YUNUS 4 - Alkitab Singog In Mongondow Masa In Tanaa

Torú i Yunus bo ampung i Allah

¹ Diábí nosanang in gina i Yunus kon onu inta nobaḻí tatua; nodapotbí in sinumorú in sia.

² Bo nosambayang in sia. “O Tuhan, aindon pinogumanku muna kon dodai in diápa nobuat nongkon baḷoiku koḻipod, kon notantúbí kon aidan-Mu in nanaa! Tuamai in akuoi bayá-bayádon noḷagui minayá in Spanyol! Kinotaauanku kon Iko in ki Allah inta totok in kototabi bo motanob, mosabar, moḷukó in dodia, bo umuranbí mosadia momaḷui kon tomayá mohukum.

³ Tanaa, o Tuhan, pomayádon mako bá matoidon in akuoi, sin mopia-piabí kon matoi in akuoi dika in mobiag.”

⁴ Tubag i Tuhan, “Diábí in kodoyonanmu tumorú natua.”

⁵ Onda intua ki Yunus minayá ná dotá in pomukaan kon kotá, bodongka iḻimitú kon tua. Sia in nomia kon ḷuḷung tobatú bo sinimiung kon bonunea, poḷat mogoḷat mako mongo onu in mobaḻí kon kotá in Niniwe.

⁶ Dá ki Tuhan Allah nopobiag in tobatú pinomuḷa inta ḷumandai inta mopogoḻiung kon i Yunus dá nopia in ginanea. Totuu, kon mopiabí totok in gina i Yunus kon pinomuḷa tatua.

⁷ Táe nopoikoḷomai kon singgai kon dodai in modiugpa mobayag, ki Allah nopotabá kon uḷod tobatú nongarat kon uakat in pinomuḷa tatua, dá noḷaḷow.

⁸ Naonda in nomukádon in mata in singgai, ki Allah nopoangoi in tompot mopatú inta nogirup nongkon pomukáan. Ki Yunus gogió bo notambuḷoḷok popisí in inonag in singgai inta nádon onda bo momokak kon uḷunea. Noinggamádon in kamangnea bo moibogdon totok matoi. Sia in noguman, “Mopia-piabí kon matoi in akuoi dika in mobiag!”

⁹ Táe ki Allah in noguman kon inia, “Diábí patus moajar in ginamu námai tua tongá popisí in pinomuḷa tatua!” Tubag i Yunus, “Eta Nongonu sin diá? Patusbí in akuoi tumorú totok modapot in matoi.”

¹⁰ Bo guman i Tuhan kon inia, “Pinomuḷa tanaa in nobiag tongá kon bonu in tonggobii, bo sia in noḷaḷow kon singgai noiduduimai; beresibí in iko diá nopobiag kon inia bo diá bí doman nonompiamai kon tua. Umpaka natua táe noajarbí totok in ginamu in kinoḷaḷowannea.

¹¹ Yo umpaka dá diá moajar in ginaku in moraimai kon Niniwe, kotá inta moḷoben tatua. Sin koḻikud in mahaḷuknea mita inta diádon koiapan tua, kon tua in oyúon doman in noiḻiu kon mogatut bo doyowa nopuḷú noribu in adí inta diápa motaau mopoyoposi kon onu inta mopia bo onu inta moraat.”