YOHANES 1 2 - Alkitab Singog In Mongondow Masa In Tanaa

Ki Kristus mototuḷung naton

¹ Adíku mita! Naa mita in pinaisku kon i monimu, sinbá moiko in diádon mogaid kon dosa. Tongá aka oyúon in mogaid kon dosa, dá oyúon in mototuḷung naton, Sia tua in ki Yesus Kristus inta moadil. Sia in mayá in tayowon i Allah bo mopoigum sinbá ampungandon in taḷá mita naton.

² Bo pinotonsigad kon i Yesus Kristus tuata, bayongan in dosa naton inampungan. Bo deemanbí doman tongá taḷá naton, táe taḷábí doman in bayongan intau.

³ Aka kita bo umuran dumudui kon parenta mita i Allah, dá tua in tandanea kon kita in nonotaau kon i Allah.

⁴ Intau inta mongaku, “Akuoi in nonotaau kon i Allah,” táe diá dinumudui kon parenta-Nea mita, yo mouboḷ in intau tatua, bo ki Allah in doíbí mogutun kon bonu in ginanea.

⁵ Táe intau inta umuran dinumudui kon parenta mita i Allah, yo tabi in intau tatua kon i Allah nosompurnadon. Tua in nobaḻí tanda kon kita in nobiagdon notobatú takin i Allah.

⁶ Ki ine i moguman kon sia in nobiag notobatú takin i Allah, yo sia musti mobiag takin dumudui kon kobobiag i Kristus.

Parenta mobagu

⁷ Utatku mita inta kinotabiku! Onu in pinaisku tanaa in deemanbí parenta mobagu, táe parentabí inta noonggotdon inta ain pinogumanku kon i monimu kon wakutu in moiko bagupa nopirisaya kon i Kristus, tuata in habar inta nongkon i Allah bo inta ain dinongog monimu koḻipod.

⁸ Umpaka natua, táe parenta inta pinaisku naa in nobagubí doman; sin kobobanarnea in motaaubí indoian kon i Kristus bo kon i monimu. Sin sindip in koinggamá-koinggamádon bo bayag inta moḷoben momangkoidon monindar.

⁹ Intau inta noguman kon sia in nobiagdon kon nobayag, táe sia in umuranpa doman mosaturu kon i utatnea, yo intau tatua in umuranpabí nobiag kon nosindip umaai in tanaa mako.

¹⁰ Intau inta motabi kon i utatnea, nobiag kon nobayag sahingga in diábí tobatúmai in kon inia in mokopopisí kon intau ibanea mogaid kon dosa.

¹¹ Táe intau inta mosaturu kon i utatnea in nobiagpabí kon sindip. Sia in minayá kon bonu in sindip, bo diá kotaauannea mongo kon onda in bayáannea, sin sindipdon tatua in mogoḻingoi kon inia.

¹² Naa in pinaisku kon i monimu, uḻe Adíku mita, sin taḷámu mita aindon inampungan lantaran tangoi i Kristus.

¹³ Pinaisku in naa kon i monimu, Amá mita, sin moiko in nonotaaudon kon i-Nia inta oyúondon nongkon pinomangkoianpamai. Pinaisku in naa kon i monimu, intau mita inta nongobagupa, sin sinaḷowdon monimu in ki Inta Moraat.

¹⁴ Uḻe Adíku mita, akuoi in nomais kon naa kon i monimu, sin moiko in nonotaaudon kon i Amá. Pinaisku in naa kon i monimu amá mita, sin moiko in nonotaaudon kon i-Nia inta oyúondon nongkon pinomangkoianmai. Pinaisku in naa kon i monimu intau mita inta nongobagupa, sin moiko in moropot. Singog i Allah noitonop kon bonu in ginamu, bo sinaḷowdon monimu ki Inta Moraat.

¹⁵ Dikabí motabi kon dunia naa, ande onu in kon bonunea naa. Aka moiko motabi kon dunia naa yo diábí in moiko motabi kon i Amá.

¹⁶ Bayongan in yagi-yagi inta kon bonu in dunia naa, tua in kinoibog in awak inta baradosa naa, onu inta koontongan bo inta pongaḷakuang, tua komintan in deemanbí nongkon i Amá, táe nongkon duniabí naa.

¹⁷ Dunia naa bo bayongan tombonunea inta kinoibog in intau koyogotdon in moyoyang. Táe intau inta dinumudui kon ibog i Allah, i mobiagbí mononoi.

Intau inta mosaturu kon i Kristus

¹⁸ Uḻe Adíku mita, kopaḷutan in dunia motoyongdon! Bo ná inta ain pinoguman kon i monimu, intau mita inta Mosaturu kon i Kristus in mamangoibí. Bo tanaa mobayongdon in mosia inta mosaturu kon i Kristus. Tua in tandanea kon motoyongdon in kopaḷutan in dunia.

¹⁹ Saturu mita i Kristus tua in intaubí mita inta nonaḷámaidon kon i naton naa, lantaran mosia tua in deemanbí totuu intau naton. Aka mosia intau mita naton, tantú mosia in umuranbí noyotakin naton. Natuabí sinbá motarangdon kon i naton kon mosia tua in diábí totu-totuu moibog mopirisaya kon i Tuhan moyotakin naton.

²⁰ Táe moiko in notarimadon kon Roho i Allah inta ain inogoi i Yesus Kristus, manangka intua moiko in nonotaaudon kon totundú mita inta nobanar.

²¹ Pinaisku in naa kon i monimu deemanbí lantaran moiko diápa nonotaau kon totundú inta nobanar, táe lantaranbí kinotaauandon monimu in totundú tatua bo kinotaauandon monimu kon diábí in uboḷ kon totundú inta nobanar tatua.

²² Ki ine in mouboḷ tua, tantú intaubí inta noguman kon ki Yesus tua in deemanbí Datu Mopoposaḷamat inta pinodandi i Allah. Mosia tua in Saturu i Kristus, sin diábí akuonnea in ki Amá andeka Adí.

²³ Intau inta diá motarima kon i Adí, dá mangaḻenea sia in diá doman motarima kon i Amá.

²⁴ Sin tuamai, habar inta ain dinongog monimu, wakutu in moiko bagupa nopirisaya, mustibí tagúon monimu kon bonu in gina. Sin aka habar inta ain dinongog monimu tua umuran kon gina-gina mako monimu, yo moiko in umuranbí mobiag motobatú takin i Adí bo i Amá.

²⁵ Bo naa in pinodandi i Kristus tontaní kon i naton: kobiagan motompia bo mononoi.

²⁶ Pinaisku tanaa kon i monimu in soaḷbí intau mita inta umuran moramuji monguboḷ kon i monimu.

²⁷ Táe aka soaḷ moiko nion ain bidon inogoian i Kristus in Roho-Nea. Bo kon dodai in Roho tatua mongawasapa kon i monimu, diá bidon paraḷu in intau ibanea in motundú kon i monimu, sin Roho bidon tatua in motundú kon bayongan yagi-yagi kon i monimu. Bo onu in tundúon-Nea totuubí intua deemanbí tongá uboḷ. Tuamai tantúdon dudui kon onu inta ain sinundú-Nea tua kon i monimu bo umurandon kobiag motobatú takin i Kristus.

²⁸ Pogumanku bui kon i monimu adíku mita: Kobiag umuran motobatú takin i Kristus, sinbá aka Sia in mamangoidon bui, yo kita in diádon moondo-ondok in tumayow kon i-Nia, bo diá domandon mooya-oyá.

²⁹ Kinotaauandon monimu kon ki Kristus in nobiag podudui in ibog i Allah. Tuamai musti kotaauan doman monimu kon pomuḷoi in intau inta nobiag podudui in ibog i Allah, ki adíbí mita i Allah.