ZAKHARIA 4 - Alkitab Singog In Mongondow Masa In Tanaa

Oontongon soaḷ totuduan in togá

¹ Malaekat inta ain noyosingogku tua in namangoi bui kon inakó bo noguḷung bui kon inakó naonda bo noguḷung kon intau inta nosiug.

² “Onu in inontongmu?” iḻibónea. “Totuduan in togá tobatú nongkon buḷawan,” tubagku. “Kon popodnea monik oyúon in pobobonuan kon ḷananea, bo kon ḻibuneamai pitu in togá, inta kon batúannea tumopopitu in sumbu.

³ Kon dotá in koḷoigi bo koḷanan in totuduan in togá tatua doyowa in pangkoi in zaitun.”

⁴ Onda intua akuoi in noḻibó kon malaekat tatua, “Pakakat mita tatua nobaḻí lambang in onu, Tuang?”

⁵ “Diá kinotaauanmu?” iḻibónea kon inakó. “Diá Tuang,” tubagku.

^10b Malaekat tatua in noguman kon inakó, “Togá pitu tatua in mata pitu i Tuhan inta moindoimai kon sinangkub in dunia naa.”

¹¹ Onda intua akuoi in bui noḻibó kon inia, “Onu in mangaḻe in doyowa nopangkoi in zaitun kon koḷanan bo kon koḷoigi in totuduan in togá tatua?

¹² Onu doman in mangaḻe in tanga in zaitun doyowa kon símai in pipa buḷawan inta mopoḷuai in ḷana zaitun tatua?”

¹³ Tubagnea kon inakó, “Diá kinotaauanmu degá?” “Diá Tuang,” tubagku.

¹⁴ Dá sia in noguman bui, “Tua in intau doyowa inta ain piniḻí i Tuhan inta nomaḻí kon dunia naa bo inta sinundú sin mogundoi kon i-Nia.”

Dandi i Tuhan kon i Zerubabel

⁶ Malaekat tatua in nopotabá kon inakó mopotaau kon i Zerubabel in koyow i Tuhan tanaa, “Deemanbí pinodoyon kon ropot in tontara bo deemanbí doman pinodoyon kon ropotmu tontaní iko in mountung, táe noidoyonbí kon roho-Ku.

⁷ Ḷonggai nákabí koḷoben in buḷud yo moigambatbí nongkon tayowonmu. Iko in buibí moposindog in Baḷoi-Ku, bo kon dodai in iko mogukat kon batu dungkuḷ kon tampatnea, intau mita in momaḷúdon, ‘Totuu mopia ah!’ ”

⁸ Bo namangoi doman in koyow ibanea nongkon i Tuhan.

⁹ Kai-nia, “Ki Zerubabel ain nogukat kon dodatoḷan in Baḷoi-Ku, bo sia in moginḷapatbí kon bayongan in bangunan tatua. Aka tua bo mobaḻí, yo kotaauandon in umat-Ku kon Akuoibí inta ain nopotabá kon inimu Zakharia kon i monia.

^10a Oyúon in mopoompámai kon onu inta nobaḻí tanaa. Táe ontongonbí monia in ki Zerubabel in mongingguput kon poposindogan in Baḷoi-Ku, bo moḷungangabí in gina monia.”