YESAYA 64 - Alkitab Singog In Mongondow Masa In Tanaa

¹ Berakdon in ḷangit bo poponagdon, o Tuhan, baḻídon in buḷud mita modandú kon tayowon-Mu,

² naonda bo tuḷú mopodokot in kayu bo mokodidí kon tubig. Poniatadon in kawasa-Mu kon musung-Mu mita, modapot in bangusa mita in mourot kon tayowon-Mu.

³ Nokoimontandon in Iko nopoontong in oaid-Mu inta motoyang, inta diábí sinangkamai nami. Iko in noponag, bo kon tayowon-Mu buḷud mita modandú.

⁴ Diápa kon dodai in onda oyúon in nokodongog, bo diápa doman kon dodai in onda oyúon in nokoontong kon koḻikud in Iko, oyúon in ilah inta nogaid kon onuka, kon intau inta noharap mako kon inia.

⁵ Iko in motomu kon intau inta motuḻid in gina bo inta nobiag podudui in ibog-Mu iko in sinumorú kon inami, táe kami in tantúbí nogaid kon dosa totuu kon nongkon dungkuḷpabímai kami in kotaḷá.

⁶ Kami komintan in intaubí mita inta nonajis, nodapot in aid nami inta mopiapa in diá nodarit bo nokotor. Kami in moputúdon popisí in aid nami moraat naonda bo daun noingkag pinoḷayug in tompot.

⁷ Diá in nosambayang kon ini-Mu, andeka nopoigum in totuḷung-Mu, sin Iko in nogadop kon inami, bo nopomayá mako kon inami in iyopú in dosa nami.

⁸ Táe Iko, o Tuhan, in ki Amá nami, kami in butá ḷamentong, bo Iko in nomia kon inami; kami komintan in aidbí in ḻima-Mu.

⁹ Dá dikadon tumorú totok, kaasí Tuhan, dikadon monoro-norop kon dosa nami; indoiaidon kaasí in kami naa umat-Mu.

¹⁰ Kotá mita motusi-Mu in nádon onda bo padang gurun, Yerusalem in nobaḻídon butá noingkag inta noingongow.

¹¹ Baḷoi i Allah inta motusi bo momulia tampat in mogoguyang nami modayowmai kon ini-Mu, aindon kinaan in tuḷú; bayongan tampat inta kinoibog nami aindon nobaḻí goguyaatnea.

¹² Iko in nokoontong kon tua komintan, o Tuhan, umpaka dá Iko in tongábí kibio-biómai? Eta degá tongádon pomayá-Mu mako in kami mobaba kon roriga mobogat totok?