ZAKHARIA 6 - Alkitab Singog In Mongondow Masa In Tanaa

Oontongon kereta in parang opat

¹ Akuoi in nokoontong kon oontongon ibanea. Tanaa inontongku in kereta in parang opat inta iḻumuai nongkon sigad in buḷud porunggu doyowa.

² Kereta mita tatua in inugut in kabaḷo tododoyowa, kereta inta dungkuḷ in kabaḷo nopura, kereta nogindua in kabaḷo norondí,

³ kereta nogintoḷu in kabaḷo nobudó bo kereta inta noginggopat in kabaḷo nobaḷam-baḷang.

⁴ Akuoi in noḻibó kon malaekat tatua, “Tuang, onu in mangaḻe in kereta mita in parang tanaa?”

⁵ Sia in notubag, “Mosia in nobuat minayá ná opat nopobayáan naonda in namangoi mako kon tayowon i Tuhan inta nomaḻí kon dunia naa.

⁶ Kereta in parang inta inugut in kabaḷo norondí in nopobayá in Babel kon utuan. Kabaḷo nobudó nopobayá ná toyopan bo kabaḷo inta nobaḷam-baḷang nopobayá ná negara kon toḷatan.”

⁷ Kon dodai in kabaḷo inta nobaḷam-baḷang tatua iḻumuai, koontongan nádon diá mokotahang in mosia in mayá monaridi kon dunia. Malaekat tatua in noguman, “Bayádon sin monaridi kon dunia!” Dá minayádon in mosia.

⁸ Onda intua malaekat tatua noguman kon inakó, “Kabaḷo inta minayá in Babel tatua in nopoonow kon torú i Tuhan.”

Dodatuan i Yosua kon Yerusalem

⁹ Ki Tuhan in nobogoi in koyow tanaa kon inakó.

¹⁰ Kai-Nia, “Gamádon in sosumba inta inogoi i Heldai, i Tobia bo i Yedaya, intau mita inta bagu nobui nongkon pinoḷumbúan kon Babel. Ḷagidon dia in sosumba monia tatua kon baḷoi i Yosia ki adí i Zepanya.

¹¹ Nongkon buḷawan bo saḷaka inta inogoi monia tatua, pomiaaidon in mahkota tobatú bo popoḷutud kon uḷu i Imang Moḷoben ki Yosua ki adí i Yozadak.

¹² Potaau kon inia kon Akuoi ki Tuhan Inta Totok in mokawasa in noguman, ‘Intau inta dinonoi ki Inta Tokat, in mokoḷongasidon kon tampat inta pogutunannea bo sia in moposindog bui in Baḷoi i Tuhan.

¹³ Siabí tua inta bain moposindog in Baḷoi-Ku bo motarima kon kahoromatan naonda bo datu tobatú, bo sia in momarenta kon rayatnea. Imang tobatú in umapidbí kon inia bo mosia in mogaidon moyotakin takin pia-pia mako.’

¹⁴ Mahkota tatua in tagúon kon Baḷoi-Ku sin monorop kon i Heldai, kon i Tobia, kon i Yedaya, bo kon i Yosia.

¹⁵ Intau mita in mamangoibí nongkon tampat inta moyayú bo moduḷu moposindog in Baḷoi-Ku. Aka baḷoi tatua moḷapatdon, yo kotaauandon monia kon Akuoi ki Tuhan Inta Totok in mokawasa in nopotabádon kon inimu namangoi kon i monia. Tua komintan in mobaḻíbí aka mosia in totu-totuu dumudui kon parenta-Ku, ki Tuhan Allah monia.”