YOSUA 14 - Alkitab Singog In Mongondow Masa In Tanaa

Pinosilaian kon butá inta kon dotá in toyopan kon Ongkag in Yordan

¹ Noiduduimai naa in ouman kon naonda in butá in Kanaan kon dotá in toyopan kon Ongkag in Yordan sinilai-silai kon umat in Israel. Inta nosilai kon butá tatua kon umat in Israel in ki Imang Eleazar, ki Yosua adí i Nun, bo tongguḷu mita in motoḷuadí kon bonu in suku mita in bangusa Israel.

² Ná onu inta ain pinarenta i Tuhan kon i Musa, butá mita inta kon dotá in toyopan kon Ongkag in Yordan inta ain sinantú kon siow bo tongobotak nosuku in bangusa Israel, musti silaion pongin undian.

^3-4 Butá kon dotá in pomukaan kon Ongkag in Yordan ain inogoi i Musa kon doyowa bo tongobotak in suku bangusa ibanea tua. (Paraḷu paison kon naa kon buí i Yusup nosilai doyowa nosuku: Suku Manasye bo Suku Epraim.) Aka soaḷ suku in Lewi, diábí in butá in inogoi i Musa kon i monia. Mosia in tongábí inogoian in kotá mita sin pogutunan, takin doman tampat popokaanan kon bayongan bobiagon sapi bo domba monia.

⁵ Umat in Israel nosilai kon butá tatua pinodudui kon ná inta pinotaau i Tuhan kon i Musa.

Hebron inogoi kon i Kaleb

⁶ Kon singgai tobatú intau mita nongkon suku Yohuda namangoi kon i Yosua kon Gilgal. Intau tobatú nongkon sigad monia inta ki Kaleb adí i Yepune intau in Kenas, in noguman, “Yosua! Iko in nonotaaubí kon onu in pinoguman i Tuhan kon i Musa, totabá i Allah tua, kon Kades-Barnea soaḷ iko bo akuoi.

⁷ Akuoi in umurdon opat nopuḷú notaong kon dodai in ki Musa, mogogundoi i Tuhan tua, nopotabá kon inakó nongkon Kades-Barnea nobaḻí toimata sin monaridi kon butá tanaa. Bo akuoi in namangoi bui kon inia kodia-dia in habar inta totuu.

⁸ Intau mita inta minayá takinku, in nopomukádon in ondok kon intau mita in Israel. Tongá akuoi in umuranbí notoindudui kon i Tuhan Allahku.

⁹ Bo tuamai, ki Musa nodandi kon butá inta binayáku inindoian notantúbí kon ogoi kon inakó bo kon i adíku mita mobaḻí kapunyaan nami mononoi.

¹⁰ Tanaa in opatdon nopuḷú bo ḻima notaong pinangkoi kon ki Tuhan noguman kon tua kon i Musa. Tua in nobaḻí kon tungkuḷ in bangusa Israel kon padang gurunpa. Bo ná inta ain pinodandi i Tuhan, ki Tuhan in noḷukad domandon kon inakó nodapot in akuoi umuranpa nobiag nodapot in tanaa mako. Indoiai, akuoi in umurdon waḷu nopuḷú bo ḻima notaong in naa,

¹¹ táe umuranpabí doman moropot ná kon dodai in ki Musa nopotabá kon inakó. Moropotpabí in akuoi mayá moparang ande mogaid kon onukabí.

¹² Tuamai, tanaa ogoidon in butá kon buḷud inta pinodandi i Tuhan kon inakó kon tungkuḷ in akuoi bo intau mita inta noyotakinku nobui mangoi kodia-dia in habar. Kon tungkuḷ intua iko tontaní in nokodongog, kon tua oyúon in bangusa in mongoḷoben bo moitoi inta sinangoi monia bangusa in Enak. Mosia nogutun kon bonu in kotá mita moḷoben inta dininding. Degá tuḷunganpabí i Tuhan in akuoi, dá akuoi in mokountundon kon i monia, ná inta pinoguman i Tuhan.”

¹³ Dá ki Yosua in nomarakat kon i Kaleb adí i Yepune, bo nobogoi kon inia in kotá in Hebron nobaḻí butá kapunyaannea.

¹⁴ Dapot in tanaa mako kotá tatua umuranpabí nobaḻí kapunyaan budel in buí i Kaleb adí i Yepune, intau in Kenas tatua, sin sia in notoḷutui bo notoindudui kon i Tuhan, Allah in Israel.

¹⁵ Koḻipod in Hebron sinangoi kotá in Arba. (Arba in intau mita inta totok in mongoḷoben nongkon sigad in bangusa in Enak.) Dá butá tatua in noamandon bo nobiag nosanang sin diádon bui sinuyayow in parang.