIDNAK WENE 11 - Nanduk Ngget Tul Pidnak Wene

Nagawan Salomo-nen Nagawan Indo keya bidnak wene 11:1-13

¹ Nde, Nagawan Salomo iri na-ge enlem nin kweyap ereba na enpem indi poso-o. Mesira nap nagawan ara wanid iri na min-et erep wanosolar-e, Et kweyap min Moap kweyap min Amon kweyap min Erom kweyap min Siron kweyap min irit wok inpij-o.

² Nde, Nagawan Indo-nen Isarael nap eneyanggo tenagosolar-e: ”Isarael nap-nen enlem nin kweyab-e mondok wanurak pug-o. Nde, wanogola-ge, kweyap ereba na-nen ndowaga kugwiwak erembel wanugub-o” luk yak indij-et nde, Salomo iri na-ge enlem nin kweyap wok inpil lobok yij-o.

³ Salomo-nen wanosolar-e, ap nagawan enararak nak tuju ratus (700) irit wanij-o. Nde, erep tiga ratus (300) ereya-ge indi-nen nomosa wok inpigit lag-et nde, inmin nak nene yoso-o. Iri kwarosolar-e, ogwerak ereba-nen ndowaga Salomo iri na-ge Mbal Pem Nagawan keya bij-o.

⁴ Nde, Salomo iri na ap indi worak pem-e ogwerak-nen-e Salomo na-ge arem ngen waga kugwiwak erembel wanoso rak piga-o. Nde, Salomo eid Ndaut iri-ge tugup lak Nagawan Indo Embal Pem Nagawan-nen yidnak nak kwarosolat woraso-t nde, Salomo-ge eid-nen kwaroso nggal-e kwarigit lag-o.

⁵ Nde, Salomo-nen-e Siron nap unkugwiwak Asoret iri na erembel wanosolat, Amon nap unkugwiwak Molok meya iri na erembel wanij-o.

⁶ Salomo eid Ndaut iri-ge mondok ndemeret indi min-et Nagawan Indo imbirik mboroso-t nde, Salomo-ge Nagawan Indo imin meya kwarij-o. Eid-nen kwarid nggal-e kwarigit lag-o.

⁷ Iri kwarosolar-e, Yerusalem-nen ndobo bem mo luwaso (timur) ambigit nggwe ereba me Moap nap unkugwiwak Kamos min Amon nap unkugwiwak Molok min erembel wanurak ondoro kona ndama mendaga pil lagaij-o. Nde, kugwiwak mberen ereya-ge yik karug-e, mondok sok wururak mende-o.

⁸ At Salomo-net erep kwarosolar-e, ogwerak enlem nin kweyap oboksa ereba na unkugwiwak ndomok amanggim emben worak kan pogolat, amanggim wam wosa kan pogolat kwarurak ondoro konil lobok yij-o.

^9-10 Nde, Nagawan Indo Isarael nap Enmbal Pem Nagawan-nen-e mberen pem-et Salomo imbiri bem nam yosolat-nen indi yeberak obosolar-e: ”Kugwiwak nin nan-e mondok erembel wanurak pug-o” yak tij-et nde, Salomo-ge Nagawan Indo-nen yidnak yidnag-e kwarigit lak, Nagawan Indo nde keya bosola, Nagawan Indo isilepma-ge Salomo iri na ebem pij-o.

¹¹ Iri yosolat-nen yosolar-e: ”Kar-e kindi-net an nimin urul pigen iri na kwid tosolat, an-nen kebem pigi ndak ndag-e kwarusu bug-o. Iri kwarosola me, kat-nen tenagidnak wi yu-ge an-nen tuguruk waga kat keyabu wanoso nap mbi wok timin-o.

¹² Iri-ge kwarimin-et nde, an-nen keid Ndaut yebet karug-e, kat worala ya tarem-nen-e kwarimin pug-o. Are, kat kambara-nen o tena worala tarem-net kwarimin-o.

¹³ Alat nde, iri-ge at-nen tenagidnak wi oboksa at inggem-nen wanimin pug-o. Are, ndegel noboso nap Ndaut min Yerusalem an nuwi siri rak pigi iri na min nindi yebet kasolar-e, Isarael nap enlem ennggendumu-nen enlem misiget nak kat kambara inggem keya bimin-o” luk yak tij-o.

Salomo imin sirid nap 11:14-25

¹⁴ Nagawan Indo-nen-e Erom nap nagawan-nen wigarak Arat iri na arem yabu wanosola, Nagawan Salomo imin sirid mbarosolat woragij-o.

^15-16 Iri kwarigit lak ma-ge Ndaut-nen Erom nap urugwe nggwe rak inpidnak ombol nggwe-ge Ndaut-nen idnak san ombo onowe Yoap iri na-ge at nap indidnak ereba na yapma unpurak Erom nap enma mbirij-o. Mberarik, at imin nugwi nap inmin Erom woralar-e, waneya enam woraiga-o. Nde, iri tarem iri woragolar-e, iri me woragwi nab-e oboksa indiga-o.

¹⁷ Alat nde, ap Arat iri na nak perak usujwe bem-e Erom nap erep at eid ndegel ubugwi nap inmin-et kwiye Mesira mbiriga-o.

¹⁸ Mborogolar-e, Mirian-nen mbirigarig-e, Paran wok yiga-o. Nde, iri me-nen-e ap erep inmin lambuk luk Mesira mbiriga-o. Mbirigarig-e, Mesira nagawan iri na eram wok yogola-ge, Mesira nagawan iri na-nen-e Arat iri na-ge at wolmomtak o min nggweyak min wok turuk, nunggwi mende mak tosolat woragij-o.

¹⁹ Iri kwarosolar-e, Arat iri na-ge Mesira nagawan iri na anggam kwat yij-o. Iri rak purug-e, Mesira nap nagawan iri na-nen-e at ogwe Tapenes owot iri na-ge Arat wok tij-o.

²⁰ Wanuruk woralar-e, Arat ogwe iri na-ge liap misik ndaguruk, unu-ge Nggenubat yarij-o. La iri na-ge nagawan ogwe iri na-nen nggok tak posolat, nagawan elirak inmin nagawan woraso sa woragij-o.

²¹ Nde, Arat iri na woralat-nen kolel kagaidnggal-e: ”Nagawan Ndaut min Ndaut-nen idnak Isarael nap san ombo onowe Yoap min ereya na wat yiga-o” yogola kulurug-e, Arat-nen Mesira nagawan iri na yak tosolar-e: ”An nama tuguruk mbereyek-nen lerak nibi-o, nab-o” luk yak tij-o.

²² Yosoloma, nagawan-nen kin wok obosolar-e: ”Noluk-nen mbururak yusu-o? Kar-e yu me-ge no lak ala-nen tuguruk kama mburugun-o?” yosoloma, at-nen yosolar-e: ”An-e mondok ndak worasu-t nde, nama mbereyek-nen lerak keya nibi-o” yosoloma, keya bamu ama mbirij-o.

²³ Iri-nen Mbal Pem Nagawan-nen na Elyara ambara Ereson iri na Salomo imin sirid nap tag-et ibij-o. Nde, Ereson yu-ge Soba nagawan Arareset ndegel oboso nab-et nde, keya buruk mbiridnak nab-o.

²⁴ Nde, Arareset iri na-ge Ndaut-nen-e urugwe nggwe rak unpuruk, anggamtak Siria nap min-et endamu-o. Nde, iri tarem-e Ereson iri-ge Arareset ndegel oboso-t nde, keya buruk mberarik, ap erep ndok worak unpurug-e, ap nden unpugwi nap lit unpuruk noso nap kwat yij-o. Kwatlug-e, at min at imin nugwi nap min o Ndamsik mberarik, o Siria iri me-t woragij-o. Woralar-e, at imin nugwi nap-nen-e Siria iri me nagawan tak ibiga-o.

²⁵ Nde, Salomo worala tarem-e Nagawan Ereson iri na-ge Arat-nen kwaroso nggal-et Isarael nap inmin sirid mbarosolat, Isarael nap woragwi sa nari wari rak posolat woragij-o.

Mbal Pem Nagawan-nen Yerobeam kwat uburak urul yak tidnak wene 11:26-40

²⁶ Nde, ap misik Salomo imin eyak wat tenak woragij-e at ondomok eyabu wanoso nap unu-ge Yerobeam irir-o. Nde, Yerobeam iri-ge Eperaim nggweyak pem o Serera woraso Nebat ambara-o. Nde, ija Serua iri-ge kwe togwe-o.

²⁷ Nde, ena nggwe ya-ge Yerobeam-nen Salomo imin eyak wiridnak wene: Nde, Salomo-nen-e Nagawan Indo uwi iri erabet ena nggwe (selatan) ambigit nggweyak iri na yala kek tak posolat, o siri kerep pak leget tuguruk panggara ngget tak pil lobok yosola-ge,

²⁸ Yerobeam min-et yabu-ge wanij-o. Wanosola-ge, Salomo-nen yik kagaidnggal-e, Yerobeam iri-ge mondok amawi worak ebem yemnak ala karug-e, Salomo-nen-e at iri na-ge enlem Manase min Eperaim min yabu lembesa enpem pidnak nap ereba na yik eneyarok wolmomtak mendak ibij-o.

²⁹ Iri rak pamu woralar-e, misik tarem-e Yerobeam na-ge Yerusalem-nen mborosoma, tu ndumu ap lak ma iri me Mbal Pem Nagawan ene lomboksa yoso nap Agia iri na Silo-nen lobok yosolat, sum leyok sum ngget yesa lobok yosoma, lid pid yiga-o.

³⁰ Lid pid luk, Agia-nen-e usum leyok sum iri na yonggorosolar-e, ndela ngara duabelas tak pij-o.

³¹ Iri rak puruk Agia-nen Yerobeam yak tosolar-e: ”Nagawan Indo Isarael nap Enmbal Pem Nagawan-nen kat kimin yosolar-e, yu nggal yak kurusu-o: ’Salomo-nen tenagidnak wi yu-ge an-nen ngara Isarael nap enlem sepulu-ge kat wok kirimin-o’ yidnak me, sum ndelak ndelak ngarak sepulu ya-ge kat wani-o.

³² ’Enlem misig-e an ndegel noboso nap Ndaut min Isarael nap unuwi oboksa enggendumu-nen an nuwi siri rak pigi Yerusalem iri na min ebem nindi yebet karug-e, Isarael nap enlem misiget nak Salomo tena wolma-o.

³³ An-nen iri kwarimin iri-ge Salomo-ge an keya nuburuk kugwiwak erembel wanosolar-e: Siron nap unkugwiwak Asoret min Moap nap unkugwiwak Kamos min Amon nap unkugwiwak Milkom min ereba nak erembel wanosolat, ar-e an nindi-nen pidnag-e kwarusu bug-o. Eid Ndaut-nen an-nen yidnak yidnak min an-nen ebem pidnak min nak kwaroso ereba na nggal-e kwarusu bug-o.

³⁴ Iri nggal kwarosola-t nde, an-nen-e at-nen tenagidnak wi iri-ge oboksa inggem mengga wanimin pug-o. At uruk worala-ge, at-net tena wolmakluk keya bimin-o. Iri kwarimin iri-ge ndegel noboso nap an-nen len ibigi Ndaut-nen an-nen idnak imiri mbarak pidnak wene min an-nen kwarurak ebem pidnak wene min-e ndak ndag-et kwaroso iri na nindi yebet kasolat-nen kwarimin-o.

³⁵ Salomo-nen tenagidnak wi yu-ge at ambara inggem-nen waga ap enlem sepulu-ge kat kinggem pimin-o.

³⁶ Enlem misiget at inggem keya bimin iri-ge an nerembel wanogolat wolmomtak o Yerusalem an-nen lenak pigi iri na me an ndegel noboso nap Ndaut-nen wigarak misig-e nderak pem lud Yerusalem iri me tena wolmakluk-nen enlem misik iri-ge at inggem keya bimin-o.

³⁷ Nde, Yerobeam kar-e Isarael nap ennggendumu nagawan tak kubumu, kat kindi-nen pidnak nggweyak oboksa kat-nen tena buruk wolmomtak irit keberasu-o.

³⁸ Kat-nen nde an ndegel noboso nap Ndaut-nen kwaroso nggal, an-nen idnak imiri mbarak pidnak wene-nen yidnak yidnak kwarosolat, kindi ebis-et an-nen yidnak ndak ndak kwarosolat, an-nen kwarurak kebem pidnak ereba oboksa kwarosolat, an nindi alen tak posola-ge, an-e pempa kimin-et woramin-o. An-nen kar-e Isarael iri me nagawan tak kibimin-o. An-nen yongga korosola-ge, kat-nen wigarag-e an-nen Ndaut kwarak ibigi iri na nggal-et Isarael nap ennggendumu nagawan men yogolat wolma-o.

³⁹ Nde, Salomo-nen meya kwarusu bem-e an-nen-e Ndaut-nen wigarag-e angin worak enpem pimin-et nde, pem abu abu-ge kwat inpimin pug-o’ yij-o” luk yak tij-o.

⁴⁰ Nde, wene iri na waruk waruk Salomo-nen kulurug-e, Salomo-nen-e Yerobeam wereyekluk yij-et nde, Yerobeam iri na-ge Mesira iri me Nagawan Sisak eram mbirij-o. Mberarik, worasoma Salomo na-ge wat yij-o.

Salomo wat yidnak wene 11:41-43

⁴¹ Salomo-nen kwaridnak wene erep at-nen kwaridnak wene min at-nen aru yidnak wene min oboksa-ge Salomo-nen Kwaridnak Miridnak Mbarak Engga iri na arem mbariga-o.

⁴² Salomo-nen Isarael nap oboksa tena unpuruk Yerusalem iri me nagawan woralar-e, olengen empat pulu (40) irit woragij-o.

⁴³ Woraruk, Salomo na-ge wat yamu, Ndaut uwi siri iri na me-t yapma ibiga-o. Iri rak purug-e, ambara Ereabeam iri na-t ondolma nagawan men yij-o.