YOSUA 17 - Alkitab Singog In Mongondow Masa In Tanaa

Suku Manasye kon dotá in toyopan kon Ongkag in Yordan

¹ Tongobotak in butá kon dotá in toyopan kon Ongkag in Yordan inogoi kon tongosilai in motoḷuadí buí i Manasye, adí guya-guyang i Yusup. Ki Makhir, ki amá i Gilead, adí guya-guyang i Manasye. Sin sia in tobatú tontara, dá butá in Gilead bo Basan inta noiukat kon dotá in pomukaan kon Ongkag in Yordan inogoi kon inia.

² Butá kon dotá in toyopan kon Ongkag in Yordan inogoi kon motoḷuadí mita ibanea nongkon buí i Manasye, inta motoḷuadí mita tanaa: ki Abiezer, Helek, Asriel, Sekhem, Heper bo i Semida; tua komintan bui ḷoḷaki nongkon i Manasye ki adí i Yusup. Mosia tua in tongguḷu mita in motoḷuadí.

³ Ki Zelapehad, adí i Heper, ki ompu i Gilead (ki Gilead adí i Makhir, ki ompu i Manasye), diá kogadí kon ḷoḷaki, tongá adí bobay, inta tai Makhla, ki Noa, ki Hogla, ki Milka, ki Tirza.

⁴ Mosia in minayá kon i Imang Elezar, kon i Yosua adí i Nun bo kon itoi mita, bo noguman, “Ki Tuhan ain noguman kon i Musa kon kami doman in musti tumpaḷa mokouḻí kon butá ná ki utat mita nami inta ḷoḷaki.” Tuamai in podudui in parenta i Tuhan, adí mita bobay i Zelapehad tatua inogoian in butá noyotakin in utat mita monia inta ḷoḷaki.

^5-6 Dá, deemanbí tongá buí inta ḷoḷaki nongkon i Manasye in nokouḻí kon tonsilai butá, táe buíneabí doman inta bobay. Tuamai in nongonu sin suku i Manasye inogoian in mopuḷú notonsilai, koḻikud in butá in Gilead bo Basan kon dotá in pomukaan kon Ongkag in Yordan. Butá in Gilead inogoi kon buí i Manasye ibanea.

⁷ Botok mita inta nobaḻí sigad kon butá in suku Manasye in pinangkoi nongkon Asyer nopobayá ná Mikhmetat kon dotá in pomukaan kon Sikhem. Nongkon tua botok tatua nosiḻig ná toḷatan nodapot kon butá in inanakan in En-Tapuah.

⁸ Butá in Tapuah in kapunyaan in suku Manasye, táe kotá in Tapuah, kon pinosigadan in kapunyaan in buí i Epraim.

⁹ Noiduduimai botok in sigad in butá in Manasye tatua nosiḻig nodapot in tapá in Ongkag in Kana. Kotá mita kon dotá in toḷatan kon tapá tatua in kapunyaan i Epraim, umpaka kon yua-yuak in kotá mita in suku Manasye. Botok in sigad in butá in Manasye tatua noiduduimai kon tua in dinumudui kon daḷan kon dotá in utuan kon tapá tatua, bo nopaḷuput kon Dagat Toyuak.

¹⁰ Natuata in Epraim kon dotá in Toḷatan, bo Manasye in kon dotá in utuan, bo Dagat Toyuak in nobaḻí sigad monia kon dotá in toyopan. Kon barat laut, butá in suku Manasye tatua noyosigad in butá i Asyer, bo kon dotá in timur laut, noyosigad in butá Isakhar.

¹¹ Kon bonu in butá i Isakhar bo i Asyer tua oyúon in butá mita kapunyaan i Manasye, tuata in Bet-Sean bo Yibleam takin ḻipú mita kon diugneamai. Noituot doman: in Dor (kotá inta noiukat kon bingkí in dagat), En-Dor, Taanakh, Megido takin ḻipú mita kon diugneamai.

¹² Táe suku in Manasye in diá mokopoguntun kon intau mita inta nogutun kon kotá tatua; tuamai intau in Kanaan umuranpa doman nogutun kon tua.

¹³ Nodapot in kon singgai noiduduimai naonda in intau Israel nobaḻídon noropot totok, diábí in mosia nopoguntun kon bayongan intau in Kanaan; mosia in tongábí nomakisa kon i monia mogaid kon oaidan monia.

Suku Epraim bo Suku Manasye kon dotá in toyopan nokidugang in butá

¹⁴ Buí i Yusup in noguman kon i Yosua, “Nongonu sin kami in tongábí inogoian in tongosilai in butá, bokaka kami naa in totuubí moantó, sin ki Tuhan ain nomarakat kon inami?”

¹⁵ Ki Yosua notubag, “Popisí in moiko noiḻiudon in antó, nodapot butá kon buḷud in Epraim mosisídon kon i monimu, dá bayádon kon butá in intau in Peris bo Repaim. Ponaḷundon kon butá mita inta kon buḷud bo baḻídon butá monimu tontaní.”

¹⁶ Buí i Yusup tatua notubag, “Butá kon buḷud tatua in diábí tugat kon inami, bo bangusa in Kanaan inta nogutun kon rata mita inta moompá oyúon in kereta mita in parang inta pinomia nongkon uatoi – pinomayá inta nogutun kon Bet-Sean bo ḻipú mita inta kon diugneamai, ande mosia inta nogutun kon Ḷopá in Yizreel.”

¹⁷ Dá ki Yosua in noguman kon suku in Epraim bo suku in Manasye kon toyopan tatua, “Totuu, kon moiko nion in moantódon totok bo moropotdon, bo patusdon ogoian in moiḻiu kon tongo tonsilai in butá.

¹⁸ Gamádon in butá inta kon buḷud, sin umpaka butá tatua kayuonpa, motaaubí inginon monimu intua bo baḻíon kapunyaan monimu komintan. Bo soaḷ intau mita in Kanaan tatua, kountunanbí monimu in mosia, umpakabí in mosia moropot bo kokereta mita in parang inta pinomia nongkon uatoi.”