YOHANES 5 - Alkitab Singog In Mongondow Masa In Tanaa

Intau inta Inundaman kon Tabang Betesda

¹ Noiduduimai kon tua oyúon in pinorayaan kon Singgai Moḷoben in intau Yahudi, dá ki Yesus in minayá in Yerusalem.

² Kon Yerusalem kon diug in tampat inta sinangoian “Ngara in Domba” oyúon in tobatú tabang, inta aka kon bonu in bahasa Ibrani sinangoian Betesda. Kon tua ḻima in tampat pobobarasanangan.

³ Kon tampat pobobarasanangan mita tatua nobayong in intau mita mototakit inta mosiug mako; oyúon in bilog, oyúon in pelong, oyúon in ḻempeng. [Mosia tua in komintan mogoḷat mako kon koḻimbokan in tubig in tabang tatua.

⁴ Sin oyúon inta moiangoi in malaekat i Tuhan moponag kon tabang tatua bo moḻimbok kon tubignea. Bo intau motakit inta muna ḷumabú kon tabang tatua wakutu in moḻimbok, mopia onukabí in takitnea.]

⁵ Kon tampat tatua oyúon doman in intau tobatú inta ain toḷu nopuḷú bowaḷu notaong in notakit.

⁶ Inontong i Yesus in Sia nosiug mako kon tua, bo kinotaauanbí i Yesus kon totokdon in noonggot in sia notakit, dá ki Yesus in noḻibó kon inia, “Moibog mopia in iko?”

⁷ Intau notakit tatua in notubag, “Amá, diá in intau kon naa in mopoponag kon inakó kon tabang aka moḻimbok in tubignea. Bo pomuḷoi in akuoi moramuji mopobayá in tabang tatua, umuran kounaan in intau ibanea.”

⁸ Dá ki Yesus in noguman kon inia, “Pobangondon, bingkatdon in boḷadmu bo bayákadon.”

⁹ Dodaipa doman intua nopia in intau tatua. Biningkatnea in boḷadnea bo minaya-mayá. Soaḷ tatua in nobaḻí kon singgai in Sabat.

¹⁰ Tuamai itoi mita intau Yahudi in noguman kon intau inta bagu nopia tatua, “Singgai naa singgai in Sabat, tuamai iko in diábí motaau mobingkat kon boḷadmu.”

¹¹ Táe intau tatua in notubag, “Intau inta koina nongundam kon inakó in nokibingkat in boḷadku bo mayá.”

¹² Dá iḻibó bui monia, “Ki ine in intau inta nokibingkat in boḷadmu nion bo mayá?”

¹³ Táe diá kinotaauan in intau inta bagu inundaman tatua mongo ki ine in nopotabá kon inia tua, sin ki Yesus in minayádon bo kinooḻingoiandon in intau mobarong kon tua.

¹⁴ Noiduduimai kon tua, ki Yesus in bui noyodungkuḷ in intau tatua kon bonu in Baḷoi Tuhan, bo ki Yesus in noguman kon inia: “Pokotoropdon, nopiadon iko in tanaa. Dikadon bui mogaid kon dosa, sinbá diá koantugan bui in inta moraa-raat.”

¹⁵ Dá iḷumuaidon intau tatua bo noguman kon pongawasa mita in Yahudi kon ki Yesusbí in intau inta nokopia kon inia.

¹⁶ Dá tuamai, mosia in mulaidon moḷongasi momogutú kon i Yesus, sin Sia monon oaidan kon singgai in Sabat.

¹⁷ Táe ki Yesus in noguman kon i monia, “Ki Amá-Ku in umuranbí mogaid umaai in tanaa mako, dá Akuoi in mogaidbí doman.”

¹⁸ Singog-Nea mita tatua in nokodugangdon kon ibog monia moḷongasi moḻimod kon i-Nia. Mosia in nonomayá kon tua deemandon tongá popisí in Sia noḷawang kon atorang agama soaḷ singgai in Sabat; táe popisíbí doman in Sia noguman kon ki Allah tua in ki Amá-Nea; mangaḻenea kon tua Sia in mokipotongkaidon kon i Allah.

Kawasa in Adí

¹⁹ Tubag i Yesus kon intau mita tatua, “Poguman-Kudon kon i monimu, Adí in diábí mokoaid kon onu bo onu aka mopomaké in kawasa-Nea tontaní. Sia in tongábí mogaid kon onu inta ain inontong-Nea inaidan i Amá-Nea. Sin onu in inaidan i Amá, tua doman in inaidan i Adí.

²⁰ Sin motabibí in ki Amá kon Adí bo poontong-Neabí kon i-Nia in bayongan inta inaidan-Nea tontaní. Modapotbí in poontong i Amá kon i-Nia in oaidan mita inta moḷobe-ḷoben nongkon oaidan mita tatua, dá moiko in moherangdon.

²¹ Ki Amá tua in momiag bui kon intau minatoi, bo mobogoi kon i monia in kobiagan mopia bo mononoi; ná tua doman in Adí mobogoi doman in kobiagan mononoi kon i monia inta moibog ogoian-Nea in kobiagan.

²² Bo ki Amá in diá bidon mohakim kon i ineka, sin pinosarakan-Nea bidon intua kon i Adí-Nea.

²³ Pinomia i Amá intua sinbá bayongan in intau mohoromat kon i Adí ná mosia in mohoromat kon i Amá. Intau inta diá mohoromat kon Adí in diábí doman mohoromat kon i Amá inta nopotabá mangoi kon i Adí.

²⁴ Totuu totok in singog-Ku tanaa: Intau inta monarukira kon singog-Ku mita, bo mopirisaya kon i-Nia inta nopotabá kon i-Nakó, yo oyúon in kobiagan mopia bo mononoi. Sia in diábí hukumon; sia in noipilatdon nongkon kinopatoian bo mokouḻí kon kobiagan.

²⁵ Pirisayadon: Moiangoibí in wakutunea, sedang bo noiangoi bidon, kon intau minatoi in mokodongogbí kon singog i Adí Allah. Bo intau inta mokodongog in mobiagbí.

²⁶ Ná ki Amá nobaḻí pangkoi in kobiagan, dá binaḻí-Nea doman in Adí pangkoi in kobiagan.

²⁷ Sia in nobogoi in hak-Nea kon i Adí-Nea mohakim, sin Sia in ki Adí Intau.

²⁸ Dika moherang moiko in mokodongog kon soaḷ tanaa, sin moiangoibí i wakutunea kon intau inta ain minatoi in mokodongogbí kon singog-Nea,

²⁹ bo ḷumuai nongkon poḷoḷobongan. Intau inta nogaid kon mopia in mobangon bo mobiag. Táe intau inta nogaid kon moraat in mobangon sin hukumon.”

Bukti mita soaḷ ki Yesus

³⁰ “Akuoi in diábí motaau in mogaid kon onu bo onu podudui in ibog-Ku tontaní. Akuoi in tongábí mohakim podudui in onu inta pinarenta i Allah. Bo moadilbí in pononantú-Ku, sin Akuoi in diábí dinumudui kon ibog-Ku tontaní, táe dinumuduibí kon ibog i Amá inta nopotabá mangoi kon i-Nakó.

³¹ Aka kuma bo Akuoi in mongonguman kon soaḷ kaadaan-Ku tontaní, yo onu in inouman-Ku tatua in diábí motaau pirisayaan.

³² Táe oyúonbí in intau ibanea in nongonguman kon soaḷ Akuoi, bo kinotaauan-Kubí kon totuubí in oumannea tatua.

³³ Moiko in nopotabádon in intau minayá kon i Yohanes, bo inoumanneadon in onu inta totuu soaḷ Akuoi.

³⁴ Soaḷ tanaa in poguman-Ku, deemanbí popisí Akuoi moparaḷu kon kosakusian nongkon intau, táe bá moiko in posaḷamaton.

³⁵ Ki Yohanes tua in naonda bo togá noyongkit inta moponindar in bayag. Bo kon tanaa mako mosanangpabí in gina monimu in motarima kon sindar tatua.

³⁶ Táe kon i-Nakó in oyúon in kosakusian inta moponti-ponting nongkon kosakusian inta pinoyaput i Yohanes, tuata in oaidan inta pinoki aid i Amá kon i-Nakó. Oaidan tatuata inta yogot-Ku in aidan tanaa mako, tuata in mobaḻí bukti kon ki Amábí in nopotabá kon i-Nakó.

³⁷ Bo ki Amá inta nopotabá kon i-Nakó in nobogoi doman in kosakusian soaḷ Akuoi. Moiko in diápa kon dodai onda in nokodongog kon singog-Nea andeka nokoontong kon pogot-Nea.

³⁸ Pirman-Nea in diá noitonop mako kon ginamu sin moiko in diá mopirisaya kon i-Nakó inta pinotabá-Nea.

³⁹ Moiko in mobalajar kon Buk Motusi sin kon bonu in raian monimu, aka natua yo mokouḻí kon kobiagan mopia bo mononoi. Bo umpakabí Buk Motusi tatua tontaní ain nobogoi in kosakusian soaḷ Akuoi.

⁴⁰ Táe moiko in doí mamangoi kon i-Nakó sinbá mokouḻí kon kobiagan mononoi.

⁴¹ Akuoi in doíbí mokidayow kon intau.

⁴² Kinotaauan-Kubí in moiko. Kinotaauan-Kubí kon diábí in tabi monimu kon i Allah.

⁴³ Akuoi namangoi takin kawasa i Amá-Ku, táe moiko in doí motarima kon i-Nakó. Táe aka intau ibanea in mamangoi kon i monimu takin kawasanea tontaní yo tarimaan monimu in sia.

⁴⁴ Naondabí in kopopirisaya monimu aka moiko tongábí motayak kompé dayowon in intau ibanea, diábí moramuji sinbá dayowon i Allah inta totobatú tua?

⁴⁵ Dikabí mosangka kon Akuoi in mopotaḷá kon i monimu kon tayowon i Amá. Sin ki Musabí inta i harap mako monimu in mopotaḷá kon i monimu.

⁴⁶ Aka kuma bo moiko in mopirisaya kon i Musa, yo moiko in mopirisayabí kon i-Nakó, sin sia ain doman nomais soaḷ Akuoi.

⁴⁷ Táe aka moiko bo diá mopirisaya kon onu inta pinais tatua, yo naondabí in moiko motaau mopirisaya kon onu inta pinoguman-Ku?”