YOSUA 15 - Alkitab Singog In Mongondow Masa In Tanaa

Sigad mita kon butá in suku Yohuda

¹ Motoḷuadí nongkon suku in Yohuda notarima kon tonsilai butá inta noiduduimai naa in sigadnea: Kon dotá in toḷatan, butá tatua nosimbanat nodapot kon popod inta totok in kon toḷatan butá kon padang gurun Zin kon pinosigadan in Edom;

² pinangkoi kon popod in toḷatan kon Laut Mati,

³ bo minayá ná toḷatan nongin oyuk mita in buḷud kon Akrabim nodapot kon Zin. Noiduduimai kon tua nongin toḷatan Kades-Barnea, minayá nongin Hezron, notakod kon Adar, onda intua nomurow nopobayá ná Karka.

⁴ Nongkon tua minayá doman ná Azmon, bo notaḷug kon tapá kon pinosigadan in Mesir, onda intua nodapot kon Dagat Toyuak. Tuata in sigad kon dotá in toḷatan butá inta inogoi kon suku in Yohuda. Bo sigad doman tatua inta nobaḻí sigad kon dotá in toḷatan in bayongan butá in Israel.

⁵ Kon dotá in pomukaan, sigadnea in Laut Mati, minayá ná utuan nodapot kon minanga in Ongkag in Yordan. Kon dotá in utuan, sigadnea in pinangkoi nongkon minanga in Ongkag in Yordan tatua,

⁶ bo notakod kon Bet-Hogla, bo minayá ná sigad in Ḷopá in Yordan. Nongkon tua sigad in utuan notakod monik kon utuan nodapot kon Batu Bohan (Bohan in ki adí i Ruben),

⁷ onda intua minayá ná Ḷopá in Roriga nodapot kon Debir, bo nomurow bui ná utuan nopobayá ná Gilgal kon tampat inta noyogintayow in oyuk mita in buḷud kon Adumim kon dotá in toḷatan in ḷopá tatua. Nongkon tua minayá bui muik kon bokaká in tubig En-Semes, bodongka nopobayá ná En-Rogel,

⁸ Onda intua notakod nongin Ḷopá in Hinom ná toḷatan in buḷud, inta kinoukatan in Yerusalem, kotá in intau in Yebus. Nongkon tua sigad tatua pinotakod kon tudu in buḷud tatua kon dotá in toyopan kon Ḷopá in Hinom, kon popod in utuan Ḷopá in Repaim,

⁹ onda intua minayá ná bokaká in tubig Me-Neptoah, nodapot kon kotá mita inta kon diug in Buḷud Epron. Nongkon tua in sigad in butá tatua nomurow ná Baala (inta Kiryat-Yearim),

¹⁰ bo noḻibu kon dotá in toyopan Baala nopobayá ná Buḷud in Edom, bo minayá ná dotá in utuan Buḷud in Yearim (tuata in Buḷud in Kesalon), bo noponag kon Bet-Semes, onda intua minayá ná Timna.

¹¹ Nongkon Timna, sigad tatua nopobayá ná dotá in utuan kon Buḷud in Ekron, bodongka nomurow nopobayá ná Sikron, noitaḻib kon Buḷud in Baala, bo nopobayá ná Yabneel, bo sinimpod kon Dagat Toyuak,

¹² inta nobaḻí botok tonsigad kon dotá in toyopan kon butá in suku Yohuda. Butá tatua in pinogutunan in intau mita inta nongkon motoḷuadí mita kon bonu in suku Yohuda.

Ki Kaleb nogagow kon Hebron bo Debir

¹³ Podudui in parenta i Tuhan kon i Yosua, tongosilai in butá i Yohuda ogoi kon i Kaleb adí i Yepune nongkon suku in Yohuda. Inogoi kon inia in Hebron, kotá inta kapunyaan i Arba, ki amá i Enak.

¹⁴ Buí i Enak in intau in Sesai, Ahiman bo Talmai. Inuntun i Kaleb in mosia komintan nongkon Hebron.

¹⁵ Nongkon tua sia minayá nonubu kon intau mita inta nogutun kon Debir. (Kotá inta koḻipod sinangoian Kiryat-Seper.)

¹⁶ Guman i Kaleb, “Ki ine in mokoagow kon Kiryat-Seper, sia in motaau motonibuḷoi i Akhsa inta adíku bobay.”

¹⁷ Ki Otniel, adí i Kenas inta ki utat i Kaleb, nogagow kon butá tatua; dá inogoi i Kaleb in ki Akhsa pinobuḷoi i Otniel.

¹⁸ Kon singgai pinonikaan monia, ki Otniel nodondouḷug kon i Akhsa sinbá moigum kon tongosilai in butá kon i amánea. Dá noponagdon in ki Akhsa nongkon keledainea, dá ki Kaleb noḻibó kon inia mongo onu in koibognea.

¹⁹ Ki Akhsa in notubag, “Koibogku in butá inta oyúon doman in bokaká, sin butá inta inogoi i amá kon inakó tua diá in tubig.” Dá inogoiandon doman i Kaleb in sia in butá inta oyúon in bokaká kon dotá in uḷuan bo bokaká inta kon dotá in sioḷan.

Kotá mita in Yohuda

²⁰ Noiduduimai naa in butá inta inogoi kon motoḷuadí mita inta kon bonu in suku Yohuda sin mobaḻí kapunyaan monia.

^21-32 Kotá mita inta totok in moyayú kon dotá in toḷatan, inta nobaḻí kapunyaan i Yohuda, tuata inta noiukat kon pinosigadan in Edom, tua komintan doyowa nopuḷú bo siow in kotá, noituot domandon in ḻipú mita inta kon diugneamai. Kotá mita tatua in: Kabzeel, Eder, Yagur, Kina, Dimona, Adada, Kedes, Hazor, Yitnan, Zip, Telem, Bealot, Hazor-Hadata, Keriot-Hezron (tuata in Hazor), Amam, Sema, Molada, Hazar-Gada, Hesmon, Bet-Pelet, Hazar-Sual, Bersyeba, Baala, Iyim, Ezem, Eltolad, Khesil, Horma, Ziklag, Madmana, Sansana, Lebaot, Silhim, Ain bo Rimon.

^33-36 Kotá mita, noitakin doman in ḻipú mita kon diugneamai, inta noiukat kon sipangkoion mita in buḷud, kobayongnea komintan in mopuḷú bo opat in kotá, tuata in: Esytaol, Zora, Asna, Zanoah, En-Ganim, Tapuah, Enam, Yarmut, Adulam, Sokho, Azeka, Saaraim, Aditaim, Gedera bo Gederotaim.

^37-41 Bo mopuḷú doman bo onom in kotá noiduduimai naa takin ḻipú mita kon diugnea: Zenan, Hadasa, Migdal-Gad, Dilean, Mizpa, Yokteel, Lakhis, Bozkat, Eglon, Khabon, Lahmas, Khitlis, Gederot, Bet-Dagon, Naama bo Makeda.

^42-44 Bo siow doman in kotá noiduduimai naa, noitakin doman in ḻipú mita inta kon diugneamai: Libna, Eter, Asan, Yiptah, Asna, Nezib, Kehila, Akhzib bo Maresa.

⁴⁵ Bo Ekron takin kotá mita mointok bo ḻipúnea mita,

⁴⁶ takin bayongan in kotá bo ḻipú mita kon diug in Asdod, nongkon Ekron nodapot kon Dagat Toyuak.

⁴⁷ Ná doman tua in Asdod bo Gaza takin kotá mita mointok bo ḻipúnea mita inta noibaya-bayá mako nodapot kon diug in tapá kon pinosigadan in Mesir bo pintad in Dagat Toyuak.

^48-51 Kon butá kon buḷud in mopuḷú bomitá in kotá bo ḻipú mita kon diugneamai: Samir, Yatir, Sokho, Dana, Kiryat-Sana (inta Debir), Anab, Estemoa, Anim, Gosyen, Holon bo Gilo.

^52-54 Bo siow doman in kotá noiduduimai naa, noitakin doman in ḻipú kon diugneamai: Arab, Duma, Esan, Yanum, Bet-Tapuah, Apeka, Humta, Kiryat-Arba (inta Hebron) bo Zior.

^55-57 Bo mopuḷú doman in kotá noiduduimai noitakin doman in ḻipú mita kon diugnea: Maon, Karmel, Zip, Yuta, Yizreel, Yokdeam, Zanoah, Kain, Gibea bo Timna.

^58-59 Bo kotá onom noiduduimai doman naa, noitakin in ḻipú mita inta kon diugneamai: Halhul, Bet-Zur, Gedor, Maarat, Bet-Anot bo Eltekon.

⁶⁰ Bo kotá doman doyowa noiduduimai naa takin ḻipú mita inta kon diugneamai: Kotá in Kiryat-Baal, (tuata in Kiryat-Yearim) bo Kotá in Raba.

^61-62 Kon butá in padang gurun, onom in kotá noiduduimai naa takin ḻipú mita kon diugneamai: Bet-Araba, Midin, Sekhakha, Nibsan, Kotá in Simuton bo En-Gedi.

⁶³ Kotá in Yerusalem noitakin doman kon kapunyaan i Yohuda, táe intau in Yohuda in diábí mokountun kon intau mita in Yebus inta nogutun kon tua. Dapot in tanaa intau mita in Yebus nogutunpabí noyotakin in intau in Yohuda kon kotá tatua.