YESAYA 54 - Alkitab Singog In Mongondow Masa In Tanaa

Tabi i Allah kon Israel

¹ Yerusalem, dungkuḷmai iko in naonda bo bobay bantó inta diá monononggadí. Táe tanaa in porogiowdon, bo podondongdon takin ḷunganga in gina! Sin ki adímu mita in nobayong totok, noiḻiu kon adí bobay inta diá sinaḷáan in buḷoi.

² Pokooḷadon in ḷoḷaigan mita pogogutunanmu; koḷanggó in tontogotnea mita bo koroton in oiginea!

³ Iko in modugangbí mooḷad ná koḷanan bo koḷoigi, ḻitúanbí in intaumu mita in butá in bangusa mita bo mogutun kon kotá mita inta tanaa mako noingongow.

⁴ Dika moondok, iko in diábí pokopooyáanmai: diábí singkuḻeon bo oyáon. Iko in mokoḻiong bidon kon aidmu inta diá motoindudui kon tungkuḷ noguodpa; diá bidon mokotorop bui kon kaadaanmu saḷaku boba-bobay.

⁵ Inta nomaḻí kon inimu in naonda bo ki buḷoimu ḷoḷaki, ki Allah mokudus in Israel in mopoposaḷamatmu. Ki Tuhan Inta Totok in mokawasa, tuata in tangoi-Nea, Sia in Allah inta nongawasa kon sinangkub in dunia.

⁶ Israel, iko in naonda bo buḷoi bobay inta nobagupa inta nokuyang in gina popisí in sinaḷáan i buḷoinea. Táe ki Allah in nogoiní bui kon inimu bo noguman,

⁷ “Tongábí tokokiap monag Akuoi in nonaḷámai kon inimu; pinongin ḻimbatú in tabi iko in ginamá-Ku bui.

⁸ Tongábí notoyong in Akuoi nonaḷámai kon inimu popisí in torú-Ku inta tumaga-tagab. Táe pinongin tabi mononoi Akuoi in notabi kon inimu.” Natuata in guman i Allah Mopoposaḷamatmu.

⁹ “Naonda bo kon tungkuḷ i Nuh Akuoi in nodandi kon ḷunud moḷoben in diá bidon monagom kon butá, natua doman in tanaa Akuoi in modandi kon Akuoi in diá bidon tumorú andeka mopogogondok kon i monimu bui.

¹⁰ Umpaka buḷud mita bo tombuḷud mita modandú, Akuoi in diábí mogogai in monotabi kon inimu. Dodandian dodamean-Ku in umuran-Kubí kadaian,” Guman i Tuhan inta notabi kon inimu.

Yerusalem inta mobagu

¹¹ Ki Tuhan in noguman, “Ei Yerusalem, kotá inta ukur diá mopia, iko in diádon kodaya bo diádon in moḷoḻipoi. Orotanmu mita in poukatonku bui, mopomaké in batu mita inta koboḻi.

¹² Benteng mita posindogon-Ku nongkon batu delima, Bonawangmu mita in nongkon batu permata, dindingmu mita in nongkon batu ratna mutu manikam.

¹³ Bayongan in intaumu mobaḻí murí-Ku, mosia in mobiag mooyúon bo motompia.

¹⁴ Iko in pinosindog pinodoyon kon koadilan, pinoyayú nongkon inta mokoondok bo pinondorotan.

¹⁵ Aka moiko tubuon, deemanbí Akuoi in nopotabá, ki inekabí in monubu kon inimu in moḷabúbí.

¹⁶ Akuoibí inta nomaḻí kon mononontaḷ inta nongokab kon tuḷú sin ponontaḷan kon sonjata. Akuoibí doman inta nomaḻí kon tontara inta nopomaké in sonjata tatua sin moḻimod.

¹⁷ Táe batúan in sonjata inta sinontaḷ sin moḷawang kon inimu, in diábí motuoi. Bo bayongan in inta pinonapud kon bonu in pongadilan in poniatamubí kon diá totuu. Akuoi in mobogoibí in tombuinag kountungan kon mogogundoi-Ku mita,” natuata in singog i Tuhan.