YOHANES 13 - Alkitab Singog In Mongondow Masa In Tanaa

Ki Yesus in nondarit kon sioḷ in murí-Nea mita

¹ Tosinggaipa in Singgai Moḷoben Paska, koyongandon kinotaauan i Yesus kon wakutuneadon Sia in monaḷámai kon dunia naa sin mobuidon kon i Amá-Nea. Sia motabi kon intau mita inta nobaḻí kapunyaan-Nea kon dunia naa, bo tantú-Neabí doman kotabi umaai in kopaḷutan dunia naa.

² Kon wakutu in ki Yesus bo murí-Nea mita yogot mongaan, Ibilis nopogonúdon in niat moraat kon bonu in gina i Yudas Iskariot ki adí i Simon sinbá sia in momaḻidawan kon i Yesus.

³ Kinotaauan bidon i Yesus kon ki Amá in noposarakandon in kawasa-Nea komintan kon i-Nia. Kinotaauan-Neabí doman kon Sia in namangoi nongkon i Allah bo mobui doman kon i Allah.

⁴ Tuamai Sia in sinimindog bo noḷongkut kon jubah-Nea bo nogibintoḷ in handuk.

⁵ Onda intua Sia in nogaḻin kon tubig kon bonu in baskom, bo mulaidon nondarit kon sioḷ in murí-Nea mita poḷat iradatan-Nea in handuk inta pinogibintoḷ-Nea tatua.

⁶ Bo nodapotdon in Sia kon i Simon Petrus. Ki Simon Petrus naa noguman, “Tuhan, umpaka dá ki Tuhanbí in mondarit kon sioḷ-Ku?”

⁷ Ki Yesus in notubag, “Diápabí kinomangaḻeanmu onu in pomiaan-Ku naa, táe bain komangaḻeanmu.”

⁸ “Donaai, Tuhan,” guman i Petrus kon i Yesus, “donaaibí mokoimontanmai Tuhan mondarit kon sioḷku!” Táe ki Yesus in notubag, “Aka diá daritan-Ku iko, yo iko in diábí mokouḻí kon tonsilai nongkon i-Nakó.”

⁹ Dá ki Simon Petrus in noguman, “Aka natua Tuhan, donaaidon tongá sioḷku, takindon doman ḻima bo uḷuku naa!”

¹⁰ Tubag i Yesus kon inia, “Intau inta ain noinggú, ain bidon nodarit komintan, tuamai in diá bidon paraḷu daritan komintan koḻikud bidon in sioḷnea. Moiko nion in nodarit bidon tongá diápa komintan.” (

¹¹ Kinotaauan bidon i Yesus in intau inta moposarakan kon i-Nia, tuamai Sia in noguman, “Moiko nion in nodarit bidon, táe diápa komintan.”)

¹² Nopaḷut mako in ki Yesus nondarit kon sioḷ monia, bui-Neadon iḷutud in jubah-Nea bo iḻimitú bui, bo noḻibó kon i monia, “Komangaḻean degá monimu in onu inta bagu-Ku inaidan kon i monimu?

¹³ Moiko in mogoiní kon i-Nakó Guru bo Tuhan. Bo Noitutuibí intua, sin totuu kon Akuoi in Gurubí bo Tuhan.

¹⁴ Dá aka Akuoi inta Guru bo Tuhanmu nondaritdon kon sioḷ monimu, yo moiko in mustibí doman mosidaritan kon sioḷ.

¹⁵ Akuoi ain nobogoi in toḷadan kon i monimu, sinbá aidan domandon monimu onu inta ain inaidan-Ku kon i monimu.

¹⁶ Totuubí in tosingogon-Ku naa: Tobatú ata in diábí moiḻiu kon i tuangnea, bo totabá in diábí moiḻiu kon inta nopotabá kon inia.

¹⁷ Aka kinotaauandon monimu komintan in naa, yo mosanang bidon in moiko aka pomiaanmu.

¹⁸ Onu in pinoguman-Ku naa in deemanbí soaḷ moiko komintan. Kotaauan-Kubí ki ine inta ain piniḻí-Ku, táe bá mobaḻídon onu inta pinais kon bonu in Buk Motusi nanaa, ‘Intau inta ain nongaan noyotakin-Ku, in moḷawangbí kon i-Nakó.’

¹⁹ Soaḷ tanaa muna-Kudon poguman kon i monimu kon dodai in diápa mobaḻí, sinbá aka mobaḻídon in soaḷ tatua yo pirisayaandon monimu kon Akuoibí in Sia inta sinumangoi ‘AKUOI OYÚON.’

²⁰ Naa in poguman-Ku kon i monimu: Ki ine in motarima kon intau inta pinotabá-Ku, yo sia in notarima kon i-Nakó. Bo ki ine in motarima kon i-Nakó, yo Sia tua in notarimadon kon i-Nia inta nopotabá kon i-Nakó.”

Ki Yesus nopotaau kon onu in pomiaan i Yudas kon i-Nia

²¹ Naonda in noguman mako natua in ki Yesus, totokdon in moajar in gina in Sia. Bo Sia in noguman, “Akuoi in mogumandon kon i monimu: Tobatú nongkon sigad monimu nion momaḻidawanbí kon i-Nakó.”

²² Murí-Nea mita nooindoian takin noherang sin diábí kinotaauan monia mongo ki ine imakusud-Nea tua.

²³ Murí inta totok kinotabi Yesus iḻimitú kon diugmai i Yesus

²⁴ Dá ki Simon Petrus in nonuḷadá kon inia, sin mokiḻibó mongo ki ine imakusud-Nea tatua.

²⁵ Dá murí-Nea tatua in dinimiugdon kon i Yesus, bo noḻibó, “Ki ine in sia, Tuhan?”

²⁶ Ki Yesus in notubag, “Intau inta ogoian-Ku in roti inta ain pinoḷodok-Ku kon bonu in palo, sia tuata in intaunea.” Dá ki Yesus in nogamá kon roti topongkó bo pinoḷodok-Nea kon palo, bodongka inogoi-Nea kon i Yudas ki adí i Simon Iskariot.

²⁷ Naonda in ki Yudas notarima kon roti tatua, ginanea in kinogonúandon in Ibilis. Bo ki Yesus in noguman kon inia, “Aidaidon koḻikat onu in kino ibogmu pomiaan.”

²⁸ Diábí tobatúmai in kon sigad monia inta iḻimitú nongaan takin-Nea tua in nonotaau kon singog i Yesus tatua kon i Yudas.

²⁹ Oyúon in nosangka kon ki Yesus nopotabá kon i Yudas minayá notaḷui kon tobatú kaparaḷuan pakéon kon pesta, andeka mobogoi in doit topiḻik kon intau bogá, sin ki Yudas tua mokokadai kon doit in kas monia.

³⁰ Naonda in ki Yudas notarima mako kon roti tatua, sia in baḷú iḷumuai. Nodoḷomdon dodai intua.

Parenta inta mobagu

³¹ Naonda in ki Yudas minayá, ki Yesus in noguman, “Tanaa Adí Intau pomuliaandon, bo ki Allah in pomuliaan pongin i-Nia.

³² Aka ki Allah pomuliaan pongin i-Nia, dá Sia in pomuliaanbí doman i Allah pongin awak-Nea tontaní. Bo ḷagi bidon pomuliaan i Allah.

³³ Adí-Ku mita, Akuoi in diá bidon moonggot in moyotakin monimu. Tayakonbí monimu in Akuoi, táe ná inta ain pinoguman-Ku kon itoi mita in Yahudi bo inta pinoguman-Ku doman kon i monimu, tampat inta bayáan-Ku in diábí kodapotan monimu.

³⁴ Akuoi in mobogoi in parenta mobagu kon i monimu: Moiko in mustibí mositabian tobatú bo tobatú. Ná Akuoi motabi kon i monimu, dá moiko in musti mositabian doman natua.

³⁵ Aka moiko bo mositabian, yo kotaauandon in intau kon moiko nion in murí-Kubí mita.”

Ki Yesus Nopotaau muna kon onu in aidan i Petrus

³⁶ Ki Petrus in noḻibó kon i Yesus: “Tuhan, kon onda in bayáan i Tuhan?” Ki Yesus in notubag, “Kon onda in bayáan-Ku, diápabí in iko motaau dumudui tanaa mako. Iko in bambí dumudui kon singgai moiduduimai.”

³⁷ Dá kai Petrus doman, “Tuhan nongonu sin diábí motaau akuoi in dumudui in tanaa mako? Morelabí in akuoi in matoi sin kopontingan i Tuhan!”

³⁸ Ki Yesus in notubag, “Totuu iko in morela in matoi sin kopontingan-Ku? Pokotaaudon Petrus! Diápa in manuk mokukú, iko in koyongandon kotoḷu moguman, kon diábí nokanalmu in Akuoi!”