YESAYA 63 - Alkitab Singog In Mongondow Masa In Tanaa

Kinountungan i Tuhan kon bangusa mita Moḷoḷukad

¹ “Ki ine in sia inta namangoi nongkon Bozra kon Edom? Ḷambungnea in nopura, pakeangnea in mopouḻi-uḻinag; sia in ḷumampang takin motorindog mako.” “Akuoibí in ki Tuhan inta mokoposaḷamat bo mamangoi modia kon habar kountungan.”

Tuhan Moḷoḷukad

² “Nongonu sin pakeangmu in nádomai tua in kopopuranea, naonda bo ḷambung in inta momomugut kon bungai in anggur?”

Tuhan

³ “Tongá Aku-Akuoi mita in sinumuot kon pomomugutan kon anggur kon sigad in umat-Ku diá in notuḷung kon i-Nakó. Bangusa mita irita-ritakan-Ku kon bonu in torú-Ku, naonda bo noritak kon bungai in anggur. Dugú monia in noitoput nomuntad kon ḷambung-Ku, nokokotor kon bayongan in pakeang-Ku.

⁴ Akuoi in nonomayádon kon singgai ponuḻían, bo wakutu popoḷuatan kon umat-Ku.

⁵ Akuoi in notayak táe diá in notuḷung, Akuoi in noherang sin diá in nobantung. Bo ropot-Ku tontaní in notuḷung kon i-Nakó, Torú-Ku in nobantung kon i-Nakó.

⁶ Kon bonu in torú-Ku inta dumoko-dokot, irita-ritakan-Ku in bangusa mita; Iyopú-Ku in mosia, bo dugú monia in pinobutak-Ku kon butá.”

Kopopia in gina i Allah kon Israel

⁷ Akuoi in mopohabar in tabi i Tuhan bo modayow kon i-Nia sin bayongan in aid-Nea. Binarakatan-Nea totok in umat-Nea, sin Sia in nonotabi bo tabi-Nea in diábí moobo-obot.

⁸ Ki Tuhan in noguman, “Totuu, mosia in umat-Ku, adí mita inta diá mokokudai kon gina.” Dá Sia in nobaḻí mopoposaḷamat monia,

⁹ Sia tontaní in kinoantugan in roriga monia. Ki Tuhan in diábí nopotabá in totabá andeka duta; Siabí tontaní inta nopoḷuat kon i monia popisí in tabi bo totabi-Nea. Sia in umuranbí momiag kon i monia nongkon tungkuḷpabímai.

¹⁰ Táe mosia in nomarontak bo nokoajar kon gina i Tuhan. Dá nomurow in Sia bo nobaḻí musung monia Sia tontaní in noparang noḷawang kon i monia.

¹¹ Bo mosia in nokotorop kon inta dungkuḷmai, Sempo i Musa mogogundoi i Tuhan. Mosia in noḻibó “Kon onda in ki Tuhan inta nodia kon itoi mita in umat-Nea nongin dagat? Kon onda in ki Tuhan inta nobogoi in kawasa-Nea kon i monia?

¹² Kon onda in ki Tuhan inta koyot-yotakin i Musa takin ḻima-Nea inta moropot motorindog, bo nomotak kon tubig kon tayowon monia sinbá tangoi-Nea in kotaauandon modapot in mononoi?

¹³ Kon onda in ki Tuhan inta nodia kon i monia minayá nongin tubig inta noḻinow? Naonda bo kabaḷo nongin padang gurun, mosia in diábí kon dodai in onda in noipintud.”

¹⁴ Ki Tuhan in nodia kon i monia minayá in tampat pogogaian, naonda bo bobiagon dinia binayá pinokaan kon rawang. Natuata in Sia nodia kon umat-Nea, sinbá tangoi-Nea in poḷantudon.

Sambayang mopoigum in totabi bo totuḷung

¹⁵ O Tuhan, indoiaidon nongkon soroga, nongkon tampat-Mu inta motusi bo momulia. Kon onda in tabi bo kotorindog-Mu? Kon onda degá in gina-Mu inta kinoaputan in totabi-Mu? Dikadon tahangon-Mu in gina-Mu kon inami.

¹⁶ Iko nion in ki Amá nami? Ki Abraham bo ki Yakub in diábí nonotaau kon inami. Táe Iko o Tuhan, in ki Amábí nami, Mopoposaḷamat nami nongkon dungkuḷpabímai.

¹⁷ O Tuhan, nongonu sin pinomayá-Mubí mako in kami moiḷaḻe? Nongonu sin Iko in mopotogatbí in gina kon inami nodapot in kami in diádon moondok kon ini-Mu? Pobuidon mangoi popisí in mogogundoi-Mu mita, Popisí in umat-Mu, kapunyaan pusaka-Mu.

¹⁸ Nongonu sin pinomayá-Mubí mako in musung moritak magí mako kon Baḷoi-Mu, bo intau mita moporaa-raatmai kon tombuḷud-Mu inta motusi?

¹⁹ Pinomia-Mudon in kami naonda bo Iko in diá kon dodai in onda in nongawasa kon inami; naonda bo kami in diábí kon dodai in onda in nobaḻí umat-Mu.