ZEPANYA 3 - Alkitab Singog In Mongondow Masa In Tanaa

Yerusalem ihukum bo pinosaḷamat

¹ Kinutukdon in Yerusalem, kotá moromú inta moibog momarontak kon i Tuhan bo inta nondorot kon intaunea tontaní!

² Moboditodon in kotá inta doí motarima kon tompoingat i Tuhan, bo doí doman mopandungmai kon toboḷow-Nea mita, bo inta diá moposarakan in ukurnea kon i Tuhan, bo dia mokituḷung kon i-Nia!

³ Intau mita moḷoben kon kotá mita tatua in naonda bo singa inta moroganggor. Hakim-nea mita in naonda bo serigala mita inta ginogoi; mosia in totok turá nodapot in tuḷan yo diábí in sinaḷáan kaanon mopoikoḷomai.

⁴ Nabi-Nea mita diábí in ibog monotaaumai bo diá motaau pirisayaanmai; imang mita noponajisdon kon onu inta ain sinondí ogoi kon i Tuhan bo nopoyotutui in hukum mita i Allah sin potayakan kon kauntungan monia tontaní.

⁵ Táe ki Tuhan in oyúonpabí in kon kotá tatua; Sia in umuranbí mopobayá in onu inta mobanar bo diábí kon dodai in onda in inta moitaḷá. Pomuḷoi in doḷo-doḷom notantúbí kon Sia in mobogoi in inta moadil kon umat-Nea. Táe, intau inta diá nonotaau in inta moadil kon kotá tatua in umuranbí mogaid kon inta moraat bo diábí in oya-oyá mako.

⁶ Ki Tuhan in noguman, “Akuoi in noyompatdon kon nobayong i bangusa; kotá mita monia in irimumud-Ku, bo dinding mita takin ḷangkeang mita monia binaḻí-Ku apug mita. Kotá mita monia noingongow diá in nogutun bo daḷannea in nodingungui.

⁷ Kon raian-Ku, ‘Tanaa in notantúbí kon umat-Ku in mohoromat kon i-Nakó bo mokidongog kon bayongan in toboḷow-Ku. Notantú bí kon kinotoropan monia totundú inta inogoi-Ku kon i monia.’ Táe noniata magí, nodugangbí in aid monia moraat nongkon inta muna.

⁸ Táe pokoingat! Oḷatdon in singgainea simindog in Akuoi saḷaku intau inta mopongadu. Sin sinantú-kudon kon modondon kon bangusa mita bo dodatuan mita sin mopoḷabú in torú-Ku kon i monia. Bayongan in butá in modaitbí kaanon in tuḷú torú-Ku.

⁹ Táe onda intua baḷuian-Ku in gina in bangusa mita tatua, dá mosia in dongkadon mosambayang kon i-Nakó, bo diá bidon kon ilah mita ibanea. Bangusa mita tatua in komintanbí dumudui kon i-Nakó.

¹⁰ Nodapot in nongkon Sudan inta noyayú, umat-Ku inta noirarit tatua in mamangoi bo moposumba in kuruban kon i-Nakó.

¹¹ Kon dodai intua, ei umat-Ku, moiko in diá bidon musti mooyá bui popisí in nomarontakdon kon i-Nakó. Akuoi in mopoguntunbí in pomuḷoi in intau inta moḷoḷatú bo mododia, bo moiko in diá bidon momarontak bui kon i-Nakó kon tombuḷud-Ku inta motusi.

¹² Kon tua pomayá-Kudon mako in mogutun in tobatú bangusa inta moompá in dodia, inta mopongata in totuḷung-Ku. Mosia in motaaubí in mogutun kon tua.

¹³ Intau in Israel inta kiagatnea, diá bidon mogaid bui kon inta moraat kon i inekabí; mosia in diá bidon monguboḷ bui bo diá bidon bui mongakaḷ. Mosia in mobiag bidon motomoman bo motompia, bo diá bidon angoian in ondok kon i inekadon.”

Dondong ḷunganga in gina

¹⁴ Ei Israel, porogiow bo podondongdon! Ei Yerusalem, koḷungangadon koḻimbatúon in gina!

¹⁵ Sin ki Tuhan in nogogaidon in mohukum kon i monimu; Sia in nopoguntundon in bayongan musungmu. Moiko in iḷukadan i datu in Israel, ki Tuhanmu tontaní. Tanaa moiko in diá bidon paraḷu moondok bui.

¹⁶ Moiangoibí in wakutunea intau mita in moguman, “Ei Yerusalem, dikadon moondok bo moḻia-ḻiaw in gina.

¹⁷ Moiko in iḷukadan i Tuhan Allahmu inta motorindog. Moiko in mountung popisí in kawasa-Nea. Mopia bo moḷunganga in gina i Tuhan sin moiko, kon bonu in tabi-Nea moiko in mobiag mobagu.

¹⁸ Popisí in moiko, dá nodondong in Sia takin pia in gina naonda bo intau inta koyogot in nononbobutungan.” Guman i Tuhan, “Bodito inta nongancam kon i monimu inggamáan-Ku bidon. Koyoyempengmu in popatan-Kudon.

¹⁹ Moiangoibí in orasnea kon monondorotmu rimumudon-Ku, bo intau nopelong posaḷamaton-Ku; bayongan in intau inta iḷumbú kapiton-Ku mobui. Koyoyempeng monia baḷuian-Ku mobaḻí kahoromatan; kon ondakabí, nodapot in kon sinangkub in butá, mosia in pomuliaanbí bo dayowon.

²⁰ Moiangoibí in orasnea, intaumu inta noirarit in kapiton-Ku mobui. Moiko in baḻíon-Kudon ponango-nangoian kon sinangkub in butá, bo kototomomanmu in poguḻiton-Kudon bui.” Ki Tuhan in nosingogdon.