YUDAS 1 - Alkitab Singog In Mongondow Masa In Tanaa

Tompouna

¹ Utatku mita inta ain inoiní bo inta totok in kinotabi i Allah Amá naton, bo inta iḷukadan kon bonu in tangoi i Yesus Kristus. Saḷaku intau inta nogaid kon oaidan i Yesus Kristus, akuoi – ki Yudas – ki utat i Yakobus,

² mopoigum mako: Sinbá ki Allah in umuran mobogoi in barakat, totabi bo kobiagan motompia kon i monimu.

Guru mita inta diá totuu guru

³ Utat mita inta kinotabiku! Totuu kon oyúonbí in makusudku in nomais kon surat tanaa kon i monimu, tuata in soaḷ kasaḷamatan inta ain tumpaḷa kinorasaan naton. Kon soaḷ tanaa totokdon kon ginaku in momais kon surat kon i monimu bo mononggina sinbá moiko in umuran mokoporoton in kumadai kon onu inta ain pinirisaya monimu inta ain pinoyaput kon intau mita inta ain inoiní i Allah.

⁴ Sin diá kinotaa-taauanmai, naanta oyúon bidon in intau mita ibanea inta umuni-uni mako bo sinumuot kon yua-yuak naton. Mosia tua in intau mita moraat inta mopoyotuuy in habar soaḷ totabi i Allah naton. Makusud monia tua in motayakbí kon kasampatan mopoaid in onu inta kinoibog in awak monia. Mosia tua in diá mopirisaya kon ki Yesus Kristus tua in mongongawasa bo Tuhan naton. Nongkon tungkuḷpabímai hukuman kon i monia tua aindon pinotaau muna kon bonu in Buk Motusi.

⁵ Tua komintan in kinotaauan bidon monimu. Tongá moibogpa doman in akuoi moponorop kon i monimu kon soaḷ naonda in ki Tuhan noposaḷamat kon umat Israel nongkon butá in Mesir, táe noiduduimai kon tua pinutúan-Neadon in intau mita kon sigad monia inta diá mopirisaya.

⁶ Torop domandon in malaekat mita inta iḻimimpat kon kawasa inta inogoi kon i monia, sahingga in minayá nonaḷámaidon kon tampat pogogutunan monia. Mosia tua in sinoko togot i Allah in rante inta diá mobonto-bontow kon bonu in tampat inta mosindip kon ḻimonag in butá. Mosia in umuranpabí sinahang kon tua modapot in hukuman popoḷabúdon kon i monia kon Singgai inta ponantúandon.

⁷ Torop domandon in onu inta nobaḻí kon kotá in Sodom bo Gomora bo kon kotá mita inta kon diugneamai, inta intaunea mita kon tua in nogaid doman kon ná inta pinomia in malaekat mita tatua. Mosia in nogaid kon soaḷ mita inta mokooyá totok bo nogaid doman kon inta diádon patus aidan in intau. Hukuman kon i monia tua in tuḷu inta diá mopio-piong, sinbá tua in mobaḻí tompoingat kon bayongan in intau.

⁸ Natua doman in intau mita inta moibog momikir kon diá totuu modapot in mogaid kon inta mokokotor kon awak monia tontaní. Mosia tua in mopoompámai kon kawasa i Allah bo moningkuḻe kon malaekat inta momulia kon soroga.

⁹ Ki Mikhael tontaní, inta itoi in malaekat mita in diábí kon dodai onda in nogaid kon ná inta inaidan monia tatua. Kon wakutu in sia nobobayowan in Ibilis soaḷ ki ine in mokouḻí kon mayat i Musa, sia in diábí nokobaḻí in nohakim kon Ibilis takin tosingogon moningkuḻe. Ki Mikhael in tongábí nosingog nanaa, “Torúan i Tuhan in iko!”

¹⁰ Táe mosia in kopia nopoyaput in tosingogon mita pohojat kon bayongan inta diá kinomangaḻean monia. Mosia tua in nádon onda bo mahaḷuk inta diá koraian, inta nonotaau kon soaḷ mita tongá podudui in porasaan monia. Bo soaḷbí mita tatua inta mokopopisí kon koyoyangan monia.

¹¹ Mobodito in mosia! Mosia in dinumuduidon kon onu inta inaidan i Kain. Inta tongá popisí in bá mokouḻí kon doit, dá nogaidon kon onu inta diá kinoibog i Allah, ná doman ki Bileam. Bo mosia tua in irimumud doman popisí in nomarontak ná ki Korah.

¹² Kon wakutu in moiko nogaid kon rame nongaan noyotakin, oaid in intau mita tatuata inta mokobú kon sigad monimu. Mosia tumura in mongaan takin diábí kooyá, bo tongá morai kon kopontingan monia tontaní. Mosia tua in ná doman onda bo goḷom inta dinia in tompot táe diá mokouyan. Mosia in ná doman onda bo pangkoi in ayop inta diá momomungai umpaka sempo in ayop; pangkoi mita inta ain irabut takin uakatnea bo minatoidon.

¹³ Mosia notongkai doman in bokoḷ moropot kon dagat inta mokopomuká kon burá, natua in mosia monomburá kon oaid mita monia inta mokooyá. Mosia tua in ná doman onda bo mahaḷuk mita inta modondaḷoi magí mako bo inta ain pinosadiaan i Allah kon tampatnea kon bonu in tampat inta totok in mosindip modapot in kopaḷutannea.

¹⁴ Ki Henokh, buí impitunea nongkon i Adam, tungkuḷ intua nokoimontan doman in nopotaau in koyow i Allah soaḷ intau mita tatua. Ki Henokh in noguman nanaa, “Indoiai, ki Tuhan in mamangoi takin ribuan malaekat-Nea mita inta mokudus

¹⁵ sin mohakim kon bayongan intau. Ki Tuhan in mohukum kon intau mita moraat popisí in oaid mita monia inta moromú. Bo hukumon-Neabí in intau mita baradosa bo inta modurhaka inta umuran mopoyaput in singog pohojat kon i Tuhan.”

¹⁶ Intau mita tatua in umuran mongunsingog bo mopotaḷá kon intau mita ibanea. Mosia in mobiag podudui in ibog monia inta baradosa naa. Mosia in mongonguman kon moḷantud soaḷ kaadaan monia tontaní, bo umuran umapid mako kon intau sinbá mokouḻí kon kauntungan.

Tompoingat bo Tonggina

¹⁷ Táe Utatku mita inta kinotabiku, toropdon in onu inta koḻipod pinoguman in rasul mita i Yesus Kristus, Tuhan naton.

¹⁸ Munadon pinotaau monia kon inimu, kon aka kodiug-kodiugdon in singgai pangabisan yo moiangoibí in intau mita inta moningkuḻe kon i monimu, mosia tuata in intau mita inta nobiag podudui in ibog monia inta baradosa naa.

¹⁹ Mosiadon naa in intau mita inta mokopomuká kon kogoguyaatan in pinonobatúan jamaat. Mosia in diá kinawasaan in Roho i Allah, táe kinawasaandon in ibog mita in dunia naa.

²⁰ Táe moiko, utatku mita, tompiabí saḷaḷu in kobobiagmu podudui in pirisayamu kon i Yesus Kristus. Pirisaya inta totok in modarit. Bo posambayangdon takin kawasa in Roho i Allah,

²¹ bo kobiag saḷaḷu kon bonu in totabi i Allah, kon wakutu in moiko mogoḷat mako kon barakat i Tuhan naton ki Yesus Kristus inta mobogoi in kobiagan mopia bo mononoi.

²² Popoontongdon in tabi monimu kon i monia inta diápa motantú in pirisaya.

²³ Kapit bo poḷuai in mosia nongkon bonu in tuḷu sinbá mosaḷamat. Bo poontong doman in tabi kon intau mita ibanea, táe musti motoguondok. Kodoíbí modapot pakeang monia inta ain kinotoran in ibog monia inta binaradosa.

Sambayang Dodayow

²⁴ Ki Allah, inta mokosanggup moḷukad sinbá moiko diá moḷabú, bo inta mokosanggup modia kon i monimu mayá in tampat pomomarentaannea inta momulia takin gina mosanang bo modarit.

²⁵ Tongábí Sia tua in ki Allah, Mopoposaḷamat naton pongin i Yesus Kristus Tuhan naton. Siata in ki Allah inta momulia, Moḷoben, mokawasa bo inta mokobangkaḷ nongkon tungkuḷpa intua, masai naa bo modapot kopaḷutan in dunia naa! Amin.