YESAYA 60 - Alkitab Singog In Mongondow Masa In Tanaa

Yerusalem in mobaḻí ponango-nangoian

¹ Sindogdon bo kobaḻídon bayag, ei Yerusalem, sin bayag in kasaḷamatanmu in noiangoidon; Ki Allah in monimbayagbí kon inimu takin kamuliaan-Nea.

² Dunia kinawasa in sindip, bangusa mita kinokoḷoban in pungit; táe bayag i Tuhan in momukábí kon ḻimonikmu, Sindar in koangoian-Nea in moniata kon ḻimonikmu

³ Bangusa mita in moyo-moyodudui in mamangoi kon bayagmu, datu mita in moibog kon sindar inta nomuká kon inimu.

⁴ Indoiaika onu in nobaḻí kon ḻibumumai; rayat noyosipun sin mobui kon inimu. Ki adímu mita ḷoḷaki in mamangoi nongkon moyayú, ki adímu mita bobay in koyotan.

⁵ Mokoontongmai kon natua moherang in iko bo pogotmu in motarimbuka; Moitongau in iko bo moḷoben in gina. Kapunyaan in bangusa mita diaan kon inimu, kaoyúonan nongkon ḷoḷan in dagat momuḻing kon inimu.

⁶ Butámu in posipunandon in unta mobayong, mosia in mamangoi nongkon Midian bo Epa. Nongkon Syeba intau modia kon buḷawan bo kamania, sindaḷan modayow kon aid i Tuhan.

⁷ Bembé domba in Kedar diaan kon inimu domba koḷakian nongkon Nebayot sinadia pakéon kon ibadamu. Kuruban tatua in mokosanang kon gina i Tuhan Baḻíon-Nea morame in Baḷoi-Nea inta nopuḻing in kamuliaan.

⁸ Onu degá in inta noiḷayug naonda bo goḷom naonda bo paḷoma inta iḷumayug nobui?

⁹ Tuata in kapaḷ mita inta namangoi sinumubu nodia kon umat i Allah nobui nongkon butá moyayú. Saḷaka bo buḷawan dinianea noyotakin sin modayow kon i Tuhan Allahmu; kon i Allah in Israel Inta Totok in motusi, inta nomaḻí kon umat-Nea ihoromat.

¹⁰ Ki Tuhan in moguman kon Yerusalem, “Intau ango-angoi in buibí moposindog in dindingmu, bo datu mita in mobantung kon inimu. Koḻipod in Akuoi in nohukum kon inimu kon bonu in torú-Ku, táe tanaa in Akuoi noibogdon nonotabi kon inimu.

¹¹ Singgai doḷom bonawangmu in bukaanbí mako, sinbá kaoyúonan in bangusa mita motaaudon atodon kon inimu, takin datu mita inta ain nobaḻí intau inta dinakop.

¹² Bangusa bo dodatuan inta doí mobantung kon inimu, in moyopúbí bo moinggamádon.

¹³ Onu inta nobaḻí mokosanang kon kayuon in Libanon in akutonbí poangoi kon inimu kayu in berangan, ḷokuyú bo eru sin momia kon Baḷoi-Ku momulia, bo mopogaga in sosindogan-Ku.

¹⁴ Adí mita in intau mita inta nondorot kon inimu in mamangoibí tumungkud, inta nokoimontandon noningkuḻe kon inimu in mohoromatbí, iko in tangoionbí ‘Kotá in Tuhan’, ‘Sion, Kotá i Allah Mokudus in Israel’.

¹⁵ Iko in diá bidon taḷaan bo indoíon, bo diábí pomayá mako in mobaḻí moingongow. Iko in baḻíon-Ku mokosanang kon i-Nakó inta mononoi, tampat mokopoḷunganga modapot in kopaḷutannea.

¹⁶ Iko in biagonbí in bangusa mita bo in datu mita, naonda bo iná tobatú momiag kon i adínea. Dá kotaauanmudon kon Akuoibí in Tuhan, Mopoposaḷamatmu, bo ki Allah in Israel inta moropot in Mopopoḷuatmu.

¹⁷ Akuoi in nodia kon buḷawan nobaḻí toḻiu in bitú, bo saḷaka nobaḻí toḻiu in uatoi. Ogoi-Ku in bitú nobaḻí toḻiu in kayu, bo uatoi nobaḻí toḻiu in batu. Butámu in baḻíon-Ku moaman bo mobiag mosanang, bo pinarenta kinoadil.

¹⁸ Diá bidon in habar soaḷ aid diá mopia kon butámu, soaḷ korimumudan bo kogoguyaatan kon wilayahmu. Naonda bo dinding Akuoi in mogoḻiung kon inimu, bo iko in modayowbí kon i-Nakó nobaḻí Mopoposaḷamatmu.

¹⁹ Iko in diábí paraḷu sindaran mata in singgai kon dodai in singgai, bo diábí paraḷu simbayagan in buḷan kon dodai in doḷom. Sin Akuoi ki Tuhan in nobaḻí mononimbayag mononoi kon inimu, Akuoi in monindar kon inimu pongin kamuliaan-Ku.

²⁰ Kon inimu in oyúonbí in mata in singgai inta diádon tumoyo-toyop, bo buḷan inta diá kon dodai in onda in tumoyop. Sin Akuoi ki Tuhan in nobaḻí mononimbayag mononoi kon inimu wakutumu mononogumatoi in mopaḷutdon.

²¹ Intau mita inta nogutun kon butámu in mogaidbí kon onu inta totuu, mosia in mobaḻíbí kitogi in butá tatua modapot in mononoi. Mosia in naonda bo pinomuḷa inta cinangkok inta pinomuḷa-Ku tontaní, sin moponiata kon kamuliaan-Ku.

²² Nodapot in motoḷuadí inta mointok bo moyangkó in mobaḻíbí bangusa inta moḷoben bo moropot. Akuoi ki Tuhan in ḷagi bidon mopoaid, kon wakutu inta moitongkaná.”