YESAYA 6 - Alkitab Singog In Mongondow Masa In Tanaa

Ki Allah nogoiní kon i Yesaya mobaḻí nabi

¹ Kon taong kinopatoian i Datu Uzia, akuoi nokoontong kon i Tuhan. Sia in iḻimitú kon tudu in tampat pomomarentaan-Nea inta moḷantud bo momulia. Jubah-Nea noikoḷob kon bayongan Baḷoi Tuhan.

² Koḻibu-Neamai sinimindog in mahaḷuk mita inta noyongkit naonda bo tuḷú, kon batúannea onom in koḻikipnea. Koḻikip doyowa nongoḷob kon pogot, doyowa doman in nongoḷob kon awaknea, bo koḻikip inta doyowa in pinaké iḷumayug.

³ Mosia in nosigumanan tobatú bo tobatú: “Kudus, kudus, kudus. Mokudusdon in ki Tuhan Inta Totok in mokawasa. Butá nopuḻing in kinoangoian-Nea inta momulia.”

⁴ Singog monia nokogugur kon taḷog in Baḷoi Tuhan, bo Baḷoi i Tuhan tatua nopuḻing in poyok.

⁵ Bo akuoi in noguman, “Mobodito! Diádon in kamang kon inakó, sin bibigku in nokotor popisí in dosa, bo akuoi in nogutun kon sigad in bangusa inta natua doman. Umpaka natua, takin mataku tontaní akuoi ain nokoontong kon i Datu, ki Tuhan Inta Totok in mokawasa!”

⁶ Onda intua tobatú kon sigad in mahaḷuk tatua iḷumayug namangoi kon inakó nodia kon baga inta sinupitnea nongkon mezbah.

⁷ Iḻiainea in bibigku in baga tatua poḷat nosingog, “Baga tanaa ain noḻiai kon bibigmu. Tanaa in taḷámu ain pinopatan bo dosamu in inampungandon i Tuhan.”

⁸ Bo akuoi in nokodongog kon singog i Tuhan noguman, “Ki ine in potabá-Ku? Ki ine in mobaḻí mododia kon habar naton?” Akuoi in notubag, “Naa in akuoi. Potabádon in akuoi!”

⁹ Bo Sia in nopotabá kon inakó mayá modia kon koyow tanaa potaau kon umat: “Moiko in umuranbí mokodongog, táe diábí momangaḻe. Moiko in umuranbí monondudut, táe diábí monotaau mongo onu in mobaḻí.”

¹⁰ Bo nogumandon in Sia kon inakó, “Bangkungaidon in raian in intau mita tatua, bongoḷai in bongoḷannea bo bilogai in matanea, sinbá mosia in diá mokoontong, mokodongog andeka momangaḻe, bo momurow mamangoi kon i-Nakó bo mopiadon.”

¹¹ Akuoi in noḻibó, “Dapot in toonu in kaadaan tanaa, Tuhan?” Tubag-Nea, “Modapot in kotá mita mogoguyaatdon bo diádon in mogogutunnea, baḷoi mita diádon inutunan, bo butá in diádon in bonunea bo moḷogatdon,

¹² Intau mita in kotá mita tatua in poguntunon-Ku mayá in kotá inta moyayú, modapot in sinangkub in butá mobaḻídon moingongow totok.

¹³ Modapot in aka kon sigad in intau mopuḷú oyúonpa in tobatú inta nogutun kon butá tatua, sia in yopúonbí doman. Táe naonda bo pangkoi in nunuk aka pupuḷon yo oyúonpa in tuodnea, natua doman oyúonpa in ki agat in bangusa tatua inta nobaḻí pomangkoian in umat inta motusi.”