1 NAGAWAN NAGAWAN-NEN KWARIDNAK WENE 10 - Nanduk Ngget Tul Pidnak Wene

O Seba kwe nagawan misik Salomo kil lobok yidnak wene 10:1-13

¹ Nde, o Seba kwe nagawan iri-ge Salomo anggu obok mborosola kulurug-e, kwe nagawan iri na-nen-e wene angin worak onggo nggesa yurak nggal ereba na Salomo indi ngarurak Yerusalem lobok yij-o.

² Kwe iri na lobok yosola-ge, imin-e ap kwarat nduguluk lobok yiga-o. Nde, unta wam ombolwak pem-e nunggwi mende bem undu worak tak pugwi mende min kerep abinal worak min emas kwarat min irit ombol pem puruk waruk lobok yij-o. Lobok yarik, Salomo eram wok yosolar-e, kwe nagawan iri na-nen-e at-nen yebet kagaid wene ereba na oboksa Salomo indi ngarij-o.

³ Iri yosola-ge, Salomo-nen-e kin wok ibid wene ereba na-ge oboksa onggo nak yij-o. Misiger-o luk tet at-nen onggo yurak meya ala, mbi keya bigit lag-o.

⁴ Iri ala karug-e, o Seba kwe nagawan iri na-ge at ondomok-nen Salomo indi nggat nggat kwiye worak iri na erengen-nen karuk aru yij-o. Salomo wolmomtak uwi wirid iri na kagaij-er-o.

⁵ Salomo eyabu wanugwi nap-nen yabu wanurak timbirik engga ereba na min it-nen yabu wanogolat-nen sum ndak ndak yurugwi min it unuwi min it-nen norak yi min nunggwi mende min nokluk saga pidnak ereba na min sakwi nap-nen nggok sakolat-nen kwarugwi min Nagawan Indo uwi iri na me Salomo-nen Mbal Pem Nagawan amanggim poso ereba na min ereba na oboksa kasolar-e, kwe nagawan Seba-nen lobok yid iri na-ge ijar-o luk wi yij-o.

⁶ Karuk, kwe iri na-nen Nagawan Salomo yak tosolar-e: ”An nama woralat-nen kat kindi nggat nggat obok min kat kobok min kolosolat woragi na-ge ndemeret ndak ndag-et kolosolat worakmu kagi-o!

⁷ Nanduk an-nen kulurug-e, narem-e nggwigit lag-o. Alat nde, an nebe-t lobok yigirik nerengen ki-nen kasu-o. Iri yosolat-nen perak ndemerer-o luk naru yusu-o. Nama woralat-nen kwiye worag-et koloso-t nde, ereba na-ge siyak teberak nggal nde koloso-o. Nde, nerengen ki-nen kasu-ge mondok terak minik irit kasu-o. Nde, an-nen kasolar-e, kat kindi nggat nggat elem min kat karenggi karengge min-e obok kolosolat woraso iri na nggal ndak ndag-e lag-o. Are, terak minig-et kasu-o.

⁸ Kat kogwerag-e enalen worak worali-o! Kat keyabu wanugwi nab-e pempa ndegel keberenak woragolat, kat-nen idnak kindi nggat nggat elem iri bem-nen kat-nen wirik pusu wene iri enlengen-nen kali bem-e mondok konak lombok-nen yusu-o!

⁹ Nap kat Kembal Pem Nagawan, Nagawan Indo-ge erembel wanogolat wolmag-o! Kar-e at-nen alen kebem puruk Isarael nap nagawan mendak kibij-o. Nde, at-nen-e Isarael nap kenabuwa-ge pem kundugu irit kasolat me, kat-nen at-nen idnak imiri mbarak pidnak wene min mot mot nak kwaroso min waruk kek tak ponokluk, kar-e Isarael nap ennggendumu nagawan mendak kebamu-o” yij-o.

¹⁰ Iri yosoluk yarig-e, o Seba kwe nagawan iri na-nen-e at-nen waruk lobok yid mende ereba na-ge we irit Salomo wok tij-o. Nde, wok tosolar-e, emas angin empat ribu (4.000) kilogram ombol nggwe min kerep abinal worak kwarat min nunggwi mende undu rak pugwi mende ereba na min oboksa Salomo eram nak kegera keya bij-o. Nde, nunggwi mende undu rak pugwi mende o Seba kwe nagawan iri-nen wok tid kwarat ereba na nggal-e Salomo worasolar-e, ereba na nggal mbi erengenma yoso bug-et nde, wok tij-o.

¹¹ (Nde, Nagawan Iram-nen idnak yi koma ereba na-nen-e Salomo amanggim-e Opit-nen waruk lobok yidnak emas min kerep abinal worak min e libe min mondok kwarat irit waruk lobok yiga-o.

¹² Nde, e iri na-ge Salomo-nen-e Nagawan Indo uwi iri na min at woraso uwi iri na min worogolat, nde, ereb-e ndawi yugwi nap enmanggim kecapi poba min nggambus poba min koniga-o. Nde, e ereba-ge libe-o. E mondok konak lombok Yerusalem waruk lobok yiga iri-ge iri nggal mbi mondok kagwi bug-o.)

¹³ Salomo-nen arengge mende Seba kwe nagawan iri na wok tosolar-e, at-nen ap erep eram lobok yosoma, wok ondoso ndak ndag-et wok tosolar-et nde, ereb-e kwe iri na-nen nggi yidnak mende min-et wok tij-o. Wok tamu-ge, kwe iri na-ge at nduguluk lobok yiga nap inmin-et nduguluk ama Seba mbirij-o.

Salomo isilobulo wene 10:14-29

¹⁴ Pempa olengen ndak wosa olengen misik arem-e Salomo wok togolar-e, emas angin dua ribu tiga ratus (2.300) kilogram irit wok togolat woraiga-o.

¹⁵ Nde, emas wok tiga iri eralu erep wok togolar-e, insilobulo onggo wanogolat, lesa waniga erep min silobulo onggo onggo kwarugwi nap-nen na lesa waniga erep min Arap nagawan ereba na min Isarael iri me woragwi ngguberenot ereba min-nen wok tidnag-e wonarigit lag-o.

¹⁶ Nde, Salomo-nen-e tagun nggok duaratus (200) irit konij-o. Ereba na konosolar-e, emas angin-e tuju kilogram ombol nggwe nggal pem-nen tagun ereba na bem mbeyok til lobok yij-o.

¹⁷ Nde emas pem-e tagun marig-e tiga ratus (300) irit konij-o. Ereba konosolar-e, tagun ereba na bem-e emas angin-e dua kilogram nggal pem-nen mbeyok til lobok yij-o. Konurug-e, tagun konid ereba na-ge o worak misik unu-ge Libanon Wal Uwi iri na arem ndok wosa pil nggwij-o.

¹⁸ Nde, at-net misik konosolar-e, nagawan-nen koreyak woragwi nggok misik konij-o. Iri konosolar-e, nggaja wam eyak min ebem lop nok til lobok yosolat, emas kopkap lak-nen umuruk wosa konij-o.

¹⁹ Koreyak woraso iri-ge inggi worak irit konij-o. Nde, inggi ereya na bem ponok ponog-e singa ndakngge ndak worak pij-o. Nde, koreyak woraso iri ombol nggwe-ge sapi anggulwak ndak worak pij-o. Nde, ebem lorag-e ndanggi enam mbarij-o.

²⁰ Nde, ndanggi ereya na erep ponok ponog-e, singa ndakngge ndak wosa pij-o. Nde, singa ndakngge ndak worak ereya lambuksa-ge duabelas-o. Nde, at-nen koreyak woraso konid iri-ge nagawan erep-nen tenagidnak uwi ereba na me-ge iri nggal mbi mondok woraso bug-o.

²¹ Nde, at-nen yi naso embe ereba-ge oboksa emas pem nak-nen konil lobok yij-o. Iri-nen o mot worak misik unu Libanon Wal Uwi iri arem woraso oboksa na emas kopkap lak pem nak-nen konidnag-o. Nde, Salomo woragid tarem-e perak iri-ge ebe lak mende rak pogolat woragolar-e, perak pem-nen mbi mondok konigit lag-o.

²² Nde, Salomo-nen idnak koma yi koma-ge kwarat woragij-o. Woralar-e, Iram-nen idnak koma yi koma ereba na min-et yi koma ombolwak pem mborogolat woraiga-o. Nde, mbutlug-e, koma ereba na-ge olengen kenan arem-e misik pem nak emas min perak min nggaja wam eyak min kera min towe lambu nggal min waruk lobok yogolat woraiga-o.

²³ Nde, Nagawan Salomo iri-ge nagawan erep nggal-e mondok lag-o. At iri-ge arengge na kwarat, mondok indi nggat nggat worak terak minik irit woragij-o.

²⁴ Worala-ge, yi wi ndi wi woragwi nap oboksa-nen-e Mbal Pem Nagawan-nen indi nggat nggat elem Salomo wok tid iri na wene kulurak Salomo eram lobok yurak peragolat woraiga-o.

²⁵ Nde, lobok yogolar-e, it ondomoktak-nen yi mende ndi mende Salomo amanggim waruk lobok yogolat woraiga-o. Iri kwasa Salomo wok togolar-e, perak min emas min yurugwi sum min tup san min nunggwi mende undu rak pugwi mende min kura wam min kelerai wam min irit pempa olengen ndak wosa Salomo wok togolat woraiga-o.

²⁶ Salomo-nen ndak worosolar-e, wim nggurak nggweyak koma-ge seribu empat ratus (1.400) ndak worosolat, nde, san ombo-nen ombolwak pem koreluk mbururak kura wam-e duabelas ribu (12.000) irit lenak pij-o. Iri rak purug-e, ereb-e Yerusalem iri me posolat, nde, erep minggirig-e o siri nin me nan me ereba me pil lobok yij-o.

²⁷ Nde, Salomo woragid tarem-e perak iri-ge we kerep yeba nggal nde yik kagolat woraiga-o. Nde, e libe Libanon-nen waruk lobok yidnag-e kwarat we e nggal irit kwarat ligik lagaij-o.

²⁸ Nde, Nagawan Salomo-nen kura wam onggo puwakluk lenak inpidnak nap ereba na-nen-e kura wam-e o Mesira nggwe Kilikia nggwe-nen pil lobok yogolat,

²⁹ nde, wim nggurak nggweyak koma-ge Mesira-nen pil lobok yogolat woraiga-o. Nde, kura wam misiget onggo-ge perak tol seratus lima pulu (150) pogolat, nde, wim nggurak nggweyak koma misiget onggo-ge perak tol enam ratus (600) pugwi-o. Nde, it onggo wanugwi nap ereba na-nen-e wim nggugwi nggweyak koma min kura min ereba na-ge tuguruk Et nap nagawan min Siria nap nagawan min enpem onggo wanogolat woraiga-o.