YOHANES 11 - Alkitab Singog In Mongondow Masa In Tanaa

Kinopatoian i Lazarus

¹ Oyúon tobatú intau ki Lazarus in tangoinea. Sia in nogutun kon Betania noyotakin i utatnea mita bobay ki Maria bo ki Marta.

² Ki Maria naa in bobay inta nopoinggú in ḷana nobondu kon sioḷ i Tuhan bodongka iradatannea bui in buoknea. Kon singgai tobatú ki utat monia ki Lazarus naa in notakit.

³ Dá ki Maria bo ki Marta naa in minayá kon i Yesus bo nopotaau; “Tuhan, ki utat nami inta totok in kinotabi Tuhan tua notakit.”

⁴ Táe naonda in dinongog i Yesus in habar tatua, Sia in noguman “Takitnea tatua in diábí mokopatoi kon inia. Naa in nobaḻíbí sinbá kawasa i Allah poponiatadon bo bá popisí in takit tatua ki Adí i Allah in poḷantudon doman.”

⁵ Ki Yesus in motabibí kon i Maria, kon i Marta bo kon i Lazarus ki utat monia.

⁶ Táe naonda in ki Yesus nokotaaumai kon habar kon ki Lazarus in notakit, dá sinumuodbí in Sia nogutunpa doyowa nosinggai kon tua.

⁷ Bain nopaḷut mako kon tua bo noguman in Sia kon murí-Nea mita: “Koḻigai mayápa bui in kita in Yudea.”

⁸ Táe mosia in notubag, “Pak Guru, nobagumai naa intau mita in Yahudi moḷongasidon mogandur in batu kon i Pak Guru, yo tanaa nongonu sin ki Pak Guru mogoiníbí bui mayá intua?”

⁹ Ki Yesus in notubag, “Degá diábí kinotaauan monimu kon tosinggai tua mopuḷúbí bodoyowá, nojam? Intau inta mayá singgai, diábí moipintud, sin ontongonneabí in bayag in dunia naa.

¹⁰ Táe intau inta mayá doḷom in moipintudbí, sin diá in bayag kon inia.”

¹¹ Natua in pinoguman i Yesus. Noiduduimai kon tua noguman bui in Sia, “Ki utat naton ki Lazarus aindon nosiug, táe bayáan-Kubí bangonon in sia.”

¹² Dumodudui mita i Yesus in noguman, “Tuhan, aka ki Lazarus nosiug, mopiabí in sia.”

¹³ Makusud i Yesus ki Lazarus tua ain bidon minatoi. Táe sinangka monia makusud i Yesus tua kon ki Lazarus tua in nosiugbí ná biasamai.

¹⁴ Tuamai in pinogumandon i Yesus taran-tarangan, “Ki Lazarus minatoidon.

¹⁵ Táe nopiabí in gina-Ku sin diá in Akuoi kon tua, sin natuabí in mopia kon i monimu, sinbá moiko in mopirisayadon. Koḻigai in kita mayádon kon i Lazarus tanaa mako.”

¹⁶ Ki Tomas inta dinonoi “ki Apang” noguman kon yobayatnea mita inta murí mita i Yesus, “Koḻigai dumudui in kita, biar kita matoi moyotakin-Nea!”

Inta mokobiag bui bo mobogoi in kobiagan

¹⁷ Naonda in ki Yesus nodapotdon kon ḻipú inta pinogutunan i Lazarus, Ki Lazarus in koyongandon opat nosinggai in iḷobong.

¹⁸ Betania naa in nodiug kon Yerusalem, degá toḷumai nokilo in koyayúnea.

¹⁹ Kon tua nobayong intau in Yahudi in namangoi bo nohiburmai kon i Marta bo kon i Maria sin kinopatoian i utat monia.

²⁰ Naonda in dinongog i Marta kon ki Yesus in namangoi, sia in iḷumuai sin monontomu kon i Yesus, táe ki Maria in tongá kon baḷoi.

²¹ Ki Marta in noguman kon i Yesus, “Tuhan, aka kuma bo kon naa in ki Tuhan dodai intua, yo diábí minatoi in ki utat nami.

²² Tongá kinotaauankubí doman kon tanaa mako ki Allah in mobogoibí doman in onukabí in poigumon i Tuhan kon i-Nia.”

²³ Guman i Yesus kon i Marta, “Ki utatmu i mobiagbí bui.”

²⁴ Dá kai Marta doman, “Kinotaauankubí kon ki Lazarus in mobiagbí bui aka intau minatoi biagondon kon Singgai Pohakiman.”

²⁵ Ki Yesus in noguman bui kon i Marta, “Akuoibí inta mobogoi in kobiagan bo inta momiag kon intau minatoi. Intau inta mopirisaya kon i-Nakó in mobiagbí, umpakabí in sia minatoidon.

²⁶ Bo intau nobiag inta mopirisaya kon i-Nakó in mobiagbí mononoi. Mopirisaya degá in iko kon singog-Ku tatua?”

²⁷ “Tuhan,” kai Marta, “akuoi in mopirisayabí kon ki Tuhan in ki Adí i Allah, Datu Mopoposaḷamat inta mamangoi in dunia naa.”

Ki Yesus Nongombaḷ

²⁸ Noguman mako natua in ki Marta, minayá in sia bo nogoiní kon i utatnea ki Maria bo nopogombong kon inia, “Ki Pak Guru kon naadon; iḻibó-Nea iko.”

²⁹ Nokodongogmai kon tua, ki Maria bango-bangon, bo minayá nokipodungkuḷ kon i Yesus.

³⁰ Dodai intua, ki Yesus in diápa noiyaput in desa. Sia in kon ḻipúpa inta binayá i Marta pinoki podungkuḷan.

³¹ Naonda in intau mita Yahudi inta namangoi nohibur kon i Maria kon baḷoi nokoontong kon i Maria bango-bangon bo iḻimikat iḷumuai; dinuduian monia in sia, sin iraimai monia in sia mayábí in poḷoḷobongan bo mongombaḷ.

³² Wakutu in ki Maria noidapotdon kon i Yesus bo nokoontongdon kon i-Nia, sinumungkud in Sia kon tayowon-Nea bo noguman, “Tuhan, aka kuma dodai intua ki Tuhan kon naa, yo diábí minatoi in ki utatku.”

³³ Naonda inontong i Yesus in ki Maria nongombaḷ, bo intau mita in Yahudi inta namangoi noyotakinnea tua nongombaḷ doman, norobonoḷdon totok in gina-Nea, bo totokdon inagían tabi in Sia.

³⁴ Dá Sia noḻibódon kon i monia, “Kon onda in pinoḷobongan monimu kon inia?” Tubag monia “Igai indoian, Tuhan.”

³⁵ Bo ki Yesus in nongombaḷ.

³⁶ Bo intau mita in Yahudi noguman, “Indoiaika, totokbí in Sia motabi kon i Lazarus!”

³⁷ Táe oyúon doman in kon sigad monia tua in nosingog, “Intau bilog motaau baḻíon-Nea mokoontong, yo nongonu sin diábí in Sia nokoampag sinbá ki Lazarus in diá matoi?”

Ki Lazarus Biniag bui

³⁸ Totokpa in inangoian in tabi in ki Yesus minayá in Sia in poḷoḷobongan. Poḷoḷobongan tatua in tobatú angob inta sinaḷoban in batu moḷoben.

³⁹ Ki Yesus in noguman, “Posídon in batu tatua.” Táe ki Marta, ki utat in intau inta minatoi tatua in notubag, “Tuhan, aindon opat nosinggai in pinoḷobongan kon inia. Tantú nobongkog bidon!”

⁴⁰ Dá ki Yesus in noguman kon i Marta, “Degá kinoḻionganmudon inta pinoguman-Ku kon inimu; Kon aka iko mopirisaya, yo iko in mokoontongbí kon kawasa i Allah inta totuu moḷoben!”

⁴¹ Dá pinosídon monia in batu tatua. Onda intua ki Yesus iḷumangag kon ḷangit bo nosingog, “Sukur moantó Amá, sin ain inindongogan-Mu in Akuoi.

⁴² Kinotaauan-Kubí kon umuran-Mubí indongogan in Akuoi, táe singogon-Ku in naa, kon tayowon in intau mita inta kon naa, sinbá mopirisaya in mosia kon Ikobí in nopotabá mangoi kon i-Nakó.”

⁴³ Nosingog mako natua, ki Yesus in nomaḷú noropot in noguman, “Lazarus, ḷuaidon!”

⁴⁴ Dá iḷumuaidon in intau inta ain minatoi tatua. Ḻima bo sioḷnea kobaku-bakutpa in pusi, bo pogotnea in kobaku-bakutpa doman in pusi inta pinobakut kon pogotnea. “Bukádon in pusi tanion sinbá mobebasdon sia in mayá”. guman i Yesus kon intau mita kon tua.

Komplotan inta Monomayá Moḻimod kon i Yesus

⁴⁵ Nobayong in intau Yahudi inta namangoi nohibur kon i Maria in nopirisayadon kon i Yesus naonda in nokoontong kon onu inta nobaḻí tatua.

⁴⁶ Táe oyúon doman in tongonumai kon sigad monia tua in minayá kon intau mita in Parisi bo nongonguman kon onu inta ain inaidan i Yesus.

⁴⁷ Sin tuamai intau mita in Parisi bo imang mita itoi in nogaid kon rapat takin Mahkama Agama. Mosia in noḻibó, “Onu in musti aidan naton? Intau tanaa mokakitdon mogaid kon soaḷ mita inta mokoherang kon intau!

⁴⁸ Aka pomayá naton in Sia umuran mogaid kon oaidan-Nea, yo bayongan intau in mopirisayadon kon i-Nia. Bo pangabisannea pongawasa in Rum in mamangoi bo momoguyaat kon Baḷoi Tuhan bo bayongan intau naton!”

⁴⁹ Tobatú nongkon sigad monia inta tangoinea ki Kayapas, imang moḷoben kon taong tatua, nosingog, “Moiko in diábí nonotaau in onu bo onu.

⁵⁰ Degá diábí kinotaauan monimu, kon popisíbí in kopontingan intau moantó, dá maníka intau tobatú in matoi dika in bayongan bangusa morimumud?”

⁵¹ Sabanarnea ki Kayapas in nosingog kon tua, deemanbí nongkon raiannea tontaní. Táe saḷaku imang moḷoben taong tatua sia in nopotaaudon muna kon ki Yesus in matoibí sin kopontingan in bangusa Yahudi.

⁵² Bo deemanbí tongá bangusa in Yahudi, táe mosipunbí bo moponobatú kon adí mita i Allah inta noirangkapdon.

⁵³ Mulaidon singgai tua itoi mita in Yahudi noyopakat kon moḻimod kon i Yesus.

⁵⁴ Tuamai ki Yesus in diádon minayá kon sigad in intau mobayong inta kon sigad in intau Yahudi. Sia in nonaḷámaidon kon Yudea, bo minayá in kotá in Epraim inta kon diug in padang gurun. Sia in nogutun kon tua takin murí-Nea mita.

⁵⁵ Wakutu intua motoyongdon Singgai in Paska intau Yahudi. Nobayongdon intau nongkon ḻipu-ḻipúannea in minayádon in Yerusalem sin mopobayá in adat pondaritan kon awak kon wakutu in diápa singgai porayaan tatua.

⁵⁶ Mosia notayak kon i Yesus, bo wakutu in noyosipun kon Baḷoi Tuhan, mosia in nosigumanan, “Aka podudui in raianmu yo naonda? Degá diá in Sia mamangoi kon poramean tanaa.”

⁵⁷ Mosia in noguman natua sin imang mita itoi bo intau mita in Parisi ain nopoḷuai in parenta kon ki ine in nokotaau kon onda in Yesus, musti mopotaau sinbá Sia in kodomokan.