1 NAGAWAN NAGAWAN-NEN KWARIDNAK WENE 1 - Nanduk Ngget Tul Pidnak Wene

1 Nagawan Nagawan-nen Kwaridnak Wene Nagawan Ndaut indi worak pem-nen kwaridnak wene 1:1-4

¹ Yawo Nagawan Ndaut na-ge abu mondok indi worak irit yij-o. Woralar-e, embem sum-nen ketsa ibidnag-et nde, toro-ge ebem nak irit woragij-o.

² Iri ala karuk at eyabu wanugwi nap ereba na-nen yak togolar-e: ”Nagawan wa-e. Nir-e kwe ndugum misik kimin woralat, ndegel kobosolat wolmakluk kore yul-o. Iri yulmu-ge, kimin nene yosolat embem tak kobosolat wolmak-nen-o” luk yak tiga-o.

^3-4 Iri lug-e, kwe ndugum konak misik Isarael nap woragwi sa oboksa kore yukmu-ge, kwe ndugum mondok konak unu-ge Abisang irit kaiga-o. Kwe iri na-ge Nagawan Ndaut eram waruk lobok yikma, kwe iri na-ge ogwe nggal imin nene yigit lak, we togwarak nak worasolat, ndegel obosolat irit woragij-o.

Andonia-nen ”Nagawan men yimin-o” luk yidnak wene 1:5-10

^5-6 Apsalom na-ge wat yidnak me, Ndaut ambara Apsalom imbirik Andonia iri na-ge manggiya nggal kwat yij-o. Nde, ija unu-ge Agit. Nde, Andonia iri-ge mondok ebe-ge tenaga irit men yidnag-o. At-nen nde meya kwarosoma-ge, eid Ndaut-nen-e nggomo woroso buk irit woragij-o. Andonia iri-ge mondok nagawan men yurak irit wat tak posolar-e, at-nen idnak wim koma min kura wam min at ondomok yik karok wolmomtak san ombo-ge lima pulu (50) min irit lid lud tak pij-o.

⁷ Iri rak purug-e, kwe Seruya ambara Yoap min tepan ombo Abiyatat min inmin wene mbarij-o. Inmin wene mbarosola-ge, Yoap min tepan ombo Abiyatat min-nen-e at-nen tu kore yusu iri na-ge ”Ob-er-o” luk yiga-o.

⁸ Alat nde, tepan ombo Sandok min Yoyanda ambara Mbenaya min Mbal Pem Nagawan ene lomboksa yoso nap Natan min Simei min Erei min Nagawan Ndaut yik karok woragwi san ombo min it ereya-nen-e Andonia ambigir-e yigit lag-o.

⁹ Nde, misik tarem-e misik me mbi unu-ge Waro Kerep yugwi sa Yi Enorogel urusu koroga iri na me-ge Andonia-nen-e lomba min sapi kusi min sapi usul usul erep min Mbal Pem Nagawan amanggim worarik sagosolar-e, Ndaut ambararak erep ereba na min Yewura nap nagawan woraso sa yabu wanugwi nap yok nggok ereba na min-et nggok sagusu sa lobok yuwakluk yonggo inpij-o.

¹⁰ Alat nde, owot Salomo min Mbal Pem Nagawan ene lomboksa yoso nap Natan min Mbenaya min Nagawan Ndaut yik karok woragwi san ombo min-e yonggo inpigit lak irit yij-o.

Salomo nagawan mendak pidnak wene 1:11-53

¹¹ Nde, Mbal Pem Nagawan ene lomboksa yoso nap Natan iri na-ge Salomo ija Mbatseba eram mbirij-o. Mberarik, Salomo ija yak tosolar-e: ”Agit ambara Andonia iri-ge Nagawan Ndaut na aru buk worala, ondomok-nen nak nagawan men yusu iri wene-ge kar-e kuligen, lak?

¹² Iri ala karuk, an-e kat min kambara Salomo min kenkap ndagobokluk-nen nggomo yak kundusu-o.

¹³ Kar-e ndag-et nak Nagawan Ndaut eram mburugundik, yak tosolar-e: ’Nagawan kat-nen urul yak norosolat-nen owak mbarosolar-e: ”An nde wat yosola-ge, nondolma-ge kambara Salomo men ma-o”‭ luk yak nirigen na-ge lag-a? Iri na-t nde, yawo-ge noluk-nen Andonia nde nagawan men yusu-o?’ yak ti-o” luk yak tij-o.

¹⁴ Iri luk, Natan-nen wene erep yosolar-e: ”Kar-e mburugundik, Nagawan Ndaut imin wene yosolat wolmin-o. Yosoma, an nggosolar-e, kat-nen yugun wene iri-ge an-nen amawi rak nak pimin-o” luk yak tij-o.

¹⁵ Yosoloma, Mbatseba na-ge mberarik, Ndaut woraso sa nggwij-o. Nde, ereya tarem-e Nagawan Ndaut iri-ge abu indi worak me, Sunem kwe ndugum Abisang iri na-ge Ndaut ndegel obosoma irit mbirij-o.

¹⁶ Mberarik, Mbatseba na-ge Nagawan eralu tud yosola, Nagawan-nen kin wok obosolar-e: ”Kar-e ngge kwasa-nen lobok yigen-o?” luk yak tij-o.

¹⁷ Yosoloma, Mbatseba-nen yak tosolar-e: ”Nagawan kek tak wa-e. Nagawan Indo Kembal Pem Nagawan unu bem owak mbarosolat-nen an nimin urul yak norosolar-e: ’An nondolma-ge kambara Salomo irit nagawan men ma-o’ luk yak nirigen na-t nde,

¹⁸ yawo-ge Nagawan kar-e karu buk worala, Andonia nde nagawan men yij-o.

¹⁹ Ar-e lomba kwarat min sapi kusi min sapi usul usul erep min worarik, nggok sagosolar-e, kat kambararak min tepan ombo Abiyatat min kat-nen idnak san ombo onowe Yoap min oboksa yonggo onposolar-et nde, kambara Salomo nak yonggo ibigit lag-o.

²⁰ Nagawan kek tak wa-e. Isarael nap oboksa-nen kat nak yik keyarok worali-o. Kat-nen yosolat: ’At iri-ge an nondolma nagawan men mag-o’ yugun iri nak yik keyarok worali-o.

²¹ Kat-nen nde wene iri nggal wirik pigit lak yugunmu-ge kat wat yugunmu-ge an min nambara Salomo min-e lugud tak kwarigepma-o luk waruk waruk tak nunpuwa-o” luk yij-o.

²² Mbatseba na-ge wene iri na mbal tenak worasoma-ge, Mbal Pem Nagawan ene lomboksa yoso nap Natan iri na-ge nagawan woraso sa wok yil lobok yij-o.

²³ Wok yosola-ge, ”Natan lobok yusu-o” luk Nagawan Ndaut yak tiga-o. Yogola-ge, kwe Mbatseba iri na mborosola-ge, Natan iri na-ge Nagawan Ndaut eram nggosolar-e, Nagawan Ndaut eram erare nggwe tud yij-o.

²⁴ Iri luk Natan-nen yosolar-e: ”Nagawan kek tak wa-e. Kat-nen wene wirik posolar-e: ’Andonia-ge an nondolma nagawan men mag-o’ yigenma, lak?

²⁵ Yawo na lomba min sapi kusi min sapi wam usul usul erep min worarik, nggok sagosolar-e, kat kambararak oboksa yonggo unpuruk, kat-nen idnak san ombo onowe Yoap min tepan ombo Abiyatat min yonggo enparik yawo-ge ir-e nggok sagili-o. Sakolar-e: ’Nagawan-e Andonia kar-er-o!’ luk enne nggu lak kagolat worali-o.

²⁶ Alat nde, an min tepan ombo Sandok min Mbenaya min Salomo min-et wene mbo ninpigit lag-o.

²⁷ Iri kwarusu iri-ge Nagawan kat-nen kwari-o yak tigenma-nen kwarusu, lak? Kat keyabu wanugwi nap inmin-e: ’An nondolma-ge at irit mendak pimin-o” luk yak indigit lak yu-ge ngge-o?” luk yak tij-o.

²⁸ Yosoloma-ge, Nagawan Ndaut-nen yosolar-e: ”Mbatseba wene mbo bi-o” yosoloma, Natan na mborosola, Mbatseba iri na tuguruk Nagawan Ndaut eram lobok yij-o.

^29-30 Lobok yosoloma, Nagawan Ndaut-nen Mbatseba yak tosolar-e: ”Ndemeret an-nen Isarael nap Enmbal Pem Nagawan, Nagawan Indo unu bem ndemeret kat yak korosolar-e: ’Kambara Salomo irit an nondolma-ge nagawan men ma-o’ yak kirigi iri nar-o. Iri ala-ge, yawo-ge Nagawan Indo uruk nak woraso iri-nen anggun panggun arem-nen wisirik noboso iri na owag-o. Yawo yu-net an-nen urul yak kirigi iri na kwarimin-o” luk yak tij-o.

³¹ Yosoloma, Mbatseba na erare nggwe tud yosolat-nen yosolar-e: ”Nagawan kar-e pem irit kuruk irit wolmin-o!” luk yak tij-o.

³² Iri luk Nagawan-nen tepan ombo Sandok min Natan min Mbenaya min wene mbo unpuwakluk ap yak endamu, it na lobok yogola-ge,

³³ Nagawan Ndaut-nen it yak ondosolar-e: ”Kir-e an-nen idnak san wari ereba na kinmin tak puruk, an nambara Salomo eram mbutlug-e, Salomo iri-ge an-nen ebem kore yoso kelerai wam iri ombolwak pem koreyak puruk, waruk Yi Nggion urusuom waruk mberer-o.

³⁴ Waruk mburugupndig-e, iri me-nen Natan min Sandok min kit-nen-e Isarael nap enanggul pem nagawan tak pogolat, amburu anggul pem keler-o. Iri rak purug-e, posid poba ene pu yogolat, kek kok lel kagolat-nen yogolar-e: ’Nagawan-e Salomo kar-er-o!’ luk kenne lek ker-o.

³⁵ Iri rak purug-e at iri-ge Isarael nap min Yewura nap min tena unpuruk wolmakluk an-nen lenak pidnak me, an nondolma yu me kore makluk nduguluk lobok yurag-o” yak indij-o.

³⁶ Yosoloma, Mbenaya-nen onggo yosolar-e: ”Nagawan kek tak wa-e. Irit kwarul-o” yosoluk-nen yosolar-e: ”Nagawan Indo kat Kembal Pem Nagawan-nen-e kat-nen yigen wene iri-ge mondok watsa amawi rak puwag-o.

³⁷ Nagawan Indo na-ge kat kimin worasu nggal-et at iri-ge Salomo imin wolmag-o. Nagawan kat-nen tenagidnak wi-ge enalen worak konak irit woragwi-t nde, Salomo-nen tenagidnak wi-ge Nagawan Indo-nen kwarosolar-e, mondok enalen worak terak minik irit kwarak puwag-o” luk yak tij-o.

³⁸ Iri lug-e, Sandok min Natan min Mbenaya min Nagawan Ndaut yik karok woragwi san ombo min-nen-e Nagawan Ndaut-nen ebem koreluk mboroso kelerai iri na bem Salomo iri na-ge ”Kore yil li-o” luk yak tiga-o. Iri rak puruk ndugulug-e Yi Nggion urusuom mbiriga-o.

³⁹ Mbirigarig-e, tepan ombo Sandok-nen-e e saitun amburu kenanggo Mbal Pem Nagawan ama-nen waruk lobok yid iri na-ge Salomo iri na nagawan tak obosolat, amburu iri na-ge anggul pem kilik pij-o. Iri rak purug-e, posid poba ene pu yogolat, iri me ndok wiriga nap oboksa-nen-e: ”Nagawan Salomo kar-er-o!” luk enne nggoksa yogolat woraiga-o.

⁴⁰ Iri rak purug-e, kek kok kundugu it oboksa-nen imin lobok yiga-o. Iri kwarogolar-e, seruling poba kundugu lobok yogola, o nggweyak min lele yidnak nggal yij-o.

⁴¹ Nde, Andonia min at-nen yonggo inpid nap ereba na inmin-e nggok saga nuruk-nen kuliganggal-e, mondok inni enne lek kagola irit kuliga-o. Nde, Yoap-nen posid poba ene pu iri na kulurug-e, at-nen yosolar-e: ”No nggal kwat yosola-nen o silmu iri-ge inni enne lek kali-o?” luk yij-o.

⁴² Nde, Yoap na wene iri na awo yosoma-ge, Abiyatat ambara Yonatan mimo wok yij-o. Nde, wok yosola-ge, Andonia-nen yak tosolar-e: ”Kar-e ndemeret konak nab-et me, konak wene-t waruk lobok yusu-o. Ndak ngguwasug-o” yak tij-o.

⁴³ Yosoloma, Yonatan-nen yosolar-e: ”Nab-o. Wene yu-ge konak wene-ge lag-o” yosoluk, Yonatan-nen yosolar-e: ”Nagawan Ndaut-nen Salomo iri na-ge nagawan tak pij-o.

⁴⁴ Nagawan Ndaut-nen Sandok min Natan min Mbenaya min nagawan yik karok woragwi san ombo ereba na min-e Salomo imin mburuwakluk yak endamu mbirigarik, Nagawan Ndaut-nen koreluk mboroso kelerai iri na bem pil laiga-o.

⁴⁵ Iri rak puruk, Sandok min Natan min-nen-e Yi Nggion urusuom waruk mbirigarik, nagawan tak obogolat anggul pem amburu kilik puruk, yawo-ge tuguruk enalen pem o silmu waruk lobok yogolat kek kok pem lobok yili-o. Iri yogolat o siri oboksa enne nono mborosolat-nen yanem enne nggu ereba-ge kuligeb-o.

⁴⁶ Nde, yawo-ge Salomo iri na-ge abu nagawan men agaij-o.

⁴⁷ Nggok lombog-e ap san wari ereba na Nagawan Ndaut eram mbirigarik-nen Ndaut wa yak togolat-nen yogolar-e: ’Nagawan Kembal Pem Nagawan-nen-e kar-e kanggu kobok worag-et nde, Salomo iri na-ge mondok terak mena irit anggu obok worak tak puwag-o. Kat-nen tenagidnak wi-ge enalen worak woragwi-t nde, Salomo-nen tenagidnak wi-ge terak minik enalen pem woragwi rak puwag-o’ luk yak tiga-o. Yak togola-ge, Nagawan Ndaut iri na-ge at nene yoso ondoro bem tud yarik, Mbal Pem Nagawan erembel wanosolat-nen

⁴⁸ tepan yosolar-e: ’Nagawan Indo Isarael nap-nen kek tak kubugwi Mbal Pem Nagawan wa-e. Kat nak kerembel wanurag-o. Nde, yawo-ge an nambara misik an nondolma kat-nen mendak pigen-o. Kat-nen-e an nambara nagawan men yosola, nerengen-nen kujwakluk, an nuruk wolmomtak tena woraigen-o’ luk tepan yij-o” luk yij-o.

⁴⁹ Iri yak ondosoloma-ge, Andonia-nen yonggo inpid nap ereba na-ge kwiye irit yiga-o. Kwiye yogolar-e, it oboksa men luk mborogolar-e, tula-ge enariktak irit mbiriga-o.

⁵⁰ Nde, Andonia iri na-ge mondok Salomo aye kwarat kasolar-e, Nagawan Indo uwi lijema mberarik, Mbal Pem Nagawan amanggim kan pugwi ondoro iri na unggut abam nggwe yere wore ereba na tena bij-o.

⁵¹ Iri kwarosola-ge, ap-nen-e Nagawan Salomo yak togolar-e: ”Andonia iri na-ge kat kaye kwarat kasolar-e, mberarik Mbal Pem Nagawan amanggim kan pugwi sa ondoro unggut yere wore ereba na tena bosolat-nen yosolar-e: ’Salomo-nen Andonia-ge mondok wirimin pug-o luk mondok owak mbarigit lak ma-ge an-e yu me-nen-e mondok mbirimin pug-o’ luk yij-o” yak tiga-o.

⁵² Yogolikma, Salomo-nen onggo yosolar-e: ”At-nen nde konag-et worala-ge, marig-et tet angin worak ebem pimin pug-o. Alat nde, at-nen nde meya kwarosola-ge, iri-ge mondok wururag-er-o” luk yij-o.

⁵³ Iri yosolug-e, Nagawan Salomo-nen Andonia inggi wil ab-e Mbal Pem Nagawan amanggim kan pugwi sa iri na me wirik inpij-o. Iri yamu Andonia na-ge Nagawan Salomo eram lobok yosolar-e, at eram erare nggwe tud yij-o. Iri yosola, Nagawan Salomo-nen yak tosolar-e: ”Kar-e kama mbururag-e ob-o” luk yak tij-o.