YOHANES 3 1 - Alkitab Singog In Mongondow Masa In Tanaa

¹ Ki utatku ki Gayus inta kinotabiku! Akuoi, tobatú itoi in jamaat inta totu-totuu motabi kon inimu,

² umuran mako mopoigum doa kon i Allah sinbá ki Utat in tantúpa mosehat bo bayongan inta mopia tantúpa doman umuran moyotakinmu, ná doman ginamu inta umuran mopia.

³ Noḷunganga totok in ginaku kon tungkuḷ in nokodongog kon ouman in tongonumai intau in Keresten inta namangoi kon inakó. Mosia in nongonguman kon ki Utat in totokbí in motoindudui kon bayongan inta kinoibog i Allah. Kinotaauankubí kon ki Utat in umuranbí mogaid kon inta mopia ná inta sinundú i Allah.

⁴ Aka kon inakó, diábí in poḻiu kon ḷunganga in ginaku wakutu in nokodongogmai kon ki adíku mita in umuran nobiag noidudui kon onu inta sinundú i Tuhan.

Ki Gayus dinayow

⁵ Utatku! Mopiadon totok in onu inta inaidanmu kon i utat mita inta tumpaḷa Keresten; umpaka utat mita inta diápa nogogintaauanmu, táe binantunganmubí doman.

⁶ Tabimu tatua ain inouman monia kon jamaat inta pinogutunanku mako tanaa. Natua uḻe, tuḷungaibí in mosia podudui in onu inta kinoibog i Allah, sinbá motaaupa in mosia mogingguput kon bobayáan monia.

⁷ Sin kon binayáan monia mogaid kon oaidan i Kristus, mosia in diábí motarima kon totuḷung onukadon nongkon intau mita inta diá nonotaau kon i Allah.

⁸ Sin tuamai, kita intau mita in Keresten in musti motuḷung kon yobayat mita tumpaḷa Keresten inta ná tatua, sinbá kita moitakindon moramuji mopohabar in totundú inta noitutui nongkon i Allah.

Ki Diotrepes bo ki Demetrius

⁹ Akuoi ain nokidia in surat kon jamaat umpaka tongá nopoḷok, táe ki Diotrepes inta moibog mobaḻí itoi kon bonu in jamaat, doí dumudui kon onu inta pinogumanku.

¹⁰ Tuamai, aka akuoi in mamangoidon, yo daitonkudon oumanon in bayongan inta pinomianea, inta kopiadon mongonguman kon soaḷ mita uboḷ sin moporaa-raatmai kon i nami! Deemanbí doman tongá tua in pinomianea, sin kon tungkuḷ in ki utat mita naton tumpaḷa Keresten namangoi, doí in sia notarima kon i monia. Nodapotbí in ilarangnea in intau mita inta moibog motarima kon utat mita tatua, nodapot in pinoḷuaineadon in intau mita tatua kon bonu in jamaat!

¹¹ Utat inta kinotabiku, donaai dumudui kon oaid mita inta diá mopia. Duduiaidon in onu inta mopia. Intau inta mogaid kon mopia in kapunyaanbí i Allah. Bo intau inta mogaid kon inta moraat diápabí nonotaau kon i Allah.

¹² Komintan intau nodayow kon i Demetrius. Ki Allah tontaní in nodayow doman kon inia. Sia in dinayow domandon nami, bo kinotaauan bidon i utat kon onu in pinotaau nami naa in motaaubí pirisayaan.

Salam pinonimpod

¹³ Mobayongbí in paraḷuku poguman kon inimu, táe mopia-piabí kon deeman tongá pongin surat.

¹⁴ Haraponku mako tua in ḷagidon moyodungkuḷmu, bo kita mongonguman moyogintayowan mako.

¹⁵ Poigumon mako tua in tantú barakatan i Tuhan in ki utat. Yobayatmu mita inta kon tampatku naa in nokidia doman in salam kon inimu. Poyaputpa doman in salamku kon yobayat mita naton tumongobatú.