YOËL 1 - Alkitab Singog In Mongondow Masa In Tanaa

¹ Naa in koyow i Tuhan kon i Yoël, ki adí i Petuel.

Norobonoḷ in gina in umat Israel popisí in bungai in boyó monia nodait kinaan in pangkoḷá

² Indongogaidon, ei guhanga mita in ḻipú; taridiaidon, ei bayongan intau in Yohuda. Nokoimontandon degá in ná tanaa in nobaḻí kon singgai kinobiaganmu, andeka kon dodai in mogoguyangmu?

³ Oumandon onu inta nobaḻí tatua kon i adímu mita; sinbá oumanon doman monia intua kon i adí mita monia in ouman tatua. Buí moiduduimai in musti mokidongog doman kon tua, bo mopotaau doman kon buí moiduduimai.

⁴ Paanan in pangkoḷá inta diá koiyapan in kobayongnea, dinumompá kon gobá mita bo nokaan kon pinomuḷanea. Onu in sinaḷáan in paanan tanaa, inindaitan in paanan ibanea doman.

⁵ Ei intau mita inta nongoḷoḷangu, pobangondon! Ei mongonginum mita, pongombaḷdon! Sin anggur inta mobagu inagowdon nongkon bibigmu.

⁶ Tontara in pangkoḷá nonubu kon butá naton; mosia in moropot bo diá koiyapan in kobayongnea, ingiponnea in ná koḷanit in uwaḷa in singa kobaayan.

⁷ Mosia in noyompat kon pangkoi in anggur naton, bo pangkoi in ara naton, dongkadon tuodnea. Pangkoinea mita iningkuḻitandon monia, nodapot in tanganea mita nobudódon.

⁸ Pongombaḷdon, ei umat, naonda bo mongodeaga inta norobonoḷ in dodob inta nongombaḷ kon kinopatoian i kantangnea inta kinotabinea.

⁹ Gandum bo anggur in diádon nongkon Baḷoi i Tuhan. Dá ponogumatoidon imang mita, inta motoḷutui in mogundoi kon i Tuhan.

¹⁰ Gobá mita nogoguyaatdon in tanaa. Butá nonogumatoi; sin minatoidon in bayongan in gandum, noingkagdon in bungai in anggur, bo nodaitdon in ḷana in zaitun.

¹¹ Ei monononggobá, pogamuidon! Ei monononggobá kon anggur, pongombaḷdon! Sin gandum, makoya bo bayongan in bungai in boyó nogoguyaatdon.

¹² Pangkoi mita in pinomuḷa kon rawang noingkagdon komintan: pangkoi in anggur, apel, ara, kurma bo delima. Dá rayat in diádon in ḷunganga in gina.

¹³ Ei imang mita inta nogundoi kon mezbah, pakédon in kaeng karong, bo pongombaḷdon. Tuotdon kon bonu in Baḷoi Tuhan sin mogamui kinoouput in doḷom, sin diádon in kuruban anggur bo gandum kon i Allahmu.

¹⁴ Parentaaidon in umatmu mopuasa, Potaaudon in poyodungkuḷan moḷoben! Oinídon in itoi mita bo guhanga mita in ḻipú bo bayongan in intau inta nogutun kon Yohuda, sinbá mamangoi kon Baḷoi i Allah, sin mokuani mokituḷung kon i-Nia.

¹⁵ Singgai i Tuhan in nodiugdon, singgai inta mokokoningkim; wakutu ki Inta Totok in Mokawasa morimumud.

¹⁶ Kokaanon in nodaitdon noyompat kon tayowon in mata naton kon Baḷoi i Allah naton diádon in giow pia in gina.

¹⁷ Batoḷ minatoi kon butá inta nobota-botak. Diá in gandum tagúon, dá ontag mita in diá in bonunea bo nobaḻídon apug.

¹⁸ Bobiagon mogamui bo mogagawang; diádon in rawang in bonok pongaanannea. Paanan in domba mororiga domandon.

¹⁹ Akuoi in mokituḷung kon ini-Mu, o Tuhan sin rawang mita in bonok nopokak in poninggai nodapot in pangkoi mita in kayu noingkag bo minatoi naonda bo kinaan in tuḷú.

²⁰ Nodapot in biag mita ḻindong kon kayuon nokuani kon ini-Mu mokituḷung. Mosia in diá mokoguḻí kon rogang, sin ongkag mita nongoingkagdon komintan.