YOHANES 1 4 - Alkitab Singog In Mongondow Masa In Tanaa

Roho inta mobanar bo roho inta diá mobanar

¹ Utat mita inta kotabiku! Donaaibí mogampang kinopiri-pirisayanea kon intau mita inta mongaku kinawasa in Roho i Allah, táe ujipa muna in mosia tua sinbá kotaauandon monimu mongo roho kon i monia tua nongkon i Allah andeka deeman. Sin nobayongdon intau in maya-mayá mako bo mongaku nabi bokaka deemanbí totuu nabi.

² Nanaa in tandanea kon i naton monotaau mongo tua in Roho i Allah andeka deeman: Intau inta mongaku kon ki Yesus Kristus in namangoidon in dunia saḷaku intau, yo intau tatua kinawasa in Roho i Allah.

³ Táe intau inta doí mongaku kon soaḷ ki Yesus, yo sia tua in diá kinawasa in Roho i Allah, táe intau tatua kinawasadon in roho inta nongkon Saturu i Kristus. Bo soaḷ sia tua ain bidon kinodongogan monimu kon mamangoibí in sia, bo tanaa sia in namangoidon kon dunia naa.

⁴ Táe uḻe, moiko nion ki Allahbí in kitogi. Sinaḷowdon monimu in intau mita inta deeman totuu nabi, sin Rohobí inta nongawasa kon i monimu in mokawa-kawasa nongkon roho mita inta nongawasa kon intau mita inta nobaḻí kapunyaan in dunia naa.

⁵ Intau mita inta deeman totuu nabi tua in nongonguman kon soaḷ mita in dunia naa, bo onu in inouman monia tua indongoganbí in dunia naa.

⁶ Táe kita naa in ki adíbí mita i Allah; bo intau mita inta nonotaau kon i Allah in mokidongogbí kon singog naton. Táe intau inta deeman kapunyaan i Allah, diábí mokidongog kon singog naton. Natua in caranea kita monotaau kon yoposi in Roho inta motundú kon mobanar, bo roho inta motundú kon diá totuu.

Ki Allah tua in tabibí

⁷ Utat mita inta kinotabiku! Koḻigai bá kita in umuran mobiag mositabian tobatú bo tobatú, sin tabi tua in nongkon i Allahbí, bo intau inta kototabi kon tumpaḷa intau in ki adíbí mita i Allah bo nonotaau kon i Allah.

⁸ Intau inta diá kototabi, in diábí nonotaau kon i Allah; sin ki Allah tua in tabibí.

⁹ Aid i Allah noponiata kon Sia in motabi kon i naton, yo Sia in nopotabá kon i Adí-Nea tuḷong namangoi in dunia naa, sinbá kita in mokouḻí kon kobiagan nongkon i-Nia.

¹⁰ Naabí in tabi tua: Deemanbí kita in notabi kon i Allah, táe ki Allahbí in notabi kon i naton bo nopotabá kon i Adí-Nea sin motobut kon bayongan in dosa naton.

¹¹ Utat mita inta kinotabiku, aka tabi i Allah totuu moḷoben kon i naton, dá kita in mustibí doman mositabian.

¹² Diábí tobatúmai intau in nokoimontandon in nokoontong kon i Allah, táe aka kita mositabian, yo ki Allah notobatúdon naton bo tabi-Nea mobaḻídon mosompurna kon i naton.

¹³ Lantaran ki Allah ain nobogoi in Roho-Nea kon i naton, dá kinotaauan naton kon kita naa in nobiag bidon notobatú takin i Allah, bo ki Allah nobiag doman notobatú takin naton.

¹⁴ Kami tontaní ain nokoontong kon i Adí i Allah, bo kami in nopohabar kon Sia in pinotabá mangoi i Amá sin mobaḻí Datu Mopoposaḷamat in dunia naa.

¹⁵ Ki ine in mopirisaya kon ki Yesus tua in ki Adí i Allah, yo ki Allah notobatú takin intau tatua, bo intau tatua in notobatú domandon i Allah.

¹⁶ Kita tontaní ain nonotaau bo nopirisaya kon tabi i Allah kon i naton. Ki Allah tua in tabibí. Intau inta umuran kototabi kon tumpaḷa intau, in notobatúdon takin i Allah in Sia, bo ki Allah in notobatúdon takin intau tatua.

¹⁷ Tabi in binaḻídon nosompurna kon i naton, sinbá oyúondon in kabaranian naton kon Singgai Ponantúan. Oyúon in kabaranian naton, sin kobiagan naton kon dunia naa in notongkaidon ná kobobiag i Kristus.

¹⁸ Intau inta nobiag kon bonu in totabi i Allah, diábí angoian ondok, sin tabi inta mosompurna in monginggamádon kon bayongan ondok. Dá kotaauan bidon, aka intau bo moondokpa in tumayow kon Singgai Ponantúan yo intau tatua in diápa notarima kon tabi inta nosompurna nongkon i Allah.

¹⁹ Kita motabi, sin ki Allah ain muna notabi kon i naton.

²⁰ Aka oyúon in intau moguman, “Akuoi in motabi kon i Allah,” táe sia in diá motabi kon i utatnea, yo mouboḷ in intau tatua. Sin intau inta diá motabi kon i utatnea inta ontongonnea mako, tantú diábí doman kumaan kon akaḷ aka sia in motabi kon i Allah inta diá inontongnea.

²¹ Tuamai, naa in parenta inta inogoi i Kristus kon i naton: Ki ine in motabi kon i Allah yo musti motabi kon i utatnea doman.