YUNUS 3 - Alkitab Singog In Mongondow Masa In Tanaa

Ki Yunus dinumudui kon i Tuhan

¹ Kon induaneadon ki Tuhan noguman kon i Yunus.

² Kai-Nia, “Bayádon kon Niniwe, kotá moḷoben tatua, bo potaaudon kon intaunea mita in koyow inta poguman-Ku kon inimu.”

³ Dá ki Yunus in dinumuduidon kon i Tuhan bo minayá in Niniwe, kotá tobatú inta totok in moḷoben; dá nodapot in toḷu nosinggai in pinoḻibuan.

⁴ Ki Yunus in sinumuot kon kotá tatua bo naonda in minayá nouput in singgai tatua, nomangkoidon in sia nopoyaput in koyow, kainia, “Opatpa nopuḷú nosinggai, bo morimumud in Niniwe!”

⁵ Intau mita in Niniwe nopirisaya kon koyow i Allah tatua. Bayongan in rayat nonantúdon kon mopuasadon, bo bayongan in intau, pinomayá moḷoben andeka mointok, nomaké in kaeng karong sin moponiata kon mosia in nomanasaḷdon kon dosa mita monia.

⁶ Kon tungkuḷ in datu in Niniwe nokodongog kon habar tatua, ḷagi in sia noponag nongkon ḷoḻitúan pomomarentaannea. Iḷongkutnea in jubah in dodatuannea bo noḷutud kon kaeng karong, bo iḻimitúdon in sia kon tudu in ḷobud.

⁷ Sia in nopohabar doman kon parenta tanaa, “Parenta tanaa in pinotaau kon Niniwe podudui in bontow in tosingogon i datu bo menteri mita: Bayongan in intau, sapi, domba bo bobiagon ibanea diápa ogoi in mongaan bo monginum.

⁸ Intau bo mahaḷuk in mustibí mopomaké in kaeng karong. Saḷaku tomponuot kon pomanasaḷan, dá bayongan in intau musti mosambayang totu-totuu kon i Allah. Mosia in mustibí monombaḷui kon dodianea inta moraat bo aidnea inta nopuḻing in dosa.

⁹ Degá bo baḷuianbí i Allah in niat-Nea bo diádon tumorú dá kita in diádon moyopú!”

¹⁰ Inontong i Allah in aid monia; inontong-Nea kon mosia in nonaḷámaidon kon dodia monia inta moraat. Dá binaḷuian-Neadon in tomayá-Nea, bo diádon nobaḻí nohukum kon i monia.