ZAKHARIA 5 - Alkitab Singog In Mongondow Masa In Tanaa

Oontongon ḻitodan buk pinoḷayug in tompot

¹ Sinaridianku bui, bo tanaa inontongku in ḻitodan in buk inta pinoḷayug in tompot.

² Malaekat tatua noḻibó mongo onu in inontongku. Tubagku, “Tobatú ḻitodan in buk pinoḷayug in tompot. Kobanatnea in siow nometer bo kooḷadnea in opat nometer bo tobotak.”

³ Bo sia in noguman kon inakó, “Kon ḻitodan in buk tatua pinais in kutukan kon sinangkub in butá tanaa. Kon toḷosi in pinaisan pomuḷoi in mononakow in poḷuaion kon butá tanaa. Bo kon toḷosi doman in pinaisan Pomuḷoi in intau inta nongibot kon diá totuu in poḷuaion.

⁴ Ki Tuhan Inta Totok in mokawasa in noguman kon kutukan tatua in popouma kon batúan in baḷoi in mononakow bo baḷoi in intau inta nongibot kon diá totuu. Baḷoi mita tatua in tantú kotugatan in kutukan tatua modapot in mobaḻídon apug mita.”

Oontongon bobay kon bonu in karansi

⁵ Malaekat tatua in noiangoi bui bo noguman, “Indoiai oyúonpa doman in bui namangoi!”

⁶ “Onu intua?” iḻibóku. Tubagnea, “Karansi tobatú. Tuata in lambang in dosa nongkon sinangkub in butá tanaa.”

⁷ Karansi tatua oyúon in taḷobnea nongkon tangat. Koyogot in sinaridianku mangoi, taḷobnea tatua in noibingkat bo noniata magí kon bonunea in iḻimitú mako in bobay tobatú.

⁸ Malaekat tatua in noguman, “Bobay tanaa in nobaḻí lambang in aid moraat.” Bo dinorotnea bui monag in bobay tatua kon bonu in karansi bo sinaḷobannea in karansi tatua.

⁹ Akuoi in iḷumangag monik bo nokoontong kon bobay doyowa iḷumayug mangoi kon inakó. Mosia in kokoḻikipan moroton naonda bo koḻikip in bangow. Karansi koina in ginamá monia bo dinia iḷumayug.

¹⁰ Akuoi in noḻibó kon malaekat tatua, “Dinia monia pinobayá in onda in karansi tatua?”

¹¹ Tubagnea, “Pinobayá in Babel, kon tua poposindogan monia in kuil in sia. Aka kuil tatua moḷapatdon, karansi tatua in ukaton kon tua sin sumbáan.”