ZEPANYA 2 - Alkitab Singog In Mongondow Masa In Tanaa

Baḷú sinbá monaḷámaidon kon dosa

¹ Ei bangusa inta diá kooyá, kosadardon

² kon dodai in moiko diápa moḷaḷow bo moingkag naonda bo bungang! Koinsapdon kon dodai in diápa moiangoi in singgai torú i Tuhan, bo moiko in kotugatan in torú i Tuhan inta mopodoko-dokot tatua.

³ Angoidon bui kon i Tuhan, ei bayongan intau inta moompá in dodia kon butá tanaa, bo bayongan in intau inta dinumudui kon parenta-Nea mita. Pogaidon kon onu inta kinoibog i Tuhan, bo pokoompádon kon dodia kon tayowon-Nea. Dika-dika bo iko in moisimparut nongkon hukuman kon singgai ki Tuhan mopoontong in torú-Nea.

Kutukan kon bangusa mita inta kon diugmai in Israel

⁴ Kon kotá in Gaza diá in tobatúmai in intau in posaḷamaton. Askelon in moingongowdon diádon in mogogutunnea. Intau in Asdod in poguntunon kon wakutu in daḻíon tubuon kon dodai in moutu in singgai bo intau in Ekron in potabá mayá nongkon kotá monia.

⁵ Kinutukdon in moiko, ei intau in Pilistin, bangusa inta nogutun kon kinoouput in pintad. Ki Tuhan in nonantúdon kon hukuman kon inimu. Sia in moyopúbí kon i monimu, diábí tobatúmai in nongkon sigad monimu in kotaḻiban.

⁶ Butámu kon diug in dagat mobaḻí rawang in bonok; ḷuḷung mita in gombala bo kobang mita in domba in posindogon kon tua.

⁷ Intau in Yohuda inta mokoḷagui, in mogutunbí kon butámu tatua. Mosia in momiagbí kon bobiagon kon butá tatua, bo kon dodai in doḷom mosia in mosiugbí kon baḷoi mita in intau in Askelon. Sin ki Tuhan, Allah monia in moḷukadbí bui kon i monia bo mopobaḻí bui kon i monia motomoman.

⁸ Ki Tuhan Inta Totok in mokawasa in noguman, “Dinongog-Kudon in bangusa mita in Moab bo Amon noningkuḻe bo nongempeng kon umat-Ku. Mosia in umambungangaḷ kon mogagow kon butá in umat-Ku.

⁹ Podoyon kon i-Nakó inta nobiag, ki Allah in bangusa in Israel, Akuoi in moyompatbí kon bayongan in Moab bo Amon naonda bo Sodom bo Gomora. Butá mita tatua in mopuḻingbí in ḻimbuong mita in simuton bo apug mita inta mononoi inta kinobiagandon in bo bonganga. Kiagat in umat-Ku inta nokoḷagui in mogagowbí kon intau inta nogutun kon tua, bo mogagow kon butá monia.”

¹⁰ Natuata in intau in Moab bo Amon hukumon popisí in koḷoḷatú bo kododia monia, bo popisí in mosia ain noningkuḻe kon umat i Tuhan Inta Totok in mokawasa.

¹¹ Baḻíonbí i Tuhan moondok in mosia. Sia in morimumudbí kon dewa mita kon butá. Bo bayongan in bangusa in moibadabí kon i Tuhan, kon batúannea kon butá monia tontaní.

¹² Natua doman in intau in Sudan ḷabúan bidon i Tuhan in hukuman matoi.

¹³ Nopaḷut mako kon tua ki Tuhan nopomakédon in kawasa-Nea morimumud kon Asyur. Kotá in Niniwe in baḻíonbí moingongow bo butá moḷogat.

¹⁴ Kon tua paanan in mahaḷuk bo bayongan in bobiagon umuḻid bo mogogai. Ḷagapan mita monikuḷu in monompugadon kon apug mita tatua bo kumarak nongkon jandela mita. Ḷagapan kawag in kumarak nongkon ngara in ḷoḻingkop. Kayu ḷokuyú kon bangunan mita in kotá tatua in daitonbí rabuton.

¹⁵ Tuata in mobaḻí kon kotá inta norame tatua bo inta nonganggap noaman mako in sia. Intaunea mita in nonganggap kon kotá monia tua in kotá inta totok in moḷoben kon dunia naa. Totuudon moingongow in butá tatua, diá bidon in mogogutunnea koḻikud bidon in mahaḷuk mita in kayuon inta nonompugad kon tua! Bayongan in intau inta moitaḻib kon kotá tatua moitaḻikokogbí bo mokoningkim in awak.