ZAKHARIA 1 - Alkitab Singog In Mongondow Masa In Tanaa

Ki Tuhan in nogoiní kon umat-Nea mobui mangoi kon i-Nia

¹ Kon buḷan noginwaḷu kon taong nogindua kon pinomarentaan i Datu Darius kon Persia, ki Tuhan in nopotaau in koyow tanaa kon inakó, ki Nabi Zakharia ki adí i Berekhya bo ki ompu i Ido.

² Ki Tuhan in nopotabá kon inakó moguman nanaa kon umat-Nea, “Dungkuḷmai Akuoi, ki Tuhan Inta Totok in mokawasa, sinumorú totok kon mogoguyangmu.

³ Táe tanaa Akuoi in moguman kon inimu: Pobuidon mangoi kon i-Nakó, dá Akuoi in mobui domandon kon inimu.

⁴ Dikadon ná mogoguyangmu. Dungkuḷmai nabi mita nopotaau in koyow-Ku kon i monia sinbá mosia in dikadon bui mogaid kon inta moraat bo dosa. Táe diá in mosia nopandungmai bo doí tumoindudui kon i-Nakó.

⁵ Kon onda in mogoguyangmu bo nabi mita tatua in tanaa? Mosia in diádon onda.

⁶ Pinongin in nabi mogogundoi-Ku mita tatua, pinotaau-Ku in parenta mita bo tompoingat-Ku mita kon mogoguyangmu. Táe diá pinandungmai monia dá mosia in musti mobaba kon bungainea. Bo nomanasaḷ in mosia bo ináku monia kon Akuoi, ki Tuhan Inta Totok in mokawasa, nohukumdon kon i monia pinodoyon kon taḷá monia, bo noitombutung kon onu inta ain sinantú-Ku.”

Oontongon in nabi soaḷ tongonumai in kabaḷo

⁷ Kon singgai in doyowa nopuḷú bo opat kon buḷan in Syebat, inta buḷan impuḷú bo mita, kon taong nogindua kon pinomarentaan i Datu Darius, ki Tuhan in nopotaau in koyow-Nea kon inakó. Kon oontongon tobatú kon dodai in doḷom,

⁸ akuoi in nokoontong kon malaekat i Tuhan in sinumakoi kon kabaḷo nopura tobatú. Sia in sinumogon kon ḷopá tobatú kon sigad in pangkoi mita in murad. Kon tumineamai sinimindog doman in tongonumai in kabaḷo ibanea, oyúon in nopura, inta nokasumba, bo inta nobudó.

⁹ Akuoi in noḻibó kon inia, “Tuang onu degá in mangaḻe in kabaḷo mita tanaa?” Sia in notubag, “Bain poontongku in mangaḻenea kon inimu.

¹⁰ Mosia in pinotabá mangoi i Tuhan sin monaridi kon butá.”

¹¹ Bayongan in kabaḷo tatua nopotaau kon malaekat, “Kami in noḻibudon kon sinangkub in dunia naa, noniata magí yo dunia tanaa in noodom bo notompia.”

¹² Bo malaekat tatua in noguman, “Ki Tuhan Inta Totok in mokawasa, pitu nopuḷú notaong in koonggotnea Iko in sinumorú kon Yerusalem bo kotá mita kon Yohuda. Modapot in toonu degá in Iko tumorú bo diádon mongampung kon i monia?”

¹³ Ki Tuhan in notubag kon malaekat tatua takin tosingogon mita inta moḻipoi,

¹⁴ bo malaekat tatua in nopotabá kon inakó mopotaau in onu inta pinoguman i Tuhan Inta totok in mokawasa, “Akuoi in totokbí in motabi bo mopandung totok kon kotá in Yerusalem, kotá-Ku inta motusi.

¹⁵ Táe Akuoi in sinumorúdon totok kon bangusa mita inta nokorasa kon moodom bo motompia. Sin kon dodai in pinondam-Ku in torú-Ku kon umat-Ku, yo bangusa mita tatua in nodugang kon roriga in umat-Ku.

¹⁶ Tanaa in mobuidon in Akuoi kon Yerusalem sin mongampung kon kotá tatua. Baḷoi-Ku in posindogondon bui bo kotá in Yerusalem in tompiaandon bui.”

¹⁷ Malaekat tatua in nopotabá kon inakó mopotaau in koyow doman tanaa, “Ki Tuhan Inta Totok in mokawasa in nodandi kon kotá-Nea mita in mobaḻí motomoman bui bo komintanpa doman in Sia in motuḷung kon Yerusalem bo akúon-Nea saḷaku Sia in kitogi.”

Oontongon soaḷ tungoi mita

¹⁸ Kon bonu in oontongon ibanea, inontongku in opat in tungoi in sapi.

¹⁹ Akuoi in noḻibó kon malaekat inta ain nosingog kon inakó, “Onu degá in mangaḻe in tungoi mita tatua?” Sia in notubag, “Tungoi mita tatua in nobaḻí lambang in dodatuon mita inta moropot inta noporarit in intau mita kon Yohuda, Israel bo Yerusalem.”

²⁰ Bo ki Tuhan in nopoontong kon inakó in opat in intau mononontaḷ inta nodia kon popangkuḷ.

²¹ Akuoi in noḻibó, “Onu in mangaḻe in koangoian monia?” Sia in notubag, “Monggugur bo moḻitoi kon bangusa mita inta ain norimumud kon Yohuda poḷat noporarit intaunea mita.”