YOSUA 13 - Alkitab Singog In Mongondow Masa In Tanaa

Butá mita inta mustipa agowon

¹ Tanaa in ki Yosua nogoguyangdon totok. Ki Tuhan noguman kon i Yosua, “Iko in nogoguyangdon, Yosua! Táe nobayongpa in butá inta mustipa agowon:

² bayongan butá in Pilistin bo Gesur,

³ bo bayongan butá in Awi nopobayá; ná toḷatan. (Butá inta nongkon Ongkag in Sikhor kon pinosigadan in Mesir nodapot kon pinosigadan in Ekron kon dotá in utuan, tua komintan in noituot kon butá in bangusa Kanaan; bo datu mita in Pilistin nogutun kon Gaza, Asdod, Askelon, Gat bo Ekron.)

⁴ Bo mustipa doman agowon: bayongan butá in Kanaan bo Meara (kapunyaan in bangusa in Sidon), nodapot kon Apek kon pinosigadan in butá in bangusa Amori;

⁵ noiduduimai kon tua butá in bangusa in Gebal, bo bayongan in butá in Libanon nopobayá ná pomukaan, nongkon Baal-Gad kon dotá in toḷatan Buḷud in Hermon, bo minayá nodapot kon daḷan inta nopobayá ná Hamat.

⁶ Noituot doman in bayongan butá in intau in Sidon, inta nogutun kon buḷud kon sigad in buḷud mita in Libanon bo Misrepot-Maim.” “Bayongan in bangusa tatua in poguntunon-Kubí komintan, kon dodai in bangusa Israel monubudon kon i monia,” Guman i Tuhan noidudui kon i Yosua. “Butá tatua in mustibí sila-silaionmu kon umat in Israel sin mobaḻí kapunyaan monia, ná inta ain pinarenta-Ku kon inimu.

⁷ Dá, tanaa in sila-silaidon in butá tatua kon suku in bangusa Israel inta siow, bo kon tongobotak in suku in Manasye, sinbá tua in mobaḻídon kapunyaan monia.”

Pinosilaian kon butá inta kon dotá in pomukaan kon Ongkag in Yordan

⁸ Suku in Ruben, i Gad bo tongobotak in suku Manasye ain notarima kon butá tonsilai monia nongkon i Musa, mogogundoi i Tuhan tua; tuata in butá inta kon dotá in pomukaan kon Ongkag in Yordan.

⁹ Butá monia tua in nongkon Aroër (kon bingkí in Ḷopá in Ongkag in Arnon), bo kotá inta kon yua-yuak in ḷopá tatua. Bo bayongan in butá rata moḷantud nongkon Medeba nodapot kon Dibon

¹⁰ bo nodapot kon pinosigadan in butá in Amon, noituot doman in bayongan in kotá inta nokoimontandon kinawasa i Sihon, datu in Amori, inta noiḻitú kon Hesybon.

¹¹ Noituot doman in butá in Gilead, butá inta kon diugmai in Gesur bo Maakha, bo bayongan in Buḷud in Hermon, bo bayongan butá in Basan nodapot kon Salkha.

¹² Butá monia tua in nongkon butá kinawasa i Datu Og, intau in Repaim pangabisan inta nomarenta kon Asytarot bo Edrei. Ki Musa in nonaḷowdon kon bangusa mita tatua bo nopoguntun kon i monia iḻumuai nongkon butá monia.

¹³ Táe intau in Gesur bo Maakha in diábí pinoguntun in intau Israel; mosia in nogutunpabí kon Israel.

¹⁴ Suku in Lewi in diá nokouḻí kon tonsilai butá nongkon i Musa, sin ki Tuhan ain noguman kon i Musa kon tonsilai in suku Lewi tua in nongkon kurubanbí mita inta sinubá kon mezbah inta inogoi kon i Tuhan Allah Israel.

Butá inta inogoi kon i Ruben

¹⁵ Tongobotak nongkon butá inta pinodandi i Tuhan kon umat in Israel tua ain inogoi i Musa kon motoḷuadí kon bonu in suku i Ruben, sin mobaḻí butá kapunyaan monia.

¹⁶ Butá monia tua in nongkon Aroër (kon bingkí in Ḷopá in Ongkag in Arnon) bo kotá inta kon yua-yuak in ḷopá tatua nodapot kon bayongan in rata inta moḷantud kon diugmai in Medeba;

¹⁷ noituot doman in Hesybon bo bayongan in kotá inta kon rata moḷantud tatua, tuata in Dibon, Bamot-Baal, Bet Baal-Meon,

¹⁸ Yahas, Kedemot, Mepaat,

¹⁹ Kiryataim, Sibma, Zeret-Hasahar inta noiukat kon tudu in buḷud kon ḷopá tatua,

²⁰ Bet-Peor, oyuk mita in Buḷud Pisga, bo Bet-Yesimot.

²¹ Noiduduimai kon tua noituot doman in bayongan kotá kon rata moḷantud tatua, bo bayongan in butá inta kon bonu in kawasa i Sihon, datu in bangusa in Amori, inta koḻipod noiḻitú kon Hesybon. Sia bo pongawasa mita in Midian doman, inta ki Ewi, ki Rekem, ki Zur, ki Hur bo ki Reba, sinaḷow domandon i Musa. Komintan pongawasa tatua nokoimontandon in nomarenta kon butá tatua sin kopontingan i Datu Sihon.

²² Kon sigad in intau mita inta iḻimod in bangusa israel oyúon doman in ki Bileam ki adí i Beor, ki moindoi kon onu inta mobaḻí kon singgai moiduduimai.

²³ Ongkag in Yordan in nobaḻí doman sigad kon dotá in toyopan kon butá in suku Ruben. Tuata in kotá mita bo desa mita inta inogoi kon motoḷuadí kon bonu in suku Ruben sin mobaḻí butá kapunyaan monia.

Butá inta inogoi kon suku i Gad

²⁴ Tongobotak nongkon butá inta pinodandi i Tuhan kon umat in Israel tatua inogoi domandon i Musa kon motoḷuadí mita kon bonu in suku Gad, sin mobaḻí kapunyaan monia.

²⁵ Butá monia tua in nongkon Yaezer bo bayongan kotá in Gilead bo tongobotak nongkon butá in bangusa in Amon nodapot kon kinoouput in Aroër kon dotá in pomukaan Raba;

²⁶ butá nongkon Hesybon nodapot kon Ramat-Mizpa bo Betonim, bo butá nongkon Mahanaim nodapot kon pinosigadan in Lodebar, tua komintan in noituot doman in butá kon suku in Gad.

²⁷ Kon Ḷopá in Yordan, butá in suku Gad tatua nongkon Bet-Haram, Bet-Nimra, Sukot, bo Zapon, inta ki agat in butá inta kinawasa in Datu Sihon kon Hesybon. Pinosigadan kon dotá in toyopan kon butá in suku Gad tatua in Ongkag in Yordan nodapot in Danow Galilea kon dotá in utuan.

²⁸ Tuata in kotá mita bo ḻipú mita inta inogoi kon motoḷuadí mita kon bonu in suku in Gad sin mobaḻí butá kapunyaan monia.

Butá inta inogoi kon tongobotak in suku Manasye

²⁹ Tongobotak nongkon butá inta pinodandi i Tuhan kon umat in Israel tua inogoi domandon i Musa kon motoḷuadí mita inta kon bonu in tongobotak in suku Manasye sin mobaḻí kapunyaan monia.

³⁰ Sigad mita in butá monia nodapot kon Mahanaim, noituot doman in bayongan in Basan – tuata in bayongan butá inta kinawasa i Og, datu in Basan, bo ḻipú mita in Yair kon Basan inta onom nopuḷú.

³¹ Bo noitakin doman in tongosilai in butá in Gilead, bo Asytarot bo Edrei, inta ibukotá doyowa in butá kawasa i Datu Og kon Basan. Bayongan in butá tatua inogoi kon tongosilai in motoḷuadí mita buí i Makhir, adí i Manasye.

³² Natuata in pinososilai i Musa kon butá kon dotá in pomukaan kon Yerikho, inta kon ḷoḷan Ongkag in Yordan, kon tungkuḷ in sia kon rata moompá in Moab.

³³ Táe suku Lewi in diábí nokouḻí kon butá topiḻikmai nongkon i Musa. Ki Musa in noguman kon i monia kon inta mobaḻí tonsilai monia in kurubanbí mita inta pinosumba kon i Tuhan Allah in Israel.