YOHANES 1 3 - Alkitab Singog In Mongondow Masa In Tanaa

Ki adíbí mita i Allah

¹ Indoiaika dá ki Allah totokbí in motabi kon i naton, sahingga ináku-Neadon in kita saḷaku ki adí-Nea mita. Bo totuu kon kita naa in ki adíbí mita i Allah. Tuamai dunia inta moraat naa in diá nonotaau kon i naton, lantaran dunia diá nonotaau kon i Allah.

² Utat mita inta kinotabiku! Tanaa mako kita ain nobaḻí ki adí i Allah, táe kaadaan naton kon singgai moiduduimai in diápa notarang.Tongá kinotaauan naton kon aka ki Kristus in mamangoi, kita naa in mobaḻí ná Sia, sin kita in mokoontong kon i-Nia kon bonu in kaadaan-Nea inta sabanarnea.

³ Komintan intau inta oyúon in harapan nanaa kon i Kristus, musti totuu mokopodarit kon kobobiag, modarit nongkon dosa mita naonda bo ki Kristus nodarit doman.

⁴ Intau inta nogaid kon dosa, noḷawangbí kon hukum i Allah; sin dosa tua in aidbí moḷawang kon hukum i Allah.

⁵ Bo kinotaauan bidon monimu kon ki Kristus tua in namangoi sin motobut kon dosa mita intau, bo Sia tua in diábí kon dosa.

⁶ Komintan intau inta nobiag notobatú takin i Kristus, diábí umuran mogaid kon dosa. Intau inta umuran mogaid kon dosa, diábí kon dodai onda in mokoontong kon i Kristus andeka monotaau kon i-Nia.

⁷ Adíku mita, dika moibog in moiko poyayingon i inekadon. Sin intau inta nogaid kon onu inta kinoibog i Allah, mosia tuata in ki adí mita i Allah ná doman onda bo ki Kristus inta ki Adí i Allah.

⁸ Táe intau inta umuran mogaid kon dosa, mosia tua in ki adí mita in Ibilis, sin Ibilis tua in nongkon pinomangkoianpabímai umuran nogaid kon dosa. Tuabí in mangaḻe inangoian i Adí Allah, Sia in morimumud kon oaidan mita in Ibilis.

⁹ Intau inta nobaḻídon ki Adí i Allah in diá bidon tantú mogaid kon dosa, sin sipat i Allah oyúondon in kon inia. Bo lantaran ki Allah tua in ki Amánea, dá sia in diá bidon motaau umuran mogaid kon dosa.

¹⁰ Naabí in nokoyoposi kon sigad in adí mita i Allah bo adí mita in Ibilis. Ki ine in diá mogaid kon onu inta kinoibog i Allah, andeka diá motabi kon i utatnea, sia tua in deemanbí ki adí i Allah.

Mobiag mositabian

¹¹ Nongkon pinomangkoianmai habar tanaa ain pinotaau kon i monimu: Kita in musti mositabian tobatú bo tobatú.

¹² Donaaibí in kita ná ki Kain, inta nobaḻí ki adí in Ibilis bo noḻimodon kon i utatnea tontaní. Nongonu sin ki Kain in noḻimodbí kon i utatnea? Popisíbí in soaḷ mita inta pinomianea in nongoitaḷá, táe soaḷ mita inta pinomia i ai-ainea in noitutui.

¹³ Manangka intua, utatku mita, dikabí moherang aka moiko kodoí in intau mita in dunia naa.

¹⁴ Kinotaauandon naton kon kita iḷumuaidon nongkon kawasa in popatoi, bo nomampingdon kon bonu in kawasa inta mokobiag, sin lantaran kita notabidon kon i utat mita naton. Sin ki ine in diá motabi kon i utatnea, yo sia tua in tantúpa nobiag kon bonu in kawasa in popatoi.

¹⁵ Intau inta mosaturu kon i utatnea in intaubí moḷoḻimod, bo kinotaauanbí monimu kon intau moḷoḻimod in diábí mokouḻí kon kobiagan mopia bo mononoi.

¹⁶ Naa in daḷan bá kotaauan naton in motabi kon tumpaḷa intau: ki Kristus in noposarakandon in kobiagan-Nea sin kopontingan naton. Sin tuamai, kita doman in musti moposarakan in kobiagan naton kon kopontingan i utat mita naton!

¹⁷ Aka moiko inta nobiagdon nooyúon bo nokoontong kon utat inta nobiag nobogá, táe doí motuḷung kon i utatnea tatua, dá naondabí in sia motaau moguman, ‘Akuoi in motabi kon i Allah?’

¹⁸ Adíku mita! Donaaibí in kita motabi tongá kon bibig ande tongá kon singog, táe poniatabí in tabi tatua kon oaid naton.

Koyakinan kon tayowon i Allah

¹⁹ Natua in caranea kita monotaau kon kita naa in noituot ki adí mita i Allah inta mobanar, bo gina naton moonowdon kon tayowon i Allah.

²⁰ Kinotaauandon naton, kon aka kita bo potaḷáandon in gina naton, yo ki Allahbí in mopando-pandoi nongkon gina naton, bo kinotaauan-Neabí in bayongan yagi-yagi.

²¹ Dá utatku mita inta kinotabiku, aka gina naton diá mopotaḷá kon i naton, yo kita in diábí moondok in mayá kon tayowon i Allah.

²² Bo onu in igumon naton kon i-Nia, tarimaanbí naton, sin kita in umuran dinumudui kon parenta-Nea mita bo nogaid kon onu inta mokosanang kon gina-Nea.

²³ Naa in pinarenta-Nea kon i naton: Kita in musti mopirisaya kon i Adí-Nea, tuata in ki Yesus Kristus, bo kita in musti umuran mositabian, ná inta ain pinarenta i Kristus kon i naton.

²⁴ Bayongan in intau inta motoindudui kon parenta mita i Allah, nobiag notobatú takin i Allah, bo ki Allah in notobatú doman takin i monia. Bo kinotaauan bidon naton kon ki Allah in nobiag bidon notobatú takin i naton, sin Sia in nobogoidon in Roho-Nea kon i naton.