YESAYA 62 - Alkitab Singog In Mongondow Masa In Tanaa

¹ Podoyon kon Yerusalem Akuoi in mosingog, podoyon kon Sion Akuoi in diábí tongá kibio-biómai, modapot in sia posaḷamaton bo kountungannea in monindar naonda bo poḷombow kon tungkuḷ in doḷom.

² Ei Yerusalem, bangusa mita in mokoontong kon kountunganmu, datu mita in moindoi kon koḷoḷobenmu. Iko in tangoion in tangoi mobagu, ki Tuhan tontaní in nobogoi in tangoi tatua.

³ Iko in mobaḻí naonda bo mahkota mogaga kon ḻima i Tuhan, mahkota in dodatuan kon ḻima i Allahmu.

⁴ Tangoimu in deeman bidon ‘Inta Sinaḷáan’, butámu deeman bidon ‘Inta Noingongow’. Iko in tangoion bidon, ‘Inta Kinotabi i Allah’, bo butámu in sinangoian, ‘Inta Ain Nonika,’ sin ki Tuhan in noibogdon kon inimu, Sia in nádon buḷoi ḷoḷaki kon butámu.

⁵ Naonda bo tayow mobiag tobatú inta nongantang kon mongodeaga, natuata in momomaḻímu in mononibuḷoi kon inimu. Naonda bo nonikaan tobatú mopia in ginanea in nokoontong kon i buḷoinea bobay, natuata in ki Allah mopia in gina-Nea kon inimu.

⁶ Kon dinding in Yerusalem Akuoi monampat kon moḷoḷukad; singgai doḷom mosia in diábí motaau in tongá kibio-biómai, táe mustibí umuran moponorop kon i Allah kon dandi inta ain pinomia-Nea.

⁷ Mosia in diábí motaau in mopomayá mako in Sia tongá kibio-biómai kon dodai in Sia diápa moposindog bui in Yerusalem bo mopobaḻí ponango-nangoian kon sinangkub in dunia.

⁸ Ki Tuhan in nodandidon takin ibot bo mopobayábí intua pinongin kawasa-Nea: “Akuoi in diá bidon mobogoi in gandummu kon musung; intau ango-angoi in diá bidon monginum kon anggurmu inta nouḻímu takin irumoriga.

⁹ Táe moikobí inta nosipun kon bungai in boyónea, in mokaan kon bungainea bo modayow kon Tuhan; bo moiko in nosipú kon bungai in anggur, in monginumbí kon tubignea kon bosí in Baḷoi-Ku.”

¹⁰ Intau in Yerusalem, ḷuaidon mongin bonawang, sadiadon in daḷan kon intau mita inta mobui. Aidaidon in daḷan moḷoben, ḷumbúdon in batunea, posindog in bandera mita kon bangusa mita.

¹¹ Ki Tuhan in nobogoi in koyow tanaa kon sinangkub in dunia, “Poguman kon intau inta nogutun kon Sion, ‘Indoiai, ki Tuhan Mopoposaḷamat namangoi! Sia in sinakinan in intau mita inta ain pinoḷuat-Nea.’ ”

¹² Mosia in tangoionbí: ‘Umat motusi’; ‘Umat inta pinosaḷamat i Tuhan’. Yerusalem in tangoiondon ‘Kotá inta dinondouḷugan i Tuhan’, ‘Kotá inta diá bidon sinaḷáan i Tuhan’.