YOHANES 10 - Alkitab Singog In Mongondow Masa In Tanaa

Poumpamaan Domba bo Gombalanea

¹ “Totuubí in singog-Ku naa: Intau inta tumuot kon ḷantung in domba, bo diá mongin ḷoḻingkop, táe monomponikbí mongin daḷan ibanea, yo sia tua in mononakow bo mogogagow.

² Táe intau inta tumuot mongin ḷoḻingkop, sia tuata in gombala in domba.

³ Moḷoḷukad kon ḷantung momukatbí kon ḷoḻingkop sin tuotannea, bo domba mita in mokidongogbí kon singognea wakutu in oiníonnea in mosia podudui in tangoi monia tontaní bo diaannea ḷumuai.

⁴ Bo naonda in kon ḷuaidon in domba mita tatua, gombala tatua in mayá umuna kon i monia, bo dombanea mita in dumuduianmai.

⁵ Doíbi in mosia dumudui kon intau ibanea, nodapot in poḷaguianbí monia intau ibanea sin diá kinotaauan monia in singognea.”

⁶ Ki Yesus in nongonguman kon poumpamaan tatua, táe diá kinotaauan monia in makusud-Nea.

Ki Yesus, Gombala Inta Mopia

⁷ Tuamai ki Yesus in noguman bui “Poguman-Kudon kon i monimu, Akuoibí in ḷoḻingkop mayá kon domba mita tatua.

⁸ Bayongan inta namangoi kon dodai in Akuoi diápa in mononakowbí bo mogogagow in mosia tua, bo doíbí in domba mita tatua in mokidongog kon i monia.

⁹ Akuoibí naa in ḷoḻingkop. Ki ine in tumuot mongin i-Nakó mosaḷamat in sia, sia in tuot ḷuaibí bo mokouḻí kon kaanon.

¹⁰ Mononakow tua in tongábí mamangoi monakow, moḻimod bo momoguyaat. Táe Akuoi in mamangoibí sinbá mosia in mokouḻí kon kobiagan, kobiagan inta mobayong totok in kasanangan.

¹¹ Akuoibí naa in Gombala inta mopia. Gombala mopia in mobogoibí in nyawanea sin kopontingan in dombanea mita.

¹² Aka intau inta tongá sinondanan inta deeman gombala bo deeman doman kitogi domba mita tatua, poḷaguianbí monia in domba mita tatua aka ontongondon monia in serigala tayow-tayowdon mangoi. Dá tokodomokondon in serigala in domba mita tatua bo poguyaaton.

¹³ Intau inta sinoko tondanan tatua moḷaguibí, sin sia in nogaid tongábí popisí in inuboḻian. Dá diábí pandungonneamai in domba mita tatua.

^14-15 Akuoibí naa in gombala inta mopia. Notongkai ná kinototaau i Amá kon i-Nakó bo kinototaau-Ku kon i Amá, dá natua doman in kinototaau-Ku kon domba-Ku mita bo mosia in nonotaau doman kon i-Nakó. Akuoi in moposarakan in nyawa-Ku sin kopontingan monia.

¹⁶ Oyúonpabí doman in domba-Ku mita ibanea, inta diá noitakin kon paanan in domba tanaa. Mosia tua in mustibí doman diaan-Ku bo mosia in mokidongogbí kon singog-Ku. Mosia komintan in mobaḻí topaanan takin tobatú in gombalanea.

¹⁷ Ki Amá in motabi kon i-Nakó sin Akuoi moposarakan in nyawa-Ku, sinbá tua buion-Ku tarimaan.

¹⁸ Diábí tobatúmai in motaau mogamá nongkon i-Nakó. Akuoi in moposarakan intua, poduduibí in ibog tontaní. Akuoi in kokawasabí moposarakan intua, bo kokawasabí mogamá bui. Tuabí in oaidan inta sinarima-Ku nongkon i Amá-Ku.”

¹⁹ Popisí in ki Yesus nosingog natua, dá intau mita in Yahudi nomangkoidon nobobayowan.

²⁰ Nobayong in noguman, “Kinotoḷangan in dimbuḷó in Sia! Sia in nobundai! Nongonu sin indongoganbí monimu in Sia?”

²¹ Táe oyúon doman in noguman: “Intau inta kinotoḷangan in dimbuḷó in diábí mosingog natua! Eta dimbuḷó mokoundam kon intau bilog sahingga in mokoontong?”

Intau Yahudi doí motarima kon i Yesus

²² Kon Yerusalem intau mita koyogot morame kon Singgai Moḷoben Pinonoguḷapatan kon Baḷoi Tuhan. Dodai intua sempo in tumping.

²³ Ki Yesus in nodondaḷoimai kon tampat inta sinangoian Tampat Pobobarasanangan i Salomo inta kon bonu in Baḷoi Tuhan.

²⁴ Dodai intua intau mita in Yahudi namangoi noḻipung kon i Yesus. Mosia in noguman, “Modapot in toonu in pomayá-Mu mako in kami diá motantú in pirisaya? Pogumankadon kosilang, aka Iko nion totu-totuu Datu Mopoposaḷamat.”

²⁵ Ki Yesus in notubag, “Pinoguman-Ku bidon kon inimu, táe moiko in diá mopirisaya. Oaidan mita inta pinomia-Ku pinodoyon kon tangoi i Amá-Ku, mobogoi in bukti soaḷ Akuoi.

²⁶ Moiko in diá mopirisaya sin moiko in diá noituot kon paanan in domba-Ku mita.

²⁷ Domba-Ku mita in mokidongogbí kon singog-Ku mita. Kinotaauan-Kubí in mosia, bo mosia in dumuduibí kon i-Nakó.

²⁸ Mosia tua in ogoian-Kubí in kobiagan mononoi, bo nopasti bidon kon diábí moputu-putú. Diábí tobatúmai intau in mokoagow kon i monia nongkon ḻima-Ku.

²⁹ Inogoidon i Amá-Ku i-Nakó in mosia tua, bo noiḻiu kon bayongan in yagi-yagi. Bo diábí doman tobatúmai intau mokoagow kon i monia nongkon kawasa i Amá-Ku.

³⁰ Akuoi bo ki Amá in tobatúbí.”

³¹ Bo intau mita in Yahudi nogamá kon batu sin pogandur kon i Yesus.

³² Táe ki Yesus in noguman kon i monia, “Moiko ain nokoontong kon i-Nakó nogaid kon nobayong in oaidan inta mopia, inta pinoki aid i Amá kon i-Nakó. Nongkon oaidan mita tatua, onda in baḻíon monimu dodoyonan poganduran kon i-Nakó?”

³³ Intau mita in Yahudi notubag, “Deemanbí popisí in oaidan-Mu mita inta mopia tua in baḻíon nami dodoyonan poganduran in batu kon ini-Mu, táe popisíbí in Iko mohojat kon i Allah. Iko nion in intaubí bo moibog mokipotongkai kon i Allah.”

³⁴ Bo ki Yesus in notubag, “Degá diábí kinotaauan monimu kon pinais bidon kon bonu in Buk Hukum in agamamu nanaa: ‘Ki Allah in nogumandon, moiko in ilahbí?’

³⁵ Kinotaauanbí naton kon onu inta ain pinais kon bonu in Buk Motusi umuranbí pakéon, diábí in goga-gogainea. Dá aka ki Allah monangoi ‘ilah’ kon intau mita inta nopirisayadon kon singog-Nea.

³⁶ Yo nongonu sin singogonbí monimu kon Akuoi in mohojat kon i Allah popisí in Akuoi noguman kon Akuoi in ki Adí i Allah? Bokaka Akuoi in piniḻíbí i Amá bo pinotabá namangoi in dunia.

³⁷ Aka Akuoi bo diá nogaid kon oaidan mita inta pinoki aid i Amá, yo dika mopirisaya kon i-Nakó.

³⁸ Táe popisí in inaidan-Ku intua, dá pirisayadon in onu in inaidan-Ku tatua, umpakabí moiko doí mopirisaya kon i-Nakó. Takin natua yo kotaauandon bo komangaḻeandon monimu kon ki Amá in umuranbí notobatú takin-Ku, bo Akuoi in umuranbí doman notobatú i Amá.”

³⁹ Buidon doman ramujion domokon monia in ki Yesus, táe diápa doman kinodomokan monia.

⁴⁰ Onda intua ki Yesus in bui minayá kon ḷoḷan Ongkag in Yordan. Ongkag inta pinobaptisan i Yohanes koḻipod, bo ki Yesus in nogutunpa kon tua.

⁴¹ Nobayong intau in namangoi kon i-Nia. Mosia in noguman, “Ki Yohanes in diábí nomia kon soaḷ mita inta mokoherang, táe bayongan inta pinogumannea soaḷ intau tanaa in totuubí.”

⁴² Bo nobayong intau kon tua in nopirisaya kon i Yesus.