YOHANES 6 - Alkitab Singog In Mongondow Masa In Tanaa

Ki Yesus Nobogoi in Kaanon kon intau ḻima noribu

¹ Nopaḷut mako kon tua ki Yesus minayá in ḷoḷan Danow Galilea inta sinangoian Danow Tiberias.

² Noiyaputmai in tua, mobayong in intau in dinumudui kon i-Nia sin nokoontongdon in mosia kon inta mokoherang inta pinomia i Yesus kon intau mita nongotakit inta sinokoundamanan-Nea.

³ Ki Yesus in notakod kon buḷud, bo iḻimitú kon tua takin murí-Nea mita.

⁴ Wakutu intua diádon moonggot in Singgai Moḷoben Paska intau in Yahudi.

⁵ Dodai in ki Yesus nobobui magí-mako, inontong-Nea in intau moyo-moyodudui in mamangoi kon i-Nia. Dá Sia noḻibó kon i Pilipus, “Kon onda i motaau naton potaḷuian kon kaanon, sinbá bayongan in intau tanion in mongaan?” (

⁶ Kinotaauan bidon i Yesus onu in musti aidan-Nea, táe Sia in noguman natua sin monungkuḷ kon i Pilipus.)

⁷ Ki Pilipus in notubag, “Aka roti bo tongá boḻi in doyowa nogatut doit saḷaka yo diábí tugat pokaan kon intau mita tanion, umpakabí tongá poyopiḻikon mako.”

⁸ Murí i Yesus tobatú inta ki Andreas ki utat i Simon Petrus noguman kon i Yesus,

⁹ “Kon naa oyúon in adí ḷoḷaki inta nodia kon roti ḻima nobatú bo toyá doyowa nobungá. Táe diábí pongonu aka kon intau moantó tanion?”

¹⁰ Ki Yesus in noguman, “Pokiḻitúaidon in intau mita tanion.” Kon tampat tatua nobayong in bonok, dá intau mita tatua iḻimitú kon bonok. Mosia komintan tua oyúonbí in ḻima noribu in ḷoḷaki.

¹¹ Onda intua ki Yesus nogamá kon roti bo nopoyaput in sukur kon i Allah. Nopaḷut mako kon tua sinila-silai-Nea mako in roti tatua kon intau moantó tatua. Noiduduimai kon tua sinila-silai-Nea domandon in toyá tatua, bo mosia in komintan nongaan kinooibogbí monia.

¹² Naonda in komintandon nongaan nobotug, ki Yesus noguman kon murí-Nea mita, “Sipundon in ki agat mita in roti inta diá kinaan monia sinbá diá mogoguyaat.”

¹³ Bo sinipun monia. Nosipun magí mopuḷú bo doyowa nokompé ki agat in kaanon inta tongá nongkon roti ḻima nobatú bo pinokaan kon intau mobayong tatua.

¹⁴ Naonda intau moantó tatua nokoontong kon inta mokoherang pinomia i Yesus, mosia in noguman, “Totuu, naabí in nabi inta i harap mako mamangoi in dunia!”

¹⁵ Kinotaauan i Yesus kon mosia in mamangoi sin momakisa kon i-Nia mobaḻí Datu monia. Tuamai in Sia minayádon kon daerah inta notombuḷud.

Ki Yesus minaya-mayá kon tudu in tubig

¹⁶ Naonda mulaidon moungkoḷom, murí mita i Yesus nosiḻigdon bo minayá in danow.

¹⁷ Bo mosia in sinumakoi kon uangga bo minayá in Kapernaum. Nodoḷomdon, táe ki Yesus in diápa doman namangoi kon i monia.

¹⁸ Dodai intua momangkoidon mobokoḷ in danow tatua sin tompot mogirup moropot.

¹⁹ Naonda in noyayúdon pinobotoian monia, degá ḻima ande onomdon nokilo in binayáan monia, mosia in nokoontong kon i Yesus nopoangoi in uangga takin minaya-mayá kon tudu in tubig. Mosia in totokdon noondok.

²⁰ Táe ki Yesus in noguman, “Dika moondok sin Akuoibí in naa!”

²¹ Bo takin pia in gina mosia nonongganutdon kon i-Nia sinumakoi kon uangga, bo dodaipa doman tua uangga monia noitubudon kon tampat bayáan monia.

Intau mita notayak kon i Yesus

²² Nopoikoḷomai kon singgai, intau moantó inta umuranpa kon ḷoḷan danow, in nonotaaudon kon tongábí tobatú in uangga kon tua. Kinotaauandon doman monia kon murí-Nea mita in sinumakoidon kon uangga bo inumuna minayá. Ki Yesus in diápabí sinumakin.

²³ Noiduduimai kon tua tongonumai uangga nongkon kotá in Tiberias namangoi bo sinumubu kon diug in tampat pinokaanan kon intau moantó kon roti naonda in ki Tuhan nopoyaput in sukur.

²⁴ Naonda in intau moantó tatua diádon nokoontong kon i Yesus bo murí-Nea mita kon tampat tatua, mosia in sinumakoi kon uangga tatua bo minayá in Kapernaum motayak kon i Yesus.

Ki Yesus Roti Inta Mobogoi in Kobiagan

²⁵ Naonda in intau mita tatua noyodungkuḷdon i Yesus kon ḷoḷan danow, mosia in noḻibó kon i-Nia, “Pak Guru, dodai onda ki Pak Guru noidapot in naa?”

²⁶ Tubag i Yesus, “Totuubí kon moiko in notayak kon i-Nakó deemanbí popisí in kinomangaḻeandon monimu in makusud in inta mokoherang mita pinomia-Ku, táe popisíbí in moiko nongaandon nodapot in nobotug.

²⁷ Donaaibí mogaid sinbá mokouḻí kon kaanon inta modai-daitpa bo inta mobongkog. Táe pogaidbí sinbá mokouḻí kon kaanon inta diá mobongkog bo inta mobogoi in kobiagan mononoi. Kaanon tatua in ogoibí i Adí Intau kon i monimu, sin Sia ain ilantik i Allah inta ki Amá.”

²⁸ Dá mosia in noḻibó kon i-Nia, “Onu in musti pomiaan nami, sinbá kami in mogaid kon oaidan inta kinoibog i Allah?”

²⁹ Ki Yesus in notubag, “Tanaabí in kinoibog i Allah nongkon i monimu: Popirisayadon kon i-Nia inta pinotabá mangoi i Allah.”

³⁰ Dá kai monia doman, “Aka natua, onu in tanda poontong i Pak Guru kon inami, sinbá kami in mokoontong bo mopirisaya kon i Pak Guru? Onu in aidan i Pak Guru?

³¹ Mogoguyang nami nokaan kon manna kon padang gurun, ná inta pinais kon bonu in Buk Motusi, ‘Sia in nobogoi in roti nongkon soroga.’ ”

³² Bo Ki Yesus in noguman kon i monia, “Pirisayabí: Deemanbí ki Musa, táe ki Amá-Kubí in nobogoi kon inimu in roti inta totuu nongkon soroga.

³³ Sin roti inta inogoi i Allah in Siabí inta noponag nongkon soroga bo nobogoi in kobiagan kon intau kon dunia.”

³⁴ Dá mosia in noguman, “Pak Guru, umurandon ogoiai in roti tatua in kami.”

³⁵ Dá kai Yesus doman, “Akuoibí naa in roti inta mobogoi in kobiagan, intau mita inta mamangoi kon i-Nakó in diá bidon angoian bui in gogoy. Bo intau inta mopirisaya kon i-Nakó in diá bidon moyoga-yogang bui.

³⁶ Táe ná kain singog-Ku kon i monimu, umpakabí ain inontong monimu in Akuoi, táe diábí mopirisaya in moiko.

³⁷ Bayongan in intau inta inogoi i Amá-Ku kon i-Nakó in mamangoibí kon i-Nakó. Ki inekabí in mamangoi kon i-Nakó diábí in diá tarimaan-Ku.

³⁸ Sin Akuoi in namangoi nongkon soroga deemanbí mamangoi mogaid kon onu inta kinoibog-Ku tontaní, táe mogaidbí kon inta kinoibog-Nea inta nopotabá kon i-Nakó.

³⁹ Bo naabí in kinoibog i-Nia inta nopotabá kon i-Nakó: Sinbá bayongan intau inta inogoi kon i-Nakó, diá tobatúmai in mobuḻi; táe bá biagon-Ku in mosia kon singgai ponantúan.

⁴⁰ Totuu, naabí in kinoibog i Amá-Ku: Bá bayongan intau inta nokoontong kon Adí bo nopirisaya kon i-Nia mokouḻí kon kobiagan mopia bo mononoi, bo mobiag bui kon singgai ponantúan.”

⁴¹ Intau mita Yahudi mulaidon mongunsingog kon i Yesus, sin ki Yesus in noguman: “Akuoi in roti inta noponag nongkon soroga.”

⁴² Mosia in noguman, “Sia naa in ki Yesus, ki adí i Yusup toh? Kinotaauanbí nami in ki iná bo ki amá-Nea! Yo nongonu sin Sia in mogumanbí, kon Sia in noponag nongkon soroga?”

⁴³ Dá ki Yesus in noguman kon i monia, “Donaai mongunsingog.

⁴⁴ Diábí in tobatúmai intau motaau mamangoi kon i-Nakó, aka diá diaan mangoi i Amá inta nopotabá mangoi kon i-Nakó. Ki ine in mamangoi kon i-Nakó, yo biagon-Kubí in sia kon singgai ponantúan.

⁴⁵ Kon bonu in Buk in nabi mita pinais nanaa: ‘Komintan intau tundúonbí i Allah.’ Dá bayongan intau inta ain nokodongog kon totundú bo nobalajar nongkon i Amá, mamangoibí kon i-Nakó.

⁴⁶ Tongá tua in deemanbí mangaḻenea kon oyúondon intau inta ain nokoontong kon i Amá. Tongábí Sia inta namangoi nongkon i Allah in nokoontongdon kon i Amá.

⁴⁷ Pokotaaudon: Intau inta mopirisaya, oyúonbí in kobiagan mopia bo mononoi.

⁴⁸ Akuoibí naa in roti inta mobogoi in kobiagan.

⁴⁹ Mogoguyang monimu in nokaandon kon manna kon padang gurun bo mosia ain minatoi.

⁵⁰ Táe diábí natua in roti inta noponag nongkon soroga; intau inta mokaan kon roti tatua in diábí matoi.

⁵¹ Akuoibí in roti inta noponag nongkon soroga, roti inta mobogoi in kobiagan. Intau inta mokaan kon roti tanaa in umuranbí mobiag. Roti inta ogoi-Ku kon kobiagan intau kon dunia naa in awak-Kubí.”

⁵² Nokodongogmai kon tua, intau mita in Yahudi nobobayowan. Mosia in nosingog: “Umpaka intau tanion mokobaḻí mobogoi in awak-Nea sin kaanon naton?”

⁵³ Bo ki Yesus in noguman kon i monia, “Poguman-Kudon kon i monimu, Aka moiko bo diá mokaan kon awak i Adí Intau bo monginum kon dugú-Nea, yo diábí in moiko mobiag.

⁵⁴ Intau inta mokaan kon awak-Ku bo monginum kon dugú-Ku sia in mokouḻí kon kobiagan mopia bo mononoi bo biagon-Kubí in sia kon Singgai Ponantúan.

⁵⁵ Sin awak-Ku in totu-totuubí kaanon bo dugú-Ku in totuubí kon inumon.

⁵⁶ Intau inta mokaan kon awak-Ku bo monginum kon dugú-Ku, umuranbí in Sia motobatú takin-Ku, bo Akuoi i motobatúnea doman.

⁵⁷ Ki Amá inta nobiag tua, in nopotabá kon i-Nakó, bo Akuoi doman in nobiagbí nongkon i Amá. Natua doman in intau inta mokaan kon awak-Ku, sia in mobiagbí doman nongkon i-Nakó.

⁵⁸ Naabí in roti inta noponag nongkon soroga: deemanbí ná roti inta kinaan in mogoguyang monimu. Sin naonda in nokaan mako kon roti tatua, mosia in minatoi doman. Táe intau inta mokaan kon roti tanaa in umuranbí mobiag.”

⁵⁹ Tua komintan in pinoguman i Yesus dodai in Sia nobogoi in totundú kon baḷoi pososambayangan kon Kapernaum.

Singog mita inta mobogoi in kobiagan mopia bo mononoi

⁶⁰ Naonda in nokodongog kon singog mita i Yesus tatua, nobayong kon sigad in murí-Nea mita in noguman, “Totundú tanaa totuu mobogat. Ki inebí in mokomampu in motarima kon tua!”

⁶¹ Kinotaauanbí i Yesus kon murí-Nea mita in mongunsingogbí doman kon soaḷ tatua. Dá tuamai Sia in noguman, “Degá mokotersinggung kon i monimu in singog-Ku mita tatua?

⁶² Yo onu degá in mobaḻí aka moiko in mokoontongdon kon i Adí Intau mamonik bui kon tampat-Nea inta muna?

⁶³ Rohobí i Allah in nobogoi in kobiagan kon intau. Ropot in intau naa diá baragunanea. Singog mita inta pinosingog-Ku kon i monimu naa in singogbí mita in Roho i Allah bo singogbí inta mobogoi in kobiagan.

⁶⁴ Tongá oyúon doman kon sigad monimu in diá mopirisaya.” (Kinotaauan bidon muna i Yesus in intau mita inta doí mopirisaya, bo ki ine mobaḷui in pirisaya kon i-Nia.)

⁶⁵ Bo ki Yesus in bui noguman, “Tuamai Akuoi in mopotaaudon kon inimu, diábí tobatúmai in intau in motaau mamangoi kon i-Nakó, aka diá kinoibog i Amá.”

⁶⁶ Nongkon dodaidon in tuata bo nobayong in dumodudui-Nea in nonaḷámaidon kon i-Nia, bo doídon dinumudui kon i-Nia bui.

⁶⁷ Bo ki Yesus noḻibó kon murí-Nea inta mopuḷú bodoyowá tatua, “Yo degá moiko in monaḷá domanmai kon i-Nakó?”

⁶⁸ Dá ki Simon in noḻibó, “Tuhan, kon i inepa in bayáan nami? Tosingogon i Tuhan mobogoi in kobiagan mopia bo mononoi.

⁶⁹ Kami naa in nopirisaya bo noyakin bidon kon ki Tuhanbí in totabá inta motusi nongkon i Allah.”

⁷⁰ Ki Yesus in notubag: “Kinotaauan bidon monimu kon Akuoibí in nomiḻí kon i monimu mopuḷú bodoyowá naa? Tongá tobatú kon sigad monimu nion in kinawasa in Ibilis!”

⁷¹ Ki Yudas ki adí i Simon Iskariot i makusud i Yesus tatua. Sin ki Yudasbí tuata in moposarakan kon i Yesus, umpaka sia in murí doman i Yesus inta kon sigad in murí-Nea mopuḷú bodoyowá.