YOHANES 1 - Alkitab Singog In Mongondow Masa In Tanaa

Pirman inta ain nobaḻí Intau

¹ Nongkon pinomangkoianpamai, wakutu in dunia naa diápa pinomia, Pirman i Allah tatua in koyongan bidon oyúon. Pirman i Allah tatua in koyotaki-takin i Allah, bo Sia-Siakabí in ki Allah.

² Nongkon pinomangkoianpabímai Sia in noyotakin i Allah.

³ Bayongan in yagi-yagi pinomia pinodoyon kon i-Nia, bo nongkon bayongan inta oyúon, diábí in tobatúmai in pinomia diá pinodoyon kon i-Nia.

⁴ Pirman tatua in pangkoi in kobiagan, bo kobiagan tatua inta monimbayag kon intau.

⁵ Bayag tatua in nonindar kon sindip, bo Sia in diábí kokawasaan in sindip tatua.

⁶ Namangoidon in tobatú intau inta pinotabá i Allah, ki Yohanes in tangoinea.

⁷ Sia in namangoi nopotaau kon soaḷ bayag tatua, sinbá mopirisayadon in bayongan intau.

⁸ Sia tontaní in deemanbí bayag tatua, sia in tongábí nopotaau.

⁹ Bayag totokanea inta monimbayag kon bayongan in intau, mamangoi in dunia.

¹⁰ Pirman tatua in naadon kon dunia, Siabí tua in nomia kon dunia naa, táe dunia in diábí nonotaau kon i-Nia.

¹¹ Sia in namangoi in dunia inta pinomia-Nea tontaní táe intau mita kapunyaan-Nea tatua in doí motarima kon i-Nia.

¹² Tongá oyúon doman in notarima kon i-Nia bo nopirisaya kon i-Nia; mosia tua in inogoian hak mobaḻí ki adí i Allah,

¹³ inta pinononggadí deeman nongkon intau, sin kobiagan mobagu tua in nongkon i Allahbí in pangkoinea.

¹⁴ Pirman ain nobaḻí intau, Sia in nogutun kon sigad naton, bo kita ain nokoontong kon kamuliaan-Nea. Kamuliaan inta sinarima-Nea saḷaku Adí tuḷong i Amá. Pinongin i-Nia tua kita mokoontong kon i Allah bo tabi-Nea kon i naton.

¹⁵ Ki Yohanes in namangoi saḷaku sakusi-Nea, sia in nopohabar: “Naadon in Sia inta pinogumanku: Moiduduimai kon inakó, moiangoi in Sia inta mokawa-kawasa nongkon inakó, sin Sia in oyúondon kon wakutu in akuoi diápa.”

¹⁶ Moḷoben totok in tabi-Nea; diá in gogainea Sia in momarakat kon i naton.

¹⁷ Hukum i Tuhan sinarima naton nongkon i Musa. Táe tabi bo kososatia i Allah in pinoniatadon kon i Yesus Kristus.

¹⁸ Diábí in nokoimontanmai in nokoontong kon i Allah, koḻikudbí in ki Adí tuḷong i Amá, inta notongkai i Amá bo modagin totok kon i-Nia. Kon i-Nia tuata moniata kon i naton in ki Amá.

Kosakusian i Yohanes

¹⁹ Pongawasa mita in Yahudi kon Yerusalem nopotabá kon imang mita bo intau mita in Lewi minayá kon i Yohanes bo noḻibó nanaa, “Ki ine iko naa?”

²⁰ Taran-tarangandon in ki Yohanes in noguman, “Akuoi in deemanbí Datu Mopoposaḷamat.”

²¹ Dá bui iḻibó monia, “Aka natua, yo ki ine iko? Ki Elia degá iko?” Tubagnea: “Deeman”. “Tobatú nabi degá?” iḻibó bui monia. Táe ki Yohanes in notubag doman: “Deeman”.

²² “Aka natua, dá pogumandon kon inami mongo ki ine in iko naa? Sinbá kotaauan nami in potubag kon i monia inta nopotabá mangoi kon inami. Aka podudui in raianmu yo ki ine in iko nion?”

²³ Ki Yohanes in notubag: “Akuoibí naa inta imakusud in singog i Nabi Yesaya nanaa: ‘Intau inta nobaḷú kon padang gurun: Tondodaidon daḷan kon i Tuhan.’ ”

²⁴ Intau mita inta pinotabá in intau in Parisi

²⁵ noḻibó kon i Yohanes nanaa: “Aka iko deeman Datu Mopoposaḷamat, deeman ki Elia, bo deeman doman tobatú nabi, yo nongonu sin iko i mobaptisbí?”

²⁶ Ki Yohanes in notubag, “Akuoi in mopobaptis in tubig. Táe kon yua-yuak monimu, oyúon in tobatú intau inta diá kinotaauan monimu.

²⁷ Sia inta namangoi noiduduimai kon inakó, táe umpaka tongá mobuka kon togot in sapatu-Nea, yo diá patus in akuoi.”

²⁸ Tua komintan in nobaḻí kon Betania inta kon ḷoḷanmai in Ongkag in Yordan inta pobaptisanmai i Yohanes.

Ki Adí domba i Allah

²⁹ Nopoikoḷomai kon singgai, indoianmai Yohanes ki Yesus namangoi kon inia. Bo ki Yohanes in noguman, “Indoiai, tuata in ki Adí in Domba i Allah inta momopat kon dosa in dunia.

³⁰ Sia tuata inta imakusud in singogku, moiduduimai kon inakó mamangoi in Sia inta mokawa-kawasa nongkon inakó, sin kon wakutu in akuoi diápa pinolahir, Sia koyongandon oyúon.

³¹ Akuoi tontaní, diábí nonotaau kon i-Nia in koḻipod. Bokaka akuoi namangoi nobaptis in tubig sinbá intau mita in Israel monotaau kon i-Nia.”

³² Ki Yohanes in noguman doman nanaa, “Akuoi in nokoontong kon Roho i Allah in noponag nongkon ḷangit naonda bo ḷagapan paḷoma dinumompá bo nogutun kon i-Nia.

³³ Tungkuḷ intua diápabí kinotaauanku mongo ki ine in Sia. Táe ki Allah inta nopotabá kon inakó mopobaptis in tubig nogumandon kon inakó nanaa, ‘Aka mokoontong in iko kon Roho i Allah moponag bo mogutun kon intau tobatú, yo intaubí tatuata inta mopobaptis in Roho i Allah.’

³⁴ Bo inontongkudon tontaní intua,” guman i Yohanes, “Bo potaaukudon kon i monimu kon Siabí tua in ki Adí i Allah.”

Murí mita i Yesus inta Muna

³⁵ Nopoikoḷomai kon singgai, ki Yohanes kon tampat bui tatua takin murínea doyowa.

³⁶ Naonda inontongnea in ki Yesus noitaḻib, Sia in noguman: “Indoiai! Tuata in Adí Domba i Allah.”

³⁷ Dinongog in murínea doyowa tatua in singognea tatua, dá minayá in taya dua dinumudui kon i Yesus.

³⁸ Ki Yesus in nobobui kon i monia inta dumuduianmai kon i-Nia bo poḷat noḻibó, “Onu in tayakon monimu?” Tubag monia, “Rabi, kon onda in pinogutunan i Rabi?” (Rabi mangaḻenea guru.)

³⁹ Dá kai Yesus doman, “Koḻigai! Indoiaidon monimu tontaní.” Mosia in namangoi domandon bo noindoi kon pinogutunan-Nea. Dodai intua jam opatdon moḷoḷabung. Singgai intua mosia in nogutunpa noyotakin i Yesus.

⁴⁰ Tobatú kon sigad nayadua tua inta ain nokodongog kon onu inta pinoguman i Yohanes bo inta minayá dinumudui kon i Yesus, tangoinea in ki Andreas ki utat i Simon Petrus.

⁴¹ Dá ki Andreas in ḷagi notayak kon i Simon ki utatnea bo noguman kon inia, “Kami ain noyodungkuḷ i Mesias!” (Mesias notongkai in Kristus: Datu Mopoposaḷamat.)

⁴² Ki Simon dinia i Andreas minayá kon i Yesus. Ki Yesus inimindoi kon i Simon, bo noguman: “Iko ki Simon, ki adí i Yohanes. Iko in tangoiondon ki Kepas.” (Kepas notongkai in Petrus, mangaḻenea buḷud batu.)

Ki Yesus Nogoiní kon i Pilipus bo kon i Natanael

⁴³ Nopoikoḷomai kon singgai ki Yesus in nonantúdon kon mayá in Galilea. Sia in noyodungkuḷ i Pilipus. Ki Yesus in noguman kon i Pilipus, “Koḻigai duduidon kon i-Nakó!”

⁴⁴ Ki Pilipus naa intau in Betsaida, kotá inta pinogutunan i Andreas bo i Petrus.

⁴⁵ Bo ki Pilipus in noyodungkuḷ i Natanael bo poḷat noguman kon inia, “Nouḻídon nami in intau inta sinangoi i Musa kon bonu in buk hukum i Allah, bo inta ain pinotaau muna in nabi mita. Sia tua in ki Yesus, intau in Nazaret, ki adí i Yusup.”

⁴⁶ Táe ki Natanael in noguman, “Eta oyúon degá in mopia in mamangoi nongkon Nazaret?” Dá kai Pilipus doman, “Koḻigai, indoianmudon tontaní!”

⁴⁷ Inontong i Yesus in ki Natanael namangoi, dá ki Yesus in noguman nanaa soaḷ ki Natanael tua, “Indoiai, tua in intau in Israel motuḻid, diábí in uboḷ kon ginanea!”

⁴⁸ Dá ki Natanael in noḻibó kon i Yesus: “Naonda in kinototaau i Amá kon inakó?” Tubag i Yesus, “Wakutu in diápa inoiní i Pilipus in iko, inontong-Kudon iko kon ḻimonag in pangkoi ara tatua.”

⁴⁹ “Pak Guru, guman i Natanael, ki Amá in ki Adí i Allah!”

⁵⁰ Ki Yesus in noguman kon i Natanael, “Iko in nopirisaya kon i-Nakó tongá popisí degá in Akuoi noguman kon inimu kon iko inontong-Kudon kon siungonmai in pangkoi in ara tatua? Soaḷ mita inta moḷobe-ḷoben nongkon tua koontonganmubí!”

⁵¹ Ki Yesus noguman doman, “Totuu, popirisayadon! Iko mokoontongbí kon ḷangit mobukat bo malaekat mita i Allah moponik-moponag mamangoi kon i Adí Intau.”